Stjórn og trúnaðarráðs Félags opinberra starfsmanna á Suðurlandi sem haldinn var í dag skorar á sveitar- og bæjarstjórnir á Suðurlandi að endurskoða það umboð sem þær hafa falið Launanefnd sveitarfélaga til samningsgerðar við félagið.

11 handhafar friðarverðlauna Nóbels hvöttu í gær þjóðir heims til að virða ákvæði mannréttindasáttmála Sameinuðu þjóðanna og viðurkenna að fullu og verja rétt launafólks til að stofna verkalýðsfélög og gera kjarasamninga. Meðal  friðarverðlaunahafanna eru Jimmy Carter fyrrum forseti Bandaríkjanna, Desmond Tutu erkibiskup í Suður Afríku og Lech Walesa fyrrum forseti Póllands. Yfirskrift yfirlýsingarinnar er: Alþjóðlegt ákall fyrir mannréttindum á vinnustöðum.

Landssamband eldri borgara samþykkti á stjórnarfundi í gær, fimmtudaginn 24. nóvember 2005, að gera undirskriftaraðili að yfirlýsingunni Vatn fyrir alla. Þar með hafa 13 samtök á landsvísu skrifað undir yfirlýsinguna.

David Hall, prófessor við háskólann í Greenwich í Englandi, heldur erindi um rannsóknir á afleiðingum einkavæðingar á vatnsveitum. Fyrirlesturinn verður  kl. 09:00 til 10:30 að Hótel Loftleiðum föstudaginn 18. nóvember nk. David Hall er forstöðumaður deildar við háskólann í Greenwich sem hefur sérhæft sig í rannsóknum á mismunandi rekstrarformum innan almannaþjónustunnar.

Þau samtök sem stóðu að ráðstefnunni Vatn fyrir alla eru nú að undirbúa auglýsingaherferð til að fylgja eftir sameiginlegri yfirlýsingu samtakanna. Frá því að ráðstefnan var haldin hefur Ungmennafélag Íslands bæst í hóp þeirra samtaka sem undirritað hafa yfirlýsinguna og von er á að fleiri samtök geri það.

       
BSRB hvetur allar konur til að taka þátt í baráttudegi kvenna 24. október  í tilefni 30 ára afmælis kvennafrídagsins. 

Dönskunámskeið hefst mánudaginn 24. október á vegum tungumálafræðslu BSRB. Námskeiðið er haldið af Framvegis símenntunarmiðstöð. Námskeiðið er fyrir fólk sem hefur nokkra undirstöðukunnáttu í dönsku en vill treysta grunninn og byggja ofan á hann.

Baráttuhátíð verður haldin þann 24. október næstkomandi í tilefni af því að þá verða þrjátíu ár liðin frá kvennafrídeginum árið 1975. Heildarsamtök launafólks (ASÍ, BHM, BSRB, KÍ) og mörg kvennasamtök standa saman að undirbúningi og framkvæmd dagsins. Kröfuganga verður farin frá Skólavörðuholti að Ingólfstorgi og er mæting í hana klukkan 15.00. Yfirskrift göngunnar er “Konur höfum hátt”. Baráttufundur verður síðan á Ingólfstorgi klukkan 16:00 með stuttum hvatningaræðum og menningardagskrá.

Atkvæðagreiðsla um kjarasamning milli Starfsmannafélags Akraness og Launanefndar sveitarfélaga sem undirritaður var s.l. laugardag fór fram 11. og 12. október. Samningurinn var samþykktur með 51% atkvæða og yfirvofandi verkfalli því aflýst.

Föstudaginn 7. október var haldinn fjölmennur félagsfundur sjúkraliða sem starfa á stofnunum sem tilheyra Samtökum fyrirtækja í heilbrigðisþjónustu. Þar var eftirfarandi ályktun samþykkt:

Kjarasamningur Starfsmannafélags Akraness við Launanefnd sveitarfélaga vegna starfsmanna Akranessbæjar var kolfelldur í atkvæðagreiðslu sem lauk í gær. 75% þeirra sem greiddu atkvæði sögðu nei. Félagið hafði frestað áður boðuðu verkfalli til 9. október og stefnir því í að verkfall skelli á nk. sunnudag.

Kvenréttindafélag Íslands hélt málþing 29. september þar sem misjöfn staða kynjanna í atvinnulífinu var til umræðu. Í fyrsta sinn í sögu KRFÍ voru allir frummælendur karlkyns. Jens Andrésson formaður SFR, stéttarfélags í almannaþágu gerði grein fyrir þeirri áherslu SFR að útrýma óútskýrðum kynbundnum launamun í kjarasamningum. Samkvæmt könnunum hefði sá munur verið um 14% konum í óhag og stjórn SFR hafi talið að það væri ótækt og því þyrfti að grípa til gagngerra aðgerða. Samið hefði verið um að verulegir fjármunir yrðu til taks til að leiðrétta þennan mun og til þess að það mætti gera með sem raunhæfustum hætti, hefði m.a. annars verið samið við Jafnréttisstofu um samvinnu, rannsóknir og útfærslur. Farið yrði að krafti í þessa vinnu og að lokinni frekari rannsóknarvinnu yrði þessi munur jafnaður eins og hægt væri strax á næsta ári. Ef niðurstöður sýndu að þessari vinnu lokinni að árangur hefði ekki náðst að fullu á þeim tímapunkti, væri búið að semja um að halda vinnunni áfram árið 2007. Sagði Jens að vonir stæðu til að hér væri komin aðferð sem aðrir aðilar í þjóðfélaginu gætu tekið til fyrirmyndar.

BSRB hefur undanfarið fengið fyrirspurnir  varðandi rétt starfsmanna til að fá afturvirka leiðréttingu úr Fæðingarorlofssjóði vegna greiðslna úr starfsmati. M.ö.o hvort að útreikningur sem notaður var til grundvallar þegar starfsmaður fór í fæðingarorlof verði leiðréttur til hækkunar vegna starfsmatsins, þrátt fyrir að viðkomandi starfsmaður hafi verið búinn í fæðingarorlofi þegar leiðrétting á launum kom til framkvæmda.

Frá undirritun samningsins.

Nýr kjarasamningur Launanefndar sveitarfélaga og Starfsmannafélags Suðurnesja var undirritaður föstudaginn 9. september. Samningurinn gildir til 30. nóvember 2008 og nær til um 450 starfsmanna sveitarfélaga og stofnana á Suðurnesjum. Við lok samningstímans verður kostnaðarauki sveitarfélaganna um 22% sem er sambærilegt við aðra samninga á opinberum vinnumarkaði. 

"Nú hefur BSRB látið útbúa hvít armbönd með áletruninni; Brúum bilið – Öflug almannaþjónusta er undirstaða velferðar – BSRB.  Armbandið kostar ekki neitt, en með því að ganga með það sýna menn átakinu stuðning. Hefur alheimsherferðin gegn fátækt tekið upp kröfuna um öfluga almannaþjónustu, sem lykilþátt í að berjast gegn fátækt og fyrir velferð," segir m.a. í grein eftir Ögmund Jónasson formann BSRB sem birtist í Morgunblaðinu 10. septeber og er nú að finna á heimasíðu Ögmundar.

Anna Ólafsdóttir tekur við viðurkenningarskjali fyrir sigurinn

Forskot var tekið á sæluna á golfvellinum við Glanna í Borgarfirði í gær fimmtudaginn 25. ágúst með óformlegu móti sem 20 manns tóku þátt í. Golfvöllurinn við Glanna er 9 holu völlur og verður formlega opnaður næsta vor í Borgarfirði. Völlurinn hefur fengið nafnið Glanni og er staðsettur milli þjóðvegar og Norðurár, við fossinn Glanna. Aðkoman er rétt sunnan Viðskiptaháskólans að Bifröst. Sigurvegari á mótinu í gær var Anna Ólafsdóttir sem er fyrrum stjórnarmaður í BSRB og stjórnarformaður Starfsmannafélags Borgarbyggðar áður en félagið sameinaðist öðrum félögum í Kili.

Kjölur, stéttarfélag starfsmanna í almannaþjónustu, hefur samið við Samtök atvinnulífsins vegna starfsmanna Norðurorku hf. Samningurinn er á svipuðum nótum og aðrir samningar á almenna vinnumarkaðinum en með samningnum er jafnframt tryggt að félagsmenn Kjalar halda öllum réttindum sem þeir höfðu sem opinberir starfsmenn áður en Norðurorka var einkavædd.

Starfsmannafélag Kópavogs undirritaði nýjan kjarasamning við Launanefnd sveitarfélaga 1. júlí sl.  Samningurinn er sá sami og samflotsfélögin undirrituðu, en með viðbótarsamkomulagi sem gert var við  bæjaryfirvöld í Kópavogi.  Samningurinn verður borinn undir atkvæði félagsmanna síðar í mánuðinum.

Davíð Odsson utanríkisráðherra tekur við hvíta bandinu af formanni og varaformönnum BSRB.

Davíð Oddsson utanríkisráðherra tók í dag við ályktun stjórnar BSRB þar sem stjórnvöld og almenningur eru hvattur til að taka virkan þátt í að brúa þá gjá sem er á milli ríkra og snauðra. Það voru Ögmundur Jónasson formaður BSRB, Sjöfn Ingólfsdóttir og Jens Andrésson varaformenn bandalagsins sem afhentu utanríkisráðherra ályktunina. Einnig var honum afhent hvítabandið sem verkalýðshreyfingin um allan heim setur upp í dag en á það er letrað: "bridge the powerty gaps" eða brúum fátæktarbilið.

Alþjóðasamtök starfsmanna í almannaþjónustu, Public Services International , PSI, sem BSRB er aðili að, og Alþjóðasamband frjálsra verkalýðsfélaga, ICFTU, eru hluti af gríðarstórri og öflugri hreyfingu um allan heim gegn fáttækt Global Call to Action Against Poverty. Að þeirri hreyfingu standa mörg hundruð frjálsra félagasamtaka og verkalýðsfélaga, en hreyfingin nýtir lykilatburði á alþjóðavettvangi, eins og t.d. fund G8- ríkjanna núna, til að draga athygli heimsins að nauðsyn þess að útrýma fátækt og ná settum Þúsaldamarkmiðum Sameinuðu þjóðanna, með meiri og betri þróunarhjálp, afnámi skulda og sanngjörnum viðskiptum.

Fjölmenni var á fundi BSRB í gær og hlýddi þar á kraftmikið erindi Hans Engelberts framkvæmdastjóra PSI þar sem hann ræddi helstu baráttumál Alþjóðasamtaka starfsfólks í almannaþjónustu og hvernig baráttan fyrir bættri almannaþjónustu tengist baráttunni gegn fátækt, fyrir réttinum til að vera í verkalýðsfélagi og fyrir jafnrétti í heiminum.

Starfsmannafélag Hafnarfjarðar og launanefnd sveitarfélaga náðu samkomulagi um nýjan kjarasamning 17. júní sl. Samningurinn og bókanir eru á sömu nótum og samningur sá er gerður var við Samflot bæjarstarfsmanna í lok maí. Almenn kynning á samningnum  verður fyrir félagsmenn STH í Álfafelli Íþróttahúsinu við Strandgötu n.k. þriðjudag kl 12:00.

Veðurblíðunar notið í Munaðarnesi.

Nokkur orlofshús eru laus í Munaðarnesi og á Eiðum vikuna 17. - 24. júní. Hægt er að panta húsin með því að hafa samband við skrifstofu BSRB í síma 525 8300. Fyrstur kemur fyrstur fær.

Starfsmenn sveitarfélaga í Kili, stéttarfélagi starfsmanna í almannaþjónustu, hafa samþykkt kjarasamning við Launanefnd sveitarfélaga með 69% greiddra atkvæða Alls tóku 62% félagsmenn þátt í atkvæðagreiðslunni. Á kjörskrá voru 537 þar af kusu 332, já sögðu 230 eða 69% nei sögðu 75 eða 23% auðir og ógildir seðlar 27  eða  8%.

Ögmundur Jónasson, Anna Hrefnudóttir og Þorsteinn frá Hamri við eitt verka Önnu.

Menningarhátíð BSRB var haldin í Munaðarnesi sl. laugardag. Fjölmenni var á hátíðinni enda skartaði Borgarfjörður sínu fegursta í glampandi sól og hita. Góður rómur var gerður að söng Skagfirsku söngsveitarinnar og upplestri Þorsteins frá Hamri á ljóðum sínum. Síðan var opnuð sýning á verkum Önnu Hrefnudóttur. Í sýningarskrá segir að þetta sé hluti af flokki mynda sem myndlistarkonan er að vinna að og nefnist hann Stefnumót.

Páll H. Hannesson alþjóðafulltrúi BSRB kynnti tillögu BSRB um breytingu á stjórnarskrá Íslands á málþingi sesm haldið var sl. laugardag á vegum stjórnarskrárnefndar. Stjórn BSRB hefur lagt þá tillögu fyrir stjórnarskrárnefnd að aðgangur að drykkjarvatni teljist mannréttindi og að eignarhald á vatni skuli jafnan vera samfélagslegt og skuli það bundið í stjórnarskrá lýðveldisins. BSRB skírskotar beint til samþykktar Sameinuðu þjóðanna frá árinu 2002 og er Ísland aðili að henni. Samkvæmt henni telst aðgangur að vatni til grundvallarmannréttinda. Sérhver maður skal þess vegna eiga rétt á og vera tryggður nægilegur og öruggur aðgangur að hreinu drykkjarvatni á viðráðanlegu verði, auk vatns til hreinlætis og heimilishalds. Fara skal með vatn sem félagsleg og menningarleg gæði, en ekki skal litið á vatn sem hverja aðra verslunarvöru. Þess skal gætt að framkvæmd sé sjálfbær og þannig tryggt að réttindin megi raungera fyrir kynslóðir nútíðar sem og framtíðarinnar. Það er skylda stjórnvalda að tryggja þegnum sínum þennan rétt án mismununar. Það er því ljóst að íslensk stjórnvöld hafa hér tekið sér skyldur á herðar.

Landssamband lögreglumanna samþykkti kjarasamning sambandsins við fjármálaráðherra með 64% greiddra atkvæða gegn tæpu 31% greiddra atkvæða. Auðir seðlar og og ógildir voru rúm 5%. Þátttaka í atkvæðagreiðslunni var rúm 60%.Talningu atkvæða lauk á hádegi í dag en samningurinn var undirritaður 30. apríl sl.

Tollvarðafélag Íslands undirritaði nýjan kjarasamning í gærkvöldi. Er hann á svipuðum nótum og hjá öðrum sem völdu BHM leiðina. Gildistími hans er til 31. október 2008.

Ljáðu mér eyra.
Árleg Menningarhátíð BSRB í Munaðarnesi verður haldin laugardaginn 11. júní. Á hátíðinni verður opnuð myndlistarsýning Önnu Hrefnudóttur. Skagfirska söngsveitin mun syngja og Þorsteinn frá Hamri lesa upp. Ávarp flytur Ögmundur Jónasson formaður BSRB. Menningarhátíðin hefst kl. 14.00 og er opin öllum. Aðgangur er ókeypis og er boðið upp á veitingar.

Vatn, einkavæðing og mannréttindi var yfirskrift fyrirlesturs sem Páll H. Hannesson alþjóðafulltrúi BSRB hélt á vegum Snarrótar í gær 31. maí. Í fyrirlestrinum rakti Páll reynslu annarra þjóða af einkavæðingu vatnsveitna og baráttu alþjóðahreyfingar verkafólks fyrir því að vatn verði samþykkt sem sjálfsögð mannréttindi. Hann greindi frá erindi BSRB til stjórnarskrárnefndar um að í endurskoðaðri stjórnarskrá yrði ákvæði um að líta beri á drykkjarvatn sem mannréttindi en ekki sem verslunarvöru.

Kjölur og flest starfsmannafélögin í Samflotinu skrifuðu undir nýjan kjarasamning við Launanefnd sveitarfélaga á miðnætti í gær. Starfsmannafélög Hafnarfjarðar, Kópavogs og Akraness slitu hins vegar viðræðum við Launanefndina á laugardeginum. Samningurinn sem undirritaður var felur í sér sambærilegan  kaupmátt og aðrir kjarasamningar sem hafa verið gerðir á þessu vori. Gildistími er 1. apríl 2005 til 30. nóvember 2008 og tekur við af eldri samningum sem runnu út 31. mars sl.

Grétar Þorsteinsson forseti ASÍ, Oddur Friðriksson yfirtrúnaðarmaður á Kárahnjúkum og Ögmundur Jónasson formaður BSRB.

NFS, Norræna verkalýðssambandið, hélt stjórnarfund á Íslandi í síðustu viku. Í tengslum við fundinn var farið í heimsókn að Kárahnjúkum og framkvæmdirnar þar skoðaðar. Leiðsögumaður í ferðinni var Oddur Friðriksson yfirtrúnaðarmaður á svæðinu, en mikið hefur mætt á honum frá upphafi framkvæmdanna.

1. maí ávarp fulltrúaráðs verkalýðsfélaganna í Reykjavík, BSRB, BHM, KÍ og INSÍ:

Stéttarfélög hafa sjaldan haft mikilvægara hlutverki að gegna en í dag né hafa verkefni þeirra verið umfangsmeiri. Ef litið er til þeirra þjóðfélagslegu breytinga sem átt hafa sér stað á síðustu árum, þá verður þetta vaxandi hlutverk stéttarfélaga ljóst: Alheimsvæðingin, aukin markaðsvæðing, samfara stórefldum styrk fjármagnseigenda þar sem valdið hleðst sífellt á færri hendur um leið og það teygir sig út fyrir mörk og íhlutunarrétt þjóðríkja. Ísland er hluti af  þessu alþjóðlega og samtvinnaða viðskiptaneti. Vaxandi áhrif auðhringa og stórfyrirtækja, sem styðjast við markaðssinnaða stjórnmálamenn sækja að réttindum og kjörum launafólks um allan heim. Landið okkar er hluti af smækkandi heimsmynd þar sem verkalýðshreyfingin þarf að verja af fullum þunga þau réttindi og kjör sem við höfum náð með baráttu á síðustu öld, segir í byrjun 1. maí ávarps fulltrúaráðs verkalýðsfélaganna í Reykjavík, BSRB, BHM, KÍ og INSÍ.

Nýr kjarasamningur starfsmanna hjá Flugstöð Leifs Eiríkssonar, sem greidd hafa verið atkvæði um síðustu daga, hefur verið samþykktur af félagsmönnum SFR, en starfsmenn felldu kjarasamning í mars sl.

Félag starfsmanna stjórnarráðsins hefur tekið í notkun heimasíðu. Slóðin á síðuna er:  www.fss.bsrb.is

"Nánast án nokkurrar umræðu í verkalýðshreyfingunni virðast örfáir einstaklingar ætla að knýja í gegn grundvallarbreytingar á lífeyriskerfinu. Til stendur að tengja verðmæti iðgjalda aldri greiðandans þannig að iðgjöld sem greidd eru á unga aldri eru verðmætari en iðgjöld sem við greiðum þegar aldurinn færist yfir. Rökin eru þau að sjóðurinn hafi peningana lengur til ávöxtunar. En hvað þýðir þetta t.d. fyrir konur sem eru fjarri vinnumarkaði á fyrstu árum starfsævinnar vegna barneigna og hvað með langskólagengið fólk sem kemur seint inn á vinnumarkað?" segir Ögmundur Jónasson í grein á heimasíðu sinni.

"Í kjarasamningum í byrjun níunda áratugar síðustu aldar var samið um að efla atvinnulýðræði í opinberum stofnunum. Því miður var ákvæðum þessara samninga sem BSRB gerði við Ragnar Arnalds þáverandi fjármálaráðherra, ekki alls staðar fylgt eftir. Það var þó gert í Ríkisútvarpinu," segir Ögmundur Jónasson formaður BSRB m.a. í grein á heimasíðu sinni þar sem hann fjallar um frumvarp ríkisstjórnarinnar um Ríkisútvarpið og nefnir RÍKISSTJÓRNIN Á MÓTI ATVINNULÝÐRÆÐI!

Félag flugmálastarfsmanna ríkisins hefur samþykkt kjarasamning við ríkið með rúmum 80% greiddra atkvæða. Á kjörskrá voru 145, 115 greiddu atkvæði um samninginn eða 79,3%. Já sögðu 94 eða 82%, nei sögðu  16 eða 14%. Auðir og ógildir voru 5 eða 4%.

Starfsmannafélags Húsavíkur felldi kjarasamninginn við ríkið í almennri atkvæðagreiðslu. 8 sögðu nei, 3 sögðu já og 2 seðlar voru auðir.

Félag opinberra starfsmanna á Suðurlandi hefur samþykkt kjarasamning Samflostins við launanefnd ríkisins. 89% sögðu já, 3,5% nei og 7% voru auðir.

Félagsmenn í Póstmannafélagi Íslands hafa samþykkt nýgerðan kjarasamning PFÍ við Íslandspóst . Á kjörskrá voru 1072, atkvæði greiddu 638 eða 59,5%. Já sögðu 368 eða 57.7%. Nei sögðu 255 eða 40%. Auðir seðlar og ógildir voru 15 eða 2.3%.

Félagsmálaskóli alþýðu hefur opnað nýja heimasíðu. Slóðin á heimasíðuna er www.felagsmalaskoli.is  Félagsmálaskóli alþýðu er starfræktur af Alþýðusambandi Íslands og BSRB. MFA, Menningar- og fræðslusamband alþýðu, fer með rekstur og málefni skólans. Hlutverk hans er að auka þekkingu talsmanna stéttarfélaga og efla þá í starfi til þess að þeir séu betur í stakk búnir að vinna að bættum lífskjörum launafólks.

Starfsmenn Fríhafnarinnar og Flugstöðvar Leifs Eiríkssonar felldu kjarasamning sem nýlega var gerður. Á kjörskrá voru 113 starfsmenn. 96 greiddu atkvæði, eða 85%. Já sögðu 33, eða 34,4%. Nei sögðu 59, eða 61,5%. Auðir og ógildir seðlar voru 4, eða 4,2%.

"Jafnréttisbarátta og barátta fyrir bættum kjörum kvenna er hluti af baráttunni fyrir betri heimi.  Því viljum við sem teljum að betri heimur sé raunverulegur valkostur nota 8.mars Alþjólegan baráttudag kvenna fyrir friði og jafnrétti til að horfa gagnrýnum augum á samfélagið.  Það er mikilvægt að sameina alla þá sem ekki sætta sig við skiptingu heimsins í austur og vestur, norður og suður, kristinn heim eða islam, ríkan heim eða fátækan," segir m.a. í ályktun frá opnum fundi á alþjóðlegum baráttudegi kvenna fyrir friði og jafnrétti 8. mars.

Starfsmannasamtök Ríkisútvarpsins sendi í gær frá sér erindi til Útvarpsstjóra að hann láti fagleg sjónarmið ráða við ráðningu nýs fréttastjóra á Fréttastofu RÚV. Starfsmannafélag RÚV er aðili að Starfsmannasamtökunum.

SFR gekk frá nýjum kjarasamningi við fjármálaráðuneytið kl. 5.30 í morgun eftir næturlangan fund. Eru launaáhrif samningsins metin á 18% á samningstímanum en hann gildir til 30. apríl 2008. Er stefnt að því að undirrita samninginn 9. mars nk.

Fulltrúar BHM, BSRB og ASÍ við undirritun samkomulagsins

Nýtt samkomulag um rekstur og hlutverk Ráðgjafarstofu um fjármál heimilanna var undirritað 17. febrúar sl. 14 aðilar koma að þessu samkomulagi. Árni Magnússon félagsmálaráðherra undirritaði samninginn ásamt fulltrúum allra þeirra aðila sem koma að þessu samkomulagi sem er til þriggja ára eða til ársloka 2007. BSRB kemur að þessu samkomulagi og undirritaði Vernharð Guðnason samkomulagið fyrir hönd BSRB.

Ríkisstjórnin hefur ákveðið að foreldrar langveikra barna fái greiðslur í allt að þrjá mánuði vegna tekjutaps. Sama á við um foreldra barna sem greinast með alvarlega fötlun. Greiðslan nemur 90.000 kr. á mánuði og koma greiðslurnar til framkvæmda í áföngum á þremur árum. Þannig verður greitt fyrir einn mánuð í ár, tvo mánuði næsta ár og þrjá mánuði á þriðja ári. Það var nefnd á vegum félagsmálaráðuneytisins sem mótaði tillögurnar og var fulltrúi BSRB í nefndinni Jens Andrésson formaður SFR, en aukin réttindi langveikra barna hefur verið baráttumál BSRB um langt skeið. Nefndin skrifaði undir lokaskýrslu um málið í dag, en félagsmálaráðherra kynnti ákvörðunina á þingi í gær.

Frá enskunámskeiði hjá Framvegis sem hófst í febrúar.

Skráning er hafin á tungumálanámskeið BSRB sem hefjast í apríl hjá Framvegis. Í boði eru námskeið í ensku, dönsku og spænsku. Námskeiðin hefjast öll 4. apríl og eru tvisvar í viku, mánudaga og miðvikudaga frá kl. 17 - 19.30. Skráning í síma 5814914. Einnig eru í gangi skráningar á námskeið hjá símenntunarmiðstöðvum á landsbyggðinni.

Þann 1. janúar 2005 tóku gildi breytingar á lögum um fæðingar- og foreldraorlof. Erna Guðmundsdóttir lögfræðingur BSRB hefur tekið saman helstu breytingar á lögunum.Helstu breytingarnar eru eftirfarandi:
I. Fæðingarorlofið má ekki vera skemur en tvær vikur í senn  (var ein vika fyrir breytingu).
II. Mánaðarleg greiðsla Fæðingarorlofssjóðs til starfsmanns í fæðingarorlofi er 80% af meðaltali heildarlauna og skal miða við tvö tekjuár á undan fæðingarári barns eða þess árs er barn kemur inn á heimili við ættleiðingu eða varanlegt fóstur.

Nú er vorönn Félagsmálaskóla alþýðu að hefjast. Fyrirhuguð eru átta námskeið sem eru með ólíkar áherslur. Hæfni stéttarfélaga til að taka á og laga sig að síbreytilegu umhverfi byggir á þekkingu þeirra. Því er mikilvægt að fræðsla og þjálfun sé hluti af starfi talsmanna til að viðhalda aðlögunarhæfileika þeirra hagsmunagæslu og baráttu fyrir bættum kjörum.

Erna Guðmundsdóttir lögfræðingur BSRB hélt fyrirlestur um fæðingar- og foreldraorlof á fræðslumorgni fyrir trúnaðarmenn SFR í dag 26. janúar.

Nefnd á vegum félagsmálaráðuneytisins sem átti að kanna með hvaða hætti væri unnt að sporna við því að fólks sé látið gjalda aldurs á vinnustað, hvort heldur er með uppsögnum eða mismunun í starfi hefur sent frá sér skýrslu þar sem lagt er til að stjórnvöld hefji nú þegar sérstakt fimm ára verkefni til að styrkja stöðu þessa hóps á vinnumarkaði. Fulltrúi BSRB í nefndinni var Arna Jakobína Björnsdóttir formaður KJALAR.

Starfsmannafélög Suðurnesja, Hafnarfjarðar og Vestmannaeyjabæjar undirrituðu nýjan kjarasamning við Hitaveitu Suðurnesja í byrjun desember. Félögin komu sameiginlega að gerð þessa samnings. Hann gildir frá 1. nóvember s.l. til 1. nóvember 2008. Samningurinn var samþykktur á fundi félagsmanna 7. desember s.l.

Ögmundur Jónasson, Borgþór Kjærnested og Eiríkur Jónsson við húsarústir í Nablus.

Ögmundur Jónasson formaður BSRB er nú staddur í Nablus í Palestínu í boði Palestinsku verkalýðshreyfingarinnar. Með honum í för er Eiríkur Jónsson formaður KÍ. Borgþór Kjærnested félagi í félaginu Ísland Palestína hitti þá Ögmund og Eirík í Tel Aviv. Auk BSRB og KÍ hafði forseta ASÍ verið boðið til Palestínu en hann sá sér ekki fært að fara. 

Ögmundur Jónasson formaður BSRB og Eiríkur Jónsson formaður Kennarasambands Íslands komu til Jerúsalem í gær og héldu rakleiðis til Nablus á Vesturbakkanum þar sem höfuðstöðvar Alþýðusambands Palestínu eru. Þeir áttu fundi með forystufólki þess og Kennarasambandsins og heimsóttu jafnframt Læknishjálparsamtökin sem standa fyrir víðtæku hjálparstarfi og heilsugæslu. Þá skoðuðu þeir gömlu borgina en hún og Balata flóttamannabúðirnar hafa orðið fyrir sífelldum árásum Ísraelshers.