Það vakti eðlilega mikla athygli þegar Guðmundur Þóroddsson forstjóri Orkuveitu Reykjavíkur staðhæfði opinberlega að mestar líkur væru á því að raforkuverð til Reykvíkinga myndi hækka á milli 20-30% yrði álit meirihluta 19 manna nefndarinnar að veruleika. Orkustofnun hefur í dag sent frá sér eigin útreikninga á því hverjar hugsanlegar breytingar verði á raforkuverði í kjölfar nýrra raforkulaga og niðurstöðu þessarar sömu 19 manna nefndar. Er skemmst frá því að segja að Orkustofnun álítur að að hækkun á svæði OR nemi 1% (ekki 30%), hækkun hjá Hitaveitu Suðurnesja verði 2,5% , hækkun hjá Orkubúi Vestfjarða verði 1,5%, Norðurorka hækki um 1,4% en lækkun verði hjá Rarik upp á 2,6%. Hér er að vísu gert ráð fyrir 3% arðsemismörkum, sem eiga að gilda fyrstu fimm árin, en ekki 6% eins og reyndin á að verða, þó svo að margir reikni með að þau arðsemismörk eigi eftir að hækka enn frekar.

„Hagræðingaraðgerðir í mjólkuriðnaðinum hafa skilað umtalsverðum árangri sem að stærri hluta hefur farið til innleggjenda.  Til að tryggja samkeppnisstöðu mjólkurvaranna er nauðsynlegt að neytendur njóti í meira mæli þessa ávinnings.  Stuðla má að slíkri þróun með þeim aðhaldsskilyrðum sem fjallað er um í verðlagningarkaflanum hér að ofan, og eðlilegt er að fulltrúar samtaka launafólks komi þar að ásamt fulltrúum ríkisins og atvinnugreinarinnar, sbr. núverandi skipan Verðlagsnefndar,“ segir m.a. í skýrslu sem nefnd á vegum landbúnaðarráðherra um stefnumótun í landbúnaðarframleiðslu hefur sent frá sér. Fulltrúi BSRB í nefndinni er Elín Björg Jónsdóttir formaður FOSS.

BSRB leggst gegn frumvarpi til laga um hlutastörf eins og það liggur nú fyrir Alþingi. Með frumvarpinu er verið að innleiða tilskipun um hlutastörf og er markmiðið að uppræta mismunun gagnvart launþegum í hlutastörfum og til að auka möguleika á hlutastörfum á forsendum sem eru viðunandi fyrir bæði atvinnurekendur og starfsmenn. Frumvarpið er ekki látið ná til starfsmanna sem fá greitt fyrir vinnu sína með tímavinnukaupi. BSRB hefur harðlega mótmælt þessu og telur að þessi undanþága brjóti gegn tilskipun EES um hlutastörf.

Heildarsamtökin BSRB og ASÍ hafa sent frá sér sameiginlegt sérálit vegna starfa 19 manna nefndarinnar svokölluðu, en hún var skipuð af Valgerði Sverrisdóttur iðnaðarráðherra til að gera tillögur um tilhögun á flutningi raforku um aðalflutningskerfi og dreifiveitur landsins. Afstaða ASÍ og BSRB til þessa máls byggist á þeirri grundvallarsýn að vatns- og gufuorka sem nýtist til raforkuframleiðslu sé auðlind sem allir landsmenn eigi rétt á að njóta sameiginlega og með sem jöfnustum hætti. Lög sem snerta nýtingu þessarar auðlindar verða því að taka mið af þessu grundvallarsjónarmiði.

Hæstiréttur sýknaði Landsbankann hf. af kröfum tveggja starfsmannanna bankans til biðlauna og komst þar að annarri niðurstöðu en héraðsdómur. Niðurstaða Hæstaréttar veldur vonbrigðum. Að mati BSRB var löggjafinn að tryggja þau réttindi sem starfsmenn Landsbanka Íslands og Búnaðarbanka Íslands höfðu áunnið sér þegar bönkunum var breytt í hlutafélag með 8. gr. og 10. gr. laga nr. 50/1997.  Þykir BSRB það hart að verið sé að hafa af starfsmönnunum áunninn rétt. Hefði þurft að taka það sérstaklega fram í lögunum að starfsmennirnir ættu ekki rétt til biðlauna tækju þeir starfi hjá Landsbanka Íslands hf.