Fræðslunefnd BSRB

Jakobína Þórðardóttir St.Rv. formaður, Ingunn Hafdís Þorláksdóttir St.Sel., Unnur Sigmarsdóttir Stavey, Guðrún Bjarnadóttir SFR, Birna Ólafsdóttir SLFÍ, Kristín Sigurðardóttir Kili og Runólfur Þór Runólfsson PFÍ. Starfsmaður: Sigurður Á. Friðþjófsson - BSRB

Stjórn BSRB ákvað á fundi sínum 19. nóvember 2009 að innan BSRB 2009 - 2012 verði áfram starfandi fræðslunefnd. Hlutverk nefndarinnar er að halda utan um trúnaðarmannafræðslu og aðra félagslega fræðslu á vegum BSRB. Jafnframt ber fræðslunefnd að fylgja eftir áherslum 42. þings BSRB í ályktun þingsins um fræðslumál. Stjórn og/eða framkvæmdanefnd BSRB getur falið fræðslunefnd önnur verkefni eftir þörfum.

Fræðslunefnd BSRB skipuleggur námskeið sem haldin eru á vegum samtakanna, og er markmiðið að miðla fróðleik og þjálfun til félagsmanna sem nýtist þeim vel á vettvangi félagsmála og í samskiptum við annað fólk. Trúnaðarmannafræðsla BSRB og Félagsmálaskóla alþýðu hófst vorið 2008. Trúnaðarmannanámið er í fimm þriggja daga námskeiðum og einu tveggja daga og er metið til 10 eininga á framhaldsskólastigi. Þá hefur fræðslunefnd BSRB forystufræðslu fyrir stjórnarmenn í aðildarfélögunum. Einnig hafa verið haldin námskeið fyrir samningatækni fyrir samninganefndir aðildarfélaganna. Að lokum má nefna starfslokanámskeið fyrir BSRB félaga og maka þeirra sem hafa verið mjög fjölmenn undanfarin ár.

Talsvert er um að starfsfólk BSRB sé fengið til þess að halda erindi á fundum aðildarfélaganna og taka að sér kennslu á námskeiðum sem félögin skipuleggja.

Fræðslunefnd BSRB hefur ráðist í stór tímabundin verkefni undanfarin ár. Þar má nefna tölvufræðslu BSRB sem ráðist var í í samvinnu við Nýja tölvu- og viðskiptaskólann og símenntunarmiðstöðvar á landsbyggðinni. Um 1500 manns sóttu þau námskeið. Þá skipulagði nefndin átak í að efla tungumálakunnáttu félagsmanna í samvinnu við Fravegis og símenntunarmiðstöðvarnar.

BSRB á aðild að Félagsmálaskóla alþýðu og eiga félagsmenn kost á að sækja félagsmálanámskeið og önnur námskeið skólans. Formaður fræðslunefndar BSRB er stjórnarmaður í Félagsmálaskólanum.

Starfsmenntunarsjóður starfsmanna ríkisins innan BSRB varð til í kjarasamningum árið 1980, og er hlutverk sjóðsins að efla og auðvelda starfsmenntun ríkisstarfsmanna innan BSRB. Hafa þúsundir BSRB-félaga hlotið styrk úr sjóðnum á umliðnum árum. Tekjur sjóðsins eru auk vaxtatekna framlag úr ríkissjóði, og nemur það nú 0.22% af heildartekjum félagsmanna. Nokkur aðildarfélög BSRB hafa gengið úr sjóðnum og stofnað sína eigin starfsmenntunarsjóði, og renna greiðslur ríkissjóðs vegna félagsmanna í þessum félögum nú í hina nýju starfsmenntunarsjóði. Þau félög sem nú eiga aðild að sjóðnum eru Félag flugmálastarfsmanna ríkisins, Félag starfsmanna stjórnarráðsins, Sjúkraliðafélag Íslands, Starfsmannafélag Ríkisútvarpsins og Tollvarðafélag Íslands. S´jóðurinn er vistaður hjá fjármálaráðuneytinu og er Anna Antonsdóttir starfsma´ður ráðuneytisins umsjónarmaður hans.

BSRB á fulltrúa í sjö manna Starfsmenntaráði sem sett var á stofn árið 1992, en meðal verkefna ráðsins er að úthluta styrkjum til starfsmenntunar og vera stjórnvöldum til ráðuneytis um stefnumótun og aðgerðir á sviði starfsmenntunar í atvinnulífinu. Starfsmenntaráðið sér um úthlutun úr starfsmenntasjóði félagsmálaráðuneytisins sem jafnhliða var stofnað til árið 1992.

BSRB á einnig fulltrúa í þremur starfsgreinaráðum menntamálaráðuneytisins: Starfsgreinaráði heilbrigðis-, félags- og uppeldisgreina, starfsgreinaráði skrifstofu- og verslunargreina og starfsgreinaráði umhverfis- og landbúnaðargreina.