Endurnýjaðir hafa verið sófar í öllum orlofshúsum BSRB í Munaðarnesi, Stóru Skógum og á Eiðum. Þetta eru glæsilegir hornsófar úr leðri. Heitir pottar eru nú við öll húsin í Munaðarnesi og Stóru Skógum og hefur aðsókn því aukist mikið. Við minnum á að hægt er að leigja húsin um helgar á haustin og vorin.

"Stjórn BSRB lýsir eindregnum stuðningi við kjarabaráttu kennara og sendir Kennarasambandi Íslands baráttukveðjur. Brýnt er að samningar takist hið allra fyrsta því langvinnt verkfall getur haft alvarlegar afleiðingar fyrir alla hlutaðeigandi," segir í ályktun sem stjórn BSRB samþykkti á fundi í dag. Jafnframt var samþykkt ályktun þar sem lýst var stuðningi við Sjómannasamband Íslands í kjaradeilu sjómanna og varað við tilraunum útgerðamanna til að sundra samstöðu sjómanna með samningum á bak við samtök þeirra.

"En í ljósi söginnar og þeirrar stöðu sem LÍÚ er nú í gagnvart sjómönnum má hverju barni vera ljóst að kjarasamningurinn sem nú hefur verið gerður á bak við Sjómannasambandið er ekki gerður án vitundar og samþykkis heildarsamtaka útvegsmanna. Hann er gerður í skjóli þeirra og á ábyrgð þeirra: Á ábyrgð LÍÚ. Út frá þessu má ganga nema fram komi mjög hörð viðbrögð frá samtökum útvegsmanna," segir m.a. í harðorðri grein Ögmundar Jónassonar formanns BSRB á heimasíðu hans.

Að venju býður Félagsmálaskóli alþýðu upp á fjölbreytt námskeið haustið 2004. Meðal annars er boðið upp á namskeið fyrir trúnaðarmenn, námskeið um fjölþjóðlega menningu á vinnustað, ensku vinnumarkaðarins, velferðarkerfi verkalýðshreyfingarinnar o.fl.

Trúnaðarmannaráð SFR samþykkti einróma kröfugerð félagsins fyrir komandi kjarasamninga , en kjarasamningar eru lausir frá og með 1. desember nk. Megináherslan er á 150.000 kr. lágmarkslaun og fjölskylduvæna kjarasamninga sem birtist í kröfu um styttingu vinnuvikunnar, aukinn rétt vegna veikinda barna o.fl. Einnig er lögð sérstök áhersla á að launamismunur kvenna og karla verði leiðréttur.