Öflug almannaþjónusta er lykillinn að því að þjóðir Evrópu komist undan kreppunni með sem minnstum skaða. Auknar fjárfestingar innan almannaþjónustunnar sem og í verkefnum á vegum hins opinbera koma öllum vel, styrkja efnahagslífið, draga úr misrétti, halda uppi eftirspurn eftir atvinnu og eiga þátt í að leggja grunn að sjálfbæru efnahagslífi í framtíðinni. Almannaþjónustan gegnir meginhlutverki við að verja almenning fyrir verstu efnahagslegu afleiðingum kreppunnar. Þetta er meðal helstu áhersluatriða sem Evrópusamtök starfsmanna í almannaþjónustu, EPSU samþykkti á áttunda þingi sínu sem haldið var í Brussel í síðustu viku, dagana 8. til 11. júní.

ASG gegn almannaþjónustunni

Þing EPSU gagnrýndi jafnframt harðlega stefnu Alþjóðagjaldeyrissjóðsins gagnvart þeim löndum Evrópu sem þurft hafa að leita á náðir hans. Sú stefna, sem nýtur stuðnings framkvæmdastjórnar Evrópusambandsins, hefur skilyrt lán sín því að lánþegar dragi úr framlögum til almannaþjónustunnar og öðrum útgjöldum hins opinbera. Skilyrði sjóðsins urðu þannig til þess að ríkisstjórn Lettlands ákvað í síðustu viku að lækka laun allra opinberra starfsmanna um 50% og lifa þeir nú flestir á lögbundnum lágmarkslaunum, um 200 evrum á mánuði. Fulltrúi lettneskra verkalýðsfélaga sagði á þinginu að það væri verið að drepa almannaþjónustuna í landinu og fordæmdi EPSU-þingið aðgerðir lettnesku ríkisstjórnarinnar mjög harðlega.

Evrópukosningarnar vonbrigði

Þing EPSU var annars haldið í skugga kosninga til Evrópuþingsins þar sem hægri flokkar unnu mjög á, öfugt við væntingar margra. Þykir ljóst að barátta EPSU verður þyngri undir fæti fyrir vikið, en mörg af helstu baráttumálum EPSU hafa snúist um andóf gegn tilskipunum framkvæmdanefndar ESB og dómum Evrópudómsstólsins sem hafa verið fjandsamleg hagsmunum almannaþjónustunnar og réttinda verkafólks. Hér má t.d. nefna þjónustutilskipunina og tilskipun um veitingu heilbrigðisþjónustu yfir landamæri og Laval, Viking, Rüffert og Luxemborg dómana. Í þeirri baráttu hefur EPSU sótt stuðning til þeirra flokkahópa á Evrópuþinginu sem töpuðu hvað mest í þingkosningunum. Þá þykja líkur á róttækum umbreytingum á fjármagnsmarkaðnum og í umhverfis- og loftlagsmálum hafa minnkað í kjölfarið.

EPSU formlega hluti af PSI

Engu að síður einkenndi samheldni og baráttuhugur þingið og vitundin um, að nú standa baráttumál EPSU um öfluga almannaþjónustu á krossgötum, ýtti undir þann jákvæða anda. Þá var þingið sögulegt í þeim skilningi að formlega var samþykkt að EPSU yrði Evrópudeild PSI, Alþjóðasamtaka starfsmanna í almannaþjónustu. Voru fulltrúar PSI, með Peter Waldorff formann PSI í broddi fylkingar á þinginu. Má segja að sérþekking þeirra hafi nýst strax, því í tengslum við þekkingu þeirra á starfsháttum Alþjóðagjaldeyrissjóðsins, varð til óformlegur hópur nokkurra þjóða sem ætlar að vinna að umbreytingum á ASG. Í sem stystu máli snýst sú vinna að því að fá aðildarlönd sjóðsins til að taka til endurskoðunar þau framlög opinberra fjármuna sem þau láta renna til ASG og skilyrða þau þannig að sjóðurinn taki tillit til félagslegra og umhverfislegra þátta í lánveitingum sínum. Voru fulltrúar verkalýðsfélaga í þeim löndum sem láta mest fé renna til ASG á fundinum, Frakkar, Bretar, Hollendingar, Ítalir og Norðurlandaþjóðir sem og fulltrúar þeirra landa sem sjóðurinn beitir nú hörðu við niðurskurð á almannaþjónustunni, Ungverjar, Lettar og Íslendingar.

Forystukonur EPSU, þær Carola Fischbach-Pyttel og Anne - Marie Perret voru endurkjörnar til næstu fimm ára.

Nánar verður sagt frá einstökum samþykktum EPSU-þingsins hér á síðunni síðar. Má segja að í ljósi yfirvofandi viðræðna Íslands og ESB að þá hafi samþykktir EPSU aldrei haft jafn mikið vægi á Íslandi og nú, um leið og þær gefa innsýn inn í þann veruleika ESB sem mjög sjaldan er til umræðu á Íslandi.