BSRB, BHM og KÍ undirrituðu í morgun samkomulag við ríki, Reykjavíkurborg og launanefnd sveitarfélaga um ýmis réttindamál. Ákveðið var að semja sameiginlega um réttindamálin en samningsrétturinn varðandi kaup og kjör er hjá einstökum aðildarfélögum þessara bandalaga og er ljóst að þau munu ekki semja í heildarsamfloti að þessu sinni.

Landssamband lögreglumanna hefur opnað nýja heimasíðu. Slóðin er sú sama og á gömlu heimasíðu landssambandsins: www.ll.bsrb.is/ Með þessum breytingum tekur heimasíða LL miklum stakkaskiptum. Útlitið er nútímalegra og allt aðgengi mun þægilegra. Í frétt á síðunni segir að það sé ætlun skrifstofunnar að halda henni lifandi með nýjustu upplýsingum.

Sjöfn Ingólfsdóttir formaður Starfsmannafélags Reykjavíkurborgar og varaformaður BSRB sagði í dag við undirritun samkomulags sem náðst hefur við Reykjavíkurborg um viðbótarframlag borgarinnar í lífeyrissjóði starfsmanna hennar, að þetta væri mikilvægur og langþráður áfangi. Samkomulagið felur í sér að Reykjavíkurborg greiðir viðbótarframlag í lífeyrissjóð, allt að 2% framlag gegn jafnháu framlagi starfsmanns. Starfsmenn ríkisins hafa haft þetta ákvæði í samningum hjá sér en sveitarfélögin ekki.

Fulltrúar Íslands á þinginu: Þuríður Einarsdóttir PFÍ, Einar Ólafsson St.Rvk. og Gylfi Arnbjörnsson ASÍ.

18. þing Alþjóðasambands verkalýðsfélaga, Miyazaki, Japan, 6. desember 2003
Staða verkalýðshreyfingarinnar á tímum hnattvæðingar var meginþema 17. heimsþings Alþjóðasambands verkalýðsfélaga sem var haldið fyrir fjórum árum. Þeirri umræðu er haldið áfram á 18.heimsþinginu sem nú stendur yfir í Miyazaki í Japan.

Frá undirritun samningsins: Inga Sigurðardóttir formaður Kvasir, samtaka símenntunarmiðstöðva, Birna Gunnlaugsdóttir framkvæmdastjóri Framvegis, Ögmundur Jónasson formaður BSRB og Elín Björg Jónsdóttir formaður fræðslunefndar BSRB.

BSRB og Framvegis miðstöð um símenntun, undirrituðu samning um tungumálafræðslu BSRB, í dag, fimmtudaginn 9. desember kl. 13.00, í BSRB-húsinu Grettisgötu 89. Hér er um að ræða afar metnaðarfullt átak í að efla tungumálakunnáttu félagsmanna í BSRB.  Boðið verður upp á námskeið í ensku, dönsku, spænsku, íslensku ritmáli, þýsku og frönsku fyrir félagsmenn BSRB árin 2005 og 2006. Í boði verður bæði einingabært nám fyrir framhaldsskóla, 60 kst. og einnig styttri námskeið þar sem höfuðáhersla verður lögð á talað mál, 30 kst.

Þann 8. október sl. undirrituðu aðilar vinnumarkaðarins á Evrópuvísu, ETUC fyrir hönd verkalýðshreyfingarinnar og UNICE/CEEP af hálfu atvinnurekenda, samning um varnir gegn vinnustreitu (work -related stress) og þarf að gildistaka þennan samning hér á landi. Þarf að hrinda þessum samningi í framkvæmd hér á landi innan þriggja ár frá undirritun hans.

Sjúkraliðafélag Íslands mótmælir "gerræðislegri  ákvörðun ríkisstjórnar og meirihluta Alþingis um að svipta grunnskólakennara lög- og stjórnarskrárbundnum réttindum til að semja um kaup og kjör." Þetta segir m.a. í ályktun sem fjölmennur félagsfundur Sjúkraliðafélags Íslands samþykkti í gær 15. nóvember. Í ályktuninni er einnig skorað á samtök launafólks að taka höndum saman í vörn um samningsrétt launafólks.

Ögmundur Jónasson formaður BSRB og Garðar Hilmarsson formaður Vinnudeilusjóðs BSRB afhentu Kennarasambandi Íslands 20 milljónir króna til ráðstöfunar vegna þeirrar erfiðu vinnudeilu sem staðið hefur yfir. Afhendingin fór fram á aðalfundi Kennarasambandsins á Grand hótel. Flutti Ögmundur kennurum baráttukveðjur frá BSRB og sagði að hér væri ekki aðeins um að ræða þrönga kjarabarátta heldur þjóðfélagsleg átök um skipulag og framtíð velferðarþjónustunnar í landinu. Það var Eiríkur Jónssaon formaður KÍ sem tók við framlaginu.

Starfsmenn undir smásjánni? Rafrænt eftirlit með einstaklingum á vinnustöðum, er yfirskrift málþings sem Vinnueftirlitið, Landlænisembættið, Verzlunarmannafélag Reykjavíkur, Rafiðnaðarsamband Íslands og Rannsóknastofa í vinnuvernd, standa að miðvikudaginn 17. nóvember kl. 8.00 - 10.30 á Grand Hóteli í Reykjavík.

Þjóð í þrengingum - samstöðufundur með Palestínu er yfirskrift fundar sem Félagið Ísland-Palestína í samvinnu við samtök launafólks o.fl. stendur að í Borgarleikhúsinu  mánudagskvöld 15. nóvember kl. 20:00. Halldór Ásgrímsson forsætisráðherra flytur ávarp og Steingrímur Hermannsson fyrrum forsætisráðherra, Jóhanna Kristjónsdóttir blaðamaður, Ögmundur Jónasson formaður BSRB, Sr. Þorbjörn Hlynur Árnason prófastur og Sveinn Rúnar Hauksson, formaður Félagsins Ísland-Palestína flytja stuttar ræður.

.

BSRB stendur fyrir starfslokanámskeiði í BSRB húsinu Grettisgötu 89 dagana 22., 24. og 29. nóvember. Námskeiðið hefst kl. 16.30 og lýkur kl. 19.00. Þátttöku þarf að tilkynna á skrifstofu BSRB í síma 525 8300 fyrir 19. nóvember. Námskeiðið er opið öllum félagsmönnum í BSRB sem búsettir eru á höfuðborgarsvæðinu og mökum þeirra og er þeim að kostnaðarlausu.

BSRB stóð fyrir vel heppnuðum fundi með framkvæmdastjóra og varaformanni EPSU, Evrópusambands starfsfólks í almannaþjónustu, þeim Carola Fischbach-Pyttel og Anne-Marie Perret, þar sem fjallað var um drög að tilskipun um þjónustu á innri markaði ESB. Fram kom í máli þeirra að verkalýðshreyfingin í Evrópu, jafnt á opinbera markaðinum sem á almenna vinnumarkaðinum er mjög andvíg þessari tilskipun enda yrði grundvallarbreyting á velferðarkerfinu í Evrópu ef tilskipunin næði fram að ganga.

Innan BSRB er nú lögð mikil áhersla á umræðu um alþjóðamál og Evrópusambandið "ekki með það fyrir augum að BSRB sem samtök taki afstöðu til hugsanlegrar aðildar Íslands að Evrópusambandinu heldur til þess að félagsmenn og þess vegna samfélagið allt eigi auðveldara með að móta sér skoðun á grundvelli upplýsinga og vitrænnar umræðu. Þá þurfa allir kostir að vera undir," sagði Ögmundur Jónasson formaður BSRB m.a. í ræðu sem hann flutti á ársfundi ASÍ sem nú stendur yfir.

Föstudaginn 29. október kl. 9.15 mun BSRB efna til fundar með framkvæmdastjóra og varaformanni EPSU, Evrópusambands starfsfólks í almannaþjónustu, þeim Carola Fischbach-Pyttel og Anne-Marie Perret. EPSU, Evrópusamband starfsfólks í almannaþjónustu, er málsvari 193 stéttarfélaga og sambanda í 33 löndum Evrópusambandsins og  Evrópska efnahagssvæðisins. EPSU kemur fram fyrir hönd starfsfólks í almannaþjónustu gagnvart valdastofnunum ESB. Meginefni fundarins er hin nýja umdeilda tillaga að tilskipun Evrópusambandsins um Innri markað á sviði þjónustu.

"Draga verður í efa þá fyllyrðingu að nú sé svigrúm til skattalækkana. Enn býr heilbrigðiskerfið við fjársvelti, komugjöld á heilsugæslustöðvar eiga að hækka, innritunargjöld í Háskóla Íslands eiga að stórhækka, sveitarfélögin skortir fjármagn til að greiða starfsmönnum sínum viðunandi laun og áfram mætti telja. Þá hefur einnig verið sýnt fram á að í hagstjórnarlegu tilliti eru skattalækkanir nú afar hæpnar," segir í ályktun stjórnar Starfsmannafélags Reykjavíkurborgar um áform ríkisstjórnarinnar til skattabreytinga. 

Frá blaðamannafundi þar sem könnun Hasla var kynnt. F.v. Elna Katrín Jónsdóttir KÍ, Ögmundur Jónasson BSRB, Halldóra Friðjónsdóttir BHM, Heiður Hrund Jónsdóttir og Kristjana Stella Blöndal frá Félagsvísindastofnun HÍ.

Ef að þú ert karl í fullu starfi og ert jafnaldri konu, sem hefur sömu menntun og þú, vinnur sambærilegt starf og jafnlangan vinnutíma, þá eru mestar líkur á að þú fáir 17% hærri heildarlaun á mánuði en hún. Ef tekinn er raunverulegur launamunur kynjanna, án þess að leiðrétt sé vegna vinnutíma, menntunar, aldurs og starfs, þá eru heildarlaun karla 28% hærri en kvenna. Þessar niðurstöður er að finna í könnun sem HASLA gerði meðal félagsmanna í BSRB, BHM og KÍ sem kynnt var í morgun.

Sjúkraliðafélag Íslands lýsti yfir fyllsta stuðningi við baráttu grunnskólakennara og styrkti verkfallssjóð þeirra um eina milljón króna 11. október sl. þegar baráttufundur kennara stóð yfir í Háskólabíói.

Jens Andrésson formaður SFR og Svala Nordahl varaformaður afhenda Eiríki Jónssyni formanni KÍ styrk vinnudeilusjóðs SFR til kjarabaráttu grunnskólakennara.

Jens Andrésson formaður SFR afhenti grunnskólakennurum 10 milljónir króna í verkfallssjóð kennaranna, en verkfall kennara hefur nú staðið í þrjár vikur. Jafnframt var grunnskólakennurum afhent ályktun stjórnar SFR þar sem eindregnum stuðningi er lýst við kjarabaráttu þeirra. Styrkurinn var afhentur í verkfallsmiðstöð grunnskólakennara í Borgartúni kl. 14. Fjölmenni var í verkfallsmiðstöðinni og hafði Eiríkur Jónsson, formaður KÍ, orð á því að slíkur stuðningur frá félögum í stéttarfélagsbaráttunni væri ómetanlegur.

Málþing Samtaka heilbrigðisstétta (www.heilbrigdisstettir.is) verður haldið í Setrinu á Grand Hótel  14. október 2004 kl. 16:15 til 19:00
Þátttökugjald er 1000. kr. ATH  Málþingið verður túlkað yfir á táknmál

Alþjóða geðheilbrigðisdagurinn verður haldinn lkaugardaginn 9. október og er þema dagsins tengslin milli líkamlegrar og andlegrar heilsu. Boðið er upp á fjölbreytta dagskrá víða í Reykjavík, fyrirlestur um þunglyndi í Háskólabíói,  geðhlaup í Nauthólsvík og göngu frá Hlemmi að Ráðhúsinu þar sem dagskrá verður í Tjarnarsalnum.

Jafnréttisráð stendur fyrir Málþingi um jafnréttisáætlanir á Grand - Hótel 26. október nk. Fjallað verður um gildi jafnréttislaga, jafréttisáætlanir, fyrirtæki og jafnrétti, jafnréttisstefnu Reykjavíkurborgar o.fl.

Samningaviðræður BSRB,BHM og KÍ við ríkið um réttindamál eru hafnar. Samtökin leggja áherslu á að bæta stöðu trúnaðarmanna, tryggingar, bættan veikindarétt, eflingu styrktarsjóða, lífeyrisréttindi, rétt tímavinnufólks, lengingu uppsagnarfrests, vinnuumhverfismál og starfsmannastefnu.

Bresku verkalýðssamtökin, Unison, hafa birt ítarlega skýrslu um einkaframkvæmd sem vakið hefur mikla umræðu í Bretlandi. Einkaframkvæmd (Private Finance Initiative, PFI) byggir á því að einkaaðilar reisa og reka opinberar stofnanir á borð við skóla, sjúkrahús og fangelsi. Á sama tíma og fréttir berast frá íslenskum sveitarfélögum um áhuga á einkaframkvæmd. Ögmundur Jónasson skrifar ítarlega grein um málið á heimasíðu sinni www.ogmundur.is

Kjölur, stéttarfélag starfsfólks í almannaþjónustu, hefur opnað nýja heimasíðu. Slóðin á síðuna er http://kjolur.bsrb.is/ 

Húsfyllir var á menningarhátíð BSRB þegar málverkasýning Valgarðs Gunnarssonar var opnuð í Munaðarnesi laugardaginn 19. júní. Að loknu ávarpi Ögmundar Jónassonar sungu Álftagerðisbræður sig inn í hjörtu áheyrenda og Anna Kristín Arngrímsdóttir las ljóð. Þá var málverkasýningin formlega opnuð og gestum boðið upp á veitingar. Er óhætt að fullyrða að menningarhátíðin hafi tekist með miklum ágætum og segja meðfylgjandi myndir dálitla sögu þar um.

Frá fréttamannafundi þar sem áskorunin var kynnt. F,v. Bjarni Magnússon frá Deiglunni, Huginn Þorsteinsson frá Múrnum, Ögmundur Jónasson formaður BSRB og Jóhanna K. Eyjólfsdóttir formaður Íslandsdeildar Amnesty International. Mynd Bára

 „Við undirrituð skorum á ríkisstjórn Íslands að koma mótmælum á framfæri með formlegum hætti við ríkisstjórn Bandaríkjanna vegna þeirra mannréttindabrota sem nú viðgangast í herstöðinni við Guantanamo flóa á Kúbu,“ segir í áskorun til ríkisstjórnarinnar frá Alþýðusambandi Íslands, BSRB, Deiglunni.com, Íslandsdeild Amnesty International, Múrnum, Sellunni, Skoðun, Tíkinni, Ungum frjálslyndum, Ungum vinstri grænum og Ungum jafnaðarmönnum.  Forsætisráðherra Davíð Oddsson og utanríkisráðherra Halldór Ásgrímsson hafa móttekið áskorunina vegna málefna fanganna í flotastöð Bandaríkjamanna við Guantanamo flóa á Kúbu.
Áskorunin var kynnt á fréttamannafundi í dag 2. júní kl. 14.00. Einnig var kynnt undirskriftasöfnun þessara aðila á vefslóðinni www.skodun.is/undirskrift

Neytendasamtökin halda opinn fund um stöðu neytenda í stækkuðu ESB.  Rasmus Kjeldal forstjóri dönsku neytendasamtakanna – Forbrugerrådet heldur fyrirlestur. Fyrirlesturinn verður fluttur á ensku. Að fyrirlestri loknum eru fyrirspurnir og umræður.

Ónýt - ónýtt starfsorka var yfirskrift ráðstefnu um stöðu miðaldra fólks á vinnumarkaði sem haldin var miðvikudaginn 19. maí. Þeir sem stóðu að ráðstefnunni voru Vinnumálastofnun og aðilar vinnumarkaðarins, þar á meðal BSRB auk Landssamtaka lífeyrissjóða.

Erna Guðmundsdóttir hdl, lögfræðingur BSRB

Fjölmennur fundur BSRB, BHM og KÍ, sem haldinn var í BSRB húsinu 13. maí samþykkti ályktun þar sem breytingum á lögum um réttindi og skyldur starfsmanna ríkisins var harðlega mótmælt. Í ályktuninni segir m.a. að verði frumvarpið samþykkt sé verið að hverfa aftur til forneskjulegra stjórnarhátta þar sem geðþótti og einhliða hagsmunir húsbænda réðu. Einnig er bent á að með þessu sé verið að setja komandi kjarasamninga í uppnám.

BSRB, BHM og KÍ efna til fundar um yfirvofandi breytingar á ráðningarréttindum starfsmanna ríkisins fimmtudaginn 13. maí kl. 17.00 í BSRB-húsinu Grettisgötu 89. Með frumvarpinu um breytingar á lögum um réttindi og skyldur starfsmanna ríkisins er verið að afnema grundvallaratriði um starfsöryggi starfsmanna ríkisins en megintilgangur frumvarpsins er að gera forstöðumönnum ríkisstofnana auðveldara en nú er að segja starfsmönnum upp störfum.

Það er afdráttarlaus niðurstaða Görans Dahlgrens, prófessors og sérfræðings á sviði lýðheilsumála, að einkarekstur sjúkrahúsa sé dýrari en opinber rekstur. Þetta kom fram í fyrirlestri hans á ráðstefnu BSRB 5. maí s.l. um heilbrigðismál þar sem hann varaði eindregið við einkavæðingu á þessu sviði, sem og málflutningi þeirra sem vilja koma heilbrigðisþjónustunni í hendur einkafyrirtækja.

Ögmundur Jónasson formaður BSRB, gagnrýndi ríkisstjórnina harðlega, í ræðu sem hann flutti í Höfn á Hornafirði í tilefni af 1. maí, baráttudegi verkalýðshreyfingarinnar. Hann sagði að ríkisstjórnin hefði sýnt með verkum sínum, að hún hugsaði meira um hag fjármálamanna en almennings. Hvatti hann til samstöðu innan verkalýðshreyfingarinnar og varðstöðu um hag öryrkja og atvinnulausra. Hann gagnrýndi ennfremur frumvarp ríkisstjórnarinnar sem liggur fyrir Alþingi og kæmi til með að veita stjórnendum, rétt til að reka fólk úr starfi skýringalaust. Rauði þráðurinn í ræðu formanns BSRB, var þó gagnrýni á það sem hann kallaði eftirlitsþjóðfélagið. Hann sagði það góðra gjalda vert að stuðla að samkeppni þar sem hún ætti við en með einkavæðingu samfélagsþjónustunnar væri jafnt og þétt dregið úr lýðræðislegum áhrifum í þjóðfélaginu.

Göran Dahlgren hefur síðan á níunda áratugnum verið áhrifamaður á alþjóðavettvangi á sviði heilbrigðis, – heilsugæslu, – og lýðheilsumála. Bók hans „Hjúkrunarmarkaður framtíðarinnar – hverjir vinna og hverjir tapa?“ sem kom út 1994 vakti mikla athygli, en þar dregur hann upp mynd af samspili heilbrigðiskerfisins og markaðarins. Honum hlotnuðust Norrænu lýðheilsuverðlaunin árið 2003 en í úrskurði dómnefndar sagði að framlag hans hefði brotið blað á sviði jafnréttismála, aðferðafræði, stefnumótunar og skoðanamyndunar í nútíma lýðheilsustarfi.

Lögfræðideild Viðskiptaháskólans á Bifröst stendur fyrir ráðstefnu um Tvískiptingu íslensks vinnumarkaðar föstudaginn 16. apríl 2004 í Hriflu á Bifröst. Ráðstefnan er í samstarfi við ASÍ, BSRB, SA og Starfsmannaskrifstofu fjármálaráðuneytis. Aðgangur er ókeypis og öllum heimill. Meðal fyrirlesara eru Erna Guðmundsdóttir lögfræðingur BSRB, Magnús Nordahl lögfræðingur ASÍ, Þórhallur Vilhjálmsson lögfræðingur starfsmannaskrifstofu fjármálaráðuneytisins, Hrafnhildur Stefánsdóttir lögfræðingur SA, Ástráður Haraldsson dósent við lögfræðideild Viðskiptaháskólans á Bifröst og Kristín Benediktsdóttir aðstoðarmaður hæstaréttardómara.

Heilbrigðiskerfið - Virkni, skilvirkni, jöfnuður, virðing er yfirskrift ráðstefnu á vegum Blindrafélagsins, Félags aðstandenda Alzheimersjúklinga, Geð­hjálpar, Geðverndarfélags Íslands, Gigtarfélags Íslands, Heyrnarhjálpar, Lands­sam­takanna Þroska­­hjálpar og Umsjónarfélags einhverfra í samstarfi við LSH, Landlæknis­embætti og Félagsmálaráðuneytið, sem haldin verður fimmtudaginn 1. apríl kl. 13.00 í Hringsal Landsspítala Háskólasjúkrahúsi v/Hringbraut (gengið inn við Barnaspítalann). Ráðstefnan er öllum opin en heilbrigðsstarfsfólk er einkum hvatt til að koma.

Fyrsti hópurinn í forystufræðslu BSRB útskrifaðist 24. mars. Námið hófst vorið 2003 og kom hópurinn þrisvar saman í Munaðarnesi á tímanum en stundaði fjarnám þess á milli. Staðbundna námið var í þrjá daga í hvert skipti. Var megin áhersla lögð á samningatækni, ræðumennsku, sjálfseflingu, verkefnastjórnun og samvinnuhæfni stjórnenda.

„Eins og við mátti búast hefur lífeyrisumræða síðustu daga orðið til þess að Pétur H.Blöndal og aðrir andstæðingar samtryggingarlífeyrissjóða eru komnir á kreik. Í  sunnudagsútgáfu Fréttablaðsins gerir hann harða hríð að lífeyrissjóðum starfsmanna ríkis og sveitarfélaga. Pétur H.Blöndal skal af þessu tilefni minntur á, að menn skyldu hugsa sig tvisvar um áður en lagt er til atlögu gegn starfsmönnum ríkis og sveitarfélaga og reynt að hafa þeim lífeyrisréttindin eins og hann leggur til,“ segir í inngangi greinar eftir Ögmund Jónasson formann BSRB á heimasíðu hans og nefnist Villandi umræða um lífeyrismál.

Formenn heildarsamtaka starfsmanna í almannaþjónustu komu saman til fundar ásamt öðrum kjörnum fulltrúum og sérfræðingum í alþjóðamálum fimmtudaginn 4. mars í húsakynnum BSRB. Fundir af þessu tagi eru haldnir árlega en á þeim bera menn saman bækur sínar og samræma áherslur eftir því sem við á. Á fundinum núna var fjallað um almannaþjónustuna og skipulagsbreytingar innan hennar.

Opinn fundur mánudaginn 8.mars 2004  kl.17 í BSRB-salnum, Grettisgötu 89 í tilefni alþjóðadags kvenna fyrir friði og jafnrétti. Boðið er upp á fjölbreytta dagskrá. Eftirtaldir aðilar standa að fundinum: Menningar- og friðarsamtök ísl. kvenna, Bandalag háskólamanna, BSRB, Barnaheill, Félag ísl. hjúkrunarfræðinga, Kennarasamband Íslands, Kvennakirkjan, Kvennasögusafn Íslands, Kvenréttindafélag Íslands, Mannréttindaskrifstofa Íslands, Sjúkraliðafélag Íslands, Starfsmannafélag Reykjavíkurborgar, Samtök kvenna af erlendum uppruna, Starfsmannafélag ríkisstofnana, Stígamót, Upplýsing, Vera, Öryrkjabandalag Íslands.

Það vakti eðlilega mikla athygli þegar Guðmundur Þóroddsson forstjóri Orkuveitu Reykjavíkur staðhæfði opinberlega að mestar líkur væru á því að raforkuverð til Reykvíkinga myndi hækka á milli 20-30% yrði álit meirihluta 19 manna nefndarinnar að veruleika. Orkustofnun hefur í dag sent frá sér eigin útreikninga á því hverjar hugsanlegar breytingar verði á raforkuverði í kjölfar nýrra raforkulaga og niðurstöðu þessarar sömu 19 manna nefndar. Er skemmst frá því að segja að Orkustofnun álítur að að hækkun á svæði OR nemi 1% (ekki 30%), hækkun hjá Hitaveitu Suðurnesja verði 2,5% , hækkun hjá Orkubúi Vestfjarða verði 1,5%, Norðurorka hækki um 1,4% en lækkun verði hjá Rarik upp á 2,6%. Hér er að vísu gert ráð fyrir 3% arðsemismörkum, sem eiga að gilda fyrstu fimm árin, en ekki 6% eins og reyndin á að verða, þó svo að margir reikni með að þau arðsemismörk eigi eftir að hækka enn frekar.

„Hagræðingaraðgerðir í mjólkuriðnaðinum hafa skilað umtalsverðum árangri sem að stærri hluta hefur farið til innleggjenda.  Til að tryggja samkeppnisstöðu mjólkurvaranna er nauðsynlegt að neytendur njóti í meira mæli þessa ávinnings.  Stuðla má að slíkri þróun með þeim aðhaldsskilyrðum sem fjallað er um í verðlagningarkaflanum hér að ofan, og eðlilegt er að fulltrúar samtaka launafólks komi þar að ásamt fulltrúum ríkisins og atvinnugreinarinnar, sbr. núverandi skipan Verðlagsnefndar,“ segir m.a. í skýrslu sem nefnd á vegum landbúnaðarráðherra um stefnumótun í landbúnaðarframleiðslu hefur sent frá sér. Fulltrúi BSRB í nefndinni er Elín Björg Jónsdóttir formaður FOSS.

BSRB leggst gegn frumvarpi til laga um hlutastörf eins og það liggur nú fyrir Alþingi. Með frumvarpinu er verið að innleiða tilskipun um hlutastörf og er markmiðið að uppræta mismunun gagnvart launþegum í hlutastörfum og til að auka möguleika á hlutastörfum á forsendum sem eru viðunandi fyrir bæði atvinnurekendur og starfsmenn. Frumvarpið er ekki látið ná til starfsmanna sem fá greitt fyrir vinnu sína með tímavinnukaupi. BSRB hefur harðlega mótmælt þessu og telur að þessi undanþága brjóti gegn tilskipun EES um hlutastörf.

Heildarsamtökin BSRB og ASÍ hafa sent frá sér sameiginlegt sérálit vegna starfa 19 manna nefndarinnar svokölluðu, en hún var skipuð af Valgerði Sverrisdóttur iðnaðarráðherra til að gera tillögur um tilhögun á flutningi raforku um aðalflutningskerfi og dreifiveitur landsins. Afstaða ASÍ og BSRB til þessa máls byggist á þeirri grundvallarsýn að vatns- og gufuorka sem nýtist til raforkuframleiðslu sé auðlind sem allir landsmenn eigi rétt á að njóta sameiginlega og með sem jöfnustum hætti. Lög sem snerta nýtingu þessarar auðlindar verða því að taka mið af þessu grundvallarsjónarmiði.

Hæstiréttur sýknaði Landsbankann hf. af kröfum tveggja starfsmannanna bankans til biðlauna og komst þar að annarri niðurstöðu en héraðsdómur. Niðurstaða Hæstaréttar veldur vonbrigðum. Að mati BSRB var löggjafinn að tryggja þau réttindi sem starfsmenn Landsbanka Íslands og Búnaðarbanka Íslands höfðu áunnið sér þegar bönkunum var breytt í hlutafélag með 8. gr. og 10. gr. laga nr. 50/1997.  Þykir BSRB það hart að verið sé að hafa af starfsmönnunum áunninn rétt. Hefði þurft að taka það sérstaklega fram í lögunum að starfsmennirnir ættu ekki rétt til biðlauna tækju þeir starfi hjá Landsbanka Íslands hf.

Almannahagur í húfi - Krefjumst endurskoðunar á fjárveitingum til LSH, er yfirskrift opins fundar um málefni Landspítalans Háskólasjúkrahúss sem haldinn verður í Austurbæ þriðjudaginn 27. janúar kl. 17.00. Aðstandendur fundarins eru Geðhjálp, Landssamband eldri borgara, Landssamtök hjartasjúkra, Umhyggja, Öryrkjabandalag Íslands, ASÍ, BHM, BSRB og Læknafélag Íslands.

"Stjórn BSRB mótmælir harðlega þeirri stefnu ríkisstjórnarinnar að þröngva LSH til niðurskurðar á þeirri þjónustu sem spítalinn veitir landsmönnum," segir m.a. í ályktun sem samþykkt var á stjórnarfundi 16. janúar. 

Fyrir áramót tókst samkomulag á milli BSRB, BHM, KÍ og SÍB um stofnun Hagrannsóknarstofnunar samtaka launafólks í almannaþjónustu, HASLA. HASLA er ætlað að stuðla að því að hagrannsóknir og aðrar rannsóknir í þágu og frá sjónarhóli launafólks í almannaþjónustu séu stundaðar reglulega með stuðningi ríkisins þannig að betra jafnvægi náist í upplýsingastreymi og þjóðfélagsumræðu.