Nýstofnaður kór borgarstarfsmanna.

Í tilefni síðasta fulltrúaráðsfundar St.Rv. á áttatíu ára afmælisári félagsins var haldin sérstök hátíðardagskrá 14. desember síðastliðinn. Boðið var upp á glæsilegt jólahlaðborð og fulltrúaráðsmeðlimir fengu jólagjafir frá félaginu. Vilhjálmur Þ. Vilhjálmsson borgarstjóri og Ögmundur Jónasson, formaður BSRB, ávörpuðu samkomuna. Nýstofnaður kór borgarstarfsmanna, Borgarkórinn, flutti jólalög við góðar undirtektir og ekki síður söngkonan Magga Stína sem söng sig inn í hug og hjörtu viðstaddra með flutningi á lögum meistara Megasar.

Grétar Már Sigurðsson ráðuneytisstjóri utanríkisráðuneytisins tók við bréfi fyrir hönd Valgerðar Sverrisdóttur utanríkisráðherra frá BSRB þar sem farið er fram á að hún hvetji ríkisstjórn Íslands til að bregðast með jákvæðum hætti við því neyðarástandi sem nú ríkir í Palestínu. Það var Ögmundur Jónasson formaður BSRB sem afhenti bréfið. PSI, alþjóðasamtök starfsmanna í almannaþjónustu, hafa hvatt aðildarfélög samtakanna til að senda ríkisstjórnum í sínu heimalandi bréf þar sem hvatt er til þess að starfsfólki í almannaþjónustu í Palestínu verði veittur stuðningur.

Samtals má því áætla að á árinu 2006 hafi allt að 10.000 erlendir ríkisborgarar komið til starfa á Íslandi, þó ekki séu þeir svo margir starfandi á hverjum tímapunkti. Árið 2005 voru að jafnaði um 9.000 erlendir ríkisborgarar starfandi á Íslandi skv. upplýsingum Hagstofunnar og má gera ráð fyrir að um 2/3 hlutar þeirra séu enn starfandi á Íslandi, eða um 6.000 manns. Erlendir ríkisborgarar á íslenskum vinnumarkaði eru því að öllum líkindum yfir 15.000 um þessar mundir, en erfitt er að leggja mat á hver fjöldinn er nákvæmlega, er niðurstaða samantektar Vinnumálastofnunar sem birt er á heimasíðu stofnunarinnar.

Morgunfundur Evrópufræðaseturs á Bifröst, í samstarfi við Samtök atvinnulífsins,  BSRB, ASÍ og Samtök iðnaðarins verður haldinn á Grand Hótel í Reykjavík, miðvikudaginn 15. nóvember. Fundurinn verður í salnum Háteigi og stendur frá kl. 8:15 - 10:00.
Allir eru velkomnir meðan húsrúm leyfir og aðgangur er ókeypis.

41. þing BSRB er nú að afgreiða ályktanir. Þegar hafa verið samþykktar ályktanir um efnahags- og atvinnumál, hnattvæðingu, einkavæðingu fræðslumál og málefni erlendra starfsmanna. Hægt er að nálgast ályktanirnar hér jafnóðum og þær eru samþykktar.

Ný framkvæmdanefnd BSRB. Frá vinstri: Garðar Hilmarsson, Elín Björg Jónsdóttir, Ögmundur Jónasson, Árni Stefán Jónsson og Þuríður Einarsdóttir.

Ögmundur Jónasson var kjörinn formaður BSRB, Árni Stefán Jónsson formaður SFR var kjörinn fyrsti varaformaður bandalagsins, Elín Björg Jónsdóttir formaður Félags opinberra starfsmanna á Suðurlandi var kjörin annar varaformaður, Garðar Hilmarsson formaður Starfsmannafélags Reykjavíkurborgar var kjörinn gjaldkeri og Þuríður Einarsdóttir formaður Póstmannafélags Íslands var kjörin ritari BSRB.

„Kjörorð þingsins er: Eflum almannaþjónustuna – eflum lýðræðið.
Hvers vegna þetta kjörorð? Innan BSRB starfar launafólk sem á það sammerkt að vinna við þá atvinnustarfsemi sem við höfum kallað almannaþjónustu – þar er um að ræða grunnþjónustu samfélagsins – þjónustu sem ekkert samfélag getur án verið, hvort sem það er á sviði heilbrigðismála og menntamála eða löggæslu, vinnueftirlits og rannsókna, póstþjónustu eða annarra þátta sem nútímaþjóðfélag byggir á,“ sagði Ögmundur Jónasson í setningarræðu sinni á 41. þingi BSRB sem haldið er á Grand hóteli 25. til 27. október.

Ögmundur undirstrikaði mikilvægi þess að stuðla að jöfnuði í samfélaginu og ábyrgð verkalýðshreyfingarinnar í því efni. BSRB hefði staðið vaktina um velferðarkerfið og barist gegn öllum tilraunum til þess að brjóta það niður en sagði jafnframt að ekki síður hefðu samtökin beitt sér af alefli í sókn til framfara.

Í ræðu sinni kom Ögmundur víða við og fjallaði m.a. um réttindamál opinberra starfsmanna, málefni lífeyrissjóða, jafnréttismál, starfsmenntunarmál og verðlagsmál, svo nokkuð sé nefnt. Þá gerði hann að umtalsefni vaxandi gróðahyggju í þjóðfélaginu á undanförnum árum - græðgina sem væri bæði óendanlega fátæk og siðlaus í senn - og lýsti afleiðingum hennar og áhrifum á lýðræðið og kjör almennings í landinu. Meginstefið í ávarpinu var að vilji fólk kröftugt lýðræðisþjóðfélag verði að standa vörð um almannaþjónustuna, styrkja hana og efla.

Fulltrúar Landssambands slökkviliðs- og sjúkraflutningamanna á 41. þingi BSRB. Frá hægri: Vernharð Guðnason formaður LSS, Ari Hauksson, Guðmundur Fylkisson, Borgar Valgeirsson, Ari Elíasson og Jósep Hallsson.

Fulltrúar Landssambands slökkviliðs- og sjúkraflutningamanna á 41. þingi BSRB þurftu skyndilega að yfirgefa þingið vegna útkalls þar sem farþegaflugvél frá Continental flugfélaginu var að koma inn til nauðlendingar á Keflavíkurflugvelli. Lendingin tókst giftusamlega og sneru fulltrúarnir því aftur til starfa sinna á þingi BSRB.

Erna Guðmundsdóttir og Ögmundur Jónasson frá BSRB, Halldóra Friðjónsdóttir BHM og Elna Katrín Jónsdóttir KÍ.

BSRB, BHM og KÍ undirrituðu í dag samkomulag við ríkið, Reykjavíkurborg og Launanefnd sveitarfélaga um fjarvinnslu. Með þessu samkomulagi var innleiddur rammasamningur á Evrópuvísu sem tekur til fjarvinnslustarfsmanna þar sem vinna sem einnig væri hægt að inna af hendi í starfsstöð atvinnurekanda er unnin reglulega utan starfsstöðvarinnar.

Stjórn Starfsmannafélags Akraness mótmælir harðlega áformum um heildarútboð á rekstri Sorpmóttökustöðvar Akraness, Gámu. Þá mótmælir stjórn félagsins því að starfsmenn þurfi að lesa um uppsagnir á störfum sínum í fjölmiðlum en í viðtali Skessuhorns við Gunnar Sigurðsson forseta bæjarstjórnar Akraness kom fram að starfsmönnum Gámu verði sagt upp um leið og útboð fer fram.

Í skýrslu Vinnumálastofnunar um atvinnuástand í september  kemur fram að atvinnuleysi mælist nú 1,0% og hefur ekki mælst svo lágt síðan í september 2001. Leiðrétt atvinnuleysi eftir árstímum reiknast nú 1,2% og hefur lækkað um 0,1% frá fyrra mánuði. Í september hafði atvinnuleysi dregist meira saman á höfuðborgarsvæðinu en á landsbyggðinni frá sama mánuði fyrir einu ári. Þá hafði atvinnulausum konum fækkað meira en körlum. Það sem öðru fremur einkennir vinnumarkaðinn nú er látlaus innflutningur erlends vinnuafls og hefur hann aldrei mælst jafn mikill í einum mánuði og í september, eða tæplega eitt þúsund manns.

Ögmundur Jónasson formaður BSRB ritaði opið bréf sem dreift var til allra heimila í Snæfellsbæ. Bréfið varðar uppsagnir starfsmanna í íþróttahúsum og sundlaug Snæfellsbæjar. Með bréfinu fylgir grein sem Ögmundur hafði óskað eftir að fá birta í Bæjarblaðinu Jökli en þar hafði talsverð umfjöllun verið um málið. Tekið var jákvætt í það að birta greinina en þegar ritstjóranum barst hún brá svo við að hann neitaði að birta hana. Því greip Ögmundur til þess ráðs að dreifa henni á þennan hátt til íbúa Snæfellsbæjar.

Kallar framtíðin á breyttar áherslur? Skiptir aldurssamsetning á vinnustað máli? Er æskudýrkun á þínum vinnustað? Verkefnisstjórn 50 + efnir til fundaraðar um málefni miðaldra og eldra fólks á vinnumarkaði.  Fyrsti fundur af þremur verður á Grand hótel, Hvammi þann 17. október n.k. kl. 8:30-10:00 Árið 2005 skipaði félagsmálaráðherra, sjö manna verkefnisstjórn sem ætlað er að stýra fimm ára verkefni sem hefur það meginmarkmið að styrkja stöðu miðaldra og eldra fólks á vinnumarkaði.  Eitt af því sem verkefninu er ætlað, er að styrkja stöðu þeirra sem eru 50 ára og eldri með því að skapa jákvæða umræðu um miðaldra og eldra fólk á vinnumarkaði.  Markmiðið er m.a. að bæta ímynd þeirra með því að vekja athygli á kostum þeirra sem starfsmanna og móta farveg fyrir viðhorfsbreytingu í þjóðfélaginu.

Sjúkraliðar á landsbyggðinni halda áfram að taka undir ályktun trúnaðarmanna á Landspítala háskólasjúkrahúsi. Nú hafa sjúkraliðar á Sjúkrahúsi og heilsugæslu Akranes og sjúkraliðar á Heilbrigðisstofnun Austurlands sent frá sér ályktanir þar sem tekið er undir kröfur sjúkraliða á LSH um að gengið verði frá nýjum stofnanasamning við sjúkraliða tafarlaust.

„Sannast sagna furða ég mig á ummælum Kristins Jónassonar bæjarstjóra Snæfellsbæjar í fréttum Sjónvarps í gærkvöldi,“ segir Ögmundur Jónasson, formaður BSRB. „Bæjarstjóri segist undrast að fólkið sem bæjarstjórn rak úr vinnu í sumar skuli sækjast eftir störfum sínum að nýju.  Bæjarstjóri segist sjálfur aldrei myndi sækjast eftir starfi hjá aðila sem hann hefði stefnt fyrir dómstóla. Svo vill til að þessi aðili er ekkert venjulegt fyrirtæki heldur bæjarfélag sem er rekið á vegum og ábyrgð allra bæjarbúa. Snæfellsbær er engin einkaeign bæjarstjórans né nokkurs manns og fráleitt að stilla málinu upp á þennan hátt...

Munið helgarleigu húsa í Munaðarnesi. Öll húsin eru með heitum pottum. Helgarleiga á stórum húsum er 9.500 kr. og á litlum húsum 7.500 kr. Hægt að greiða fyrir orlofshúsin með debet- og kreditkortum. Síminn á skrifstofu BSRB er 5258300.
Sjá  nánar

Námsframboð Félagsmálaskóla alþýðu á haustönn 2006 liggur nú fyrir. Að venju er boðið upp á fjölbreytt námskeið sem varða fólk á vinnumarkaði. Má þar nefna námskeið um ný lög um atvinnuleysistryggingar og vinnumarkaðsaðgerðir, námskeið um erlent launafólk á vinnumarkaði, heilsu og líðan á vinnustað. Þá má nefna námskeið um að koma fram af sjálfsöryggi og uppbyggileg samskipti

Frá undirritun samkomulagsins. Frá vinstri: Garðar Hilmarsson formaður Starfsmannafélags Reykjavíkurborgar, Kristín Á. Guðmundsdóttir formaður Sjúkraliðafélags Íslands, Árni Stefán Jónsson formaður SFR, Ögmundur Jónasson formaður BSRB, Jóhanna Arnórsdóttir framkvæmdastjóri Framvegis, Sölvi Sveinsson skólastjóri Verzlunarskólans og Helgi Jóhannsson formaður stjórnar Verzlunarskólans.

Verzlunarskóli Íslands og BSRB undirrituðu í dag samkomulag um stofnun fyrirtækis um rekstur Framvegis, miðstöðvar um símenntun ehf. Auk Verzlunarskólans og BSRB eru þrjú aðildarfélög BSRB aðilar að stofnun fyrirtæksins en það eru SFR stéttarfélag í almannaþjónustu, Sjúkraliðafélag Íslands og Starfsmannafélag Reykjavíkurborgar.

Fjölbreytt dagskrá verður í portinu á bakvið BSRB-húsið allan laugardaginn á menningarnótt í Reykjavík. Það eru félagasamtök, fyrirtæki og stofnanir sem staðsett eru við portið, þar á meðal BSRB og aðildarfélögin í BSRB-húsinu, sem standa að þessu. Boðið verður upp á dagskrá fyrir börn auk þess sem ýmislegt er í boði fyrir fólk á öllum aldri. Dagskránni lýkur með gömludansaballi um kvöldið.

Ögmundur Jónasson, Alan Leather og Jurgen Buxbaum.

Yfir fimmtíu manns sóttu fyrirlestur Jürgens Buxbaum og Alans Leather frá PSI – Alþjóðasamtökum launafólks í almannaþjónustu – sem haldinn var í BSRB húsinu föstudaginn 7. júlí sl. Þeir fjölluðu um opnun vinnumarkaða, í Evrópu og á heimsvísu, og afleiðingum þeirra hræringa sem hún hefði haft í för með sér. Ánægjulegt var að sjá hve mikill áhugi var á fundinum því þar voru mættir fulltrúar frá öllum helstu samtökum launafólks og einnig frá atvinnurekendahliðinni. ...

Ekki ráðum við veðurguðunum. Það sannaðist í gær. Svo mikla þoku gerði þá á Genfarflugvelli að flugumferð þar tafðist með þeim afleiðingum að þeir Alan Leather og Jürgen Buxbaum, sem auglýstir höfðu verið á opnum umræðufundi klukkan 10, í dag, fimmtudag, urðu veðurtepptir. Fyrirlestur þeirra frestast því í sólarhring. Eins og gefur að skilja er ekki við þetta ráðið en við hvetjum alla sem ætluðu að koma á fyrirlesturinn að sækja hann í BSRB húsinu, Grettisgötu 89, klukkan 10 á morgun, föstudag.

"... BSRB á aðild að matvælanefnd forsætisráðuneytisins. Samtökin hafa mjög skýra stefnu í þessum efnum: Um landbúnaðinn á Íslandi þarf að ríkja þjóðarsátt. Hún verður aldrei raunveruleg nema í góðri sátt á milli bænda og neytenda. Takmarkið er að ná slíkri sátt og að því vill BSRB vinna." Þetta kemur m.a. fram í yfirlýsingu Ögmundar Jónassonar, formanns BSRB, og Elínar Bjargar Jónsdóttur fulltrúa BSRB í matvælanefndinni. 

BSRB boðar til umræðufundar með tveimur reyndum forystumönnum Alþjóðasamtaka starfsmanna í almannaþjónustu, PSI (Public Services International), fimmtudaginn 6. júlí kl. 10 í húsi BSRB að Grettisgötu 89, 1. hæð. Gestir fundarins eru þeir Alan Leather sem hefur verið ábyrgur fyrir málum heilbrigðisgeirans innan PSI og Jürgen Buxbaum, framkvæmdastjóri Evrópudeildar PSI. Fjallað verður um áhrif alþjóðavæðingar á kjör og réttindi launafólks bæði í þeim löndum sem vinnuafl streymir til og þjónustusamningar beinast að en einnig í hinum sem sjá á eftir vinnuafli sínu úr landi.  Í þessu samhengi verður horft til þjónustutilskipunar Evrópusambandsins og opnunar vinnumarkaða.

Stóru Skógar voru tengdir við vatnsveitu Orkuveitu Reykjavíkur á sumarsólstöðum, 21. júní sl. Eru þá vatnsmál í orlofsbyggðum BSRB í Borgarfirði komin í mjög gott horf, en Munaðarnes var tengt vatnsveitunni fyrr í sumar.

Íslensku þátttakendurnir á ráðstefnu NTR: Garðar Hilmarsson, Sjöfn Ingólfsdóttir, Elín Björg Jónsdóttir, Ögmundur Jónasson og Guðmundur Garðar Guðmundsson.

Um helgina lauk í Luleå  í Norður-Svíþjóð ráðstefnu á vegum Nordisk Tjenestemannsråd, NTR en það eru samtök opinberra starfsmanna á Norðurlöndum, einkum úr röðum starfsmanna sveitarfélaga. Í ályktun frá ráðstefnunni er lögð áhersla á mikilvægi þess að varðveita hið norræna módel sem svo er nefnt. „Norðurlöndin standi áfram í fararbroddi hvað varðar tækniframfarir, nýsköpun og samkeppnishæfni,“ segir meðal annars í ályktuninni.

Gísli B. Björnsson, Berglind Gunnarsdóttir, Alina Dubik, Jónas Ingimundarson og Ögmundur Jónasson.

Húsfylli var á Menningarhátíð BSRB í Munaðarnesi laugardaginn 10. júní þegar sýning Gísla B. Björnssonar, Ljós og litir í landslagi, var opnuð í þjónustumiðstöðinni. Alina Dubik söng við undirleik Jónasar Ingimundarsonar og Berglind Gunnarsdóttir las upp eigin ljóð og ljóðaþýðingar. Þá ávarpaði Ögmundur Jónasson formaður BSRB gesti.

Frá tengingu Munaðarness við vatnsveituna. Mynd Geir Sævar Geirsson.

Nú er þeim langþráða áfanga náð að tengja Munaðarnes við vatnsveitu Orkuveitu Reykjavíkur, sem lögð verður um allan Borgarfjörð. Það gerðist um síðustu mánaðarmót. Enn er eftir að tengja Stóru Skóga við vatnsveituna en það mun gerast á næstu dögum.

Krakkarnir á myndinni frá vinstri eru Egill Karlsson, Andrea Bergsdóttir og Sindri Már Hjartarson, nemendur 10. bekkjar Laugalækjarskóla.

Nemendur í 10. bekk Laugalækjarskóla eru nú í júníbyrjun að ljúka lokaverkefnum sínum á skólaárinu og er þemað fyrir allan skólann, vatn út frá hinum ýmsu sjónarhólum. Fyrir okkur í BSRB sem höfum látið málið til okkar taka, er það mjög ánægjulegt að sjá að viðfangsefninu – vatni – séu gerð svo góð skil, því allir nemendur 10. bekkjar höfðu mjög áhugaverðar kynningar á verkefnum sínum, hvort sem fjallað var um Þingvallavatn, virkjanir, álitamál í sambandi við vatnalögin eða annað.

"Fulltrúaþing Sjúkraliðafélags Íslands lýsir yfir miklum áhyggjum og eindreginni andstöðu við síendurteknum ákvörðunum  stjórnvalda um niðurskurð á fjárveitingum til heilbrigðisþjónustu landsmanna. Afleiðing niðurskurðarins eru farin að koma fram í skertri þjónustu við sjúklinga og auknu álagi á heimilin. Síðast en ekki síst hefur stöðug neikvæð umræða um heilbrigðisþjónustu landsmanna dregið úr áhuga yngri kynslóðarinnar til náms í heilbrigðisgreinum," segir m.a. í ályktun sem 15. fulltrúaþing Sjúkraliðafélags Íslands sendi frá sér en þingið fór fram fimtudaginn 18. maí sl.

25 talsmenn stéttarfélaga sem lagt hafa stund á sérskipulagt fjögurra missera rekstrar- og stjórnunarnám brautskráðust frá Símenntun Háskólans á Akureyri sl. föstudag. Námið sem var í samstarfi við viðskiptadeild háskólans og Félagsmálaskóla alþýðu hófst haustið 2004. Í upphafi hvers misseris komu nemendur í háskólann en fyrirlestrar fóru síðan fram í Símenntunarmiðstöðvum á 10 stöðum á landinu. Á myndinni má sjá þrjá talsmenn BSRB sem brautskráðust en það eru Kristín Á. Guðmundsdóttir formaður SLFÍ, Birna Ólafsdóttir SLFÍ og Arna Jakobína Björnsdóttir formaður Kjalar.

Eftirfarandi kemur m.a. fram í 1. maí ræðu formanns BSRB, Ögmundar Jónassonar, í Stapanum í Reykjanesbæ í dag: Þörf er á að endurreisa kauptaxtakerfið. Á stórum hluta markaðarins er það handónýtt. Væru atvinnurekendur reiðubúnir að gera sáttmála um tekjuskiptingu? ...Í ræðu á Ingólfstorgi í dag fjallar Vernharð Guðnason, formaður Landssambands slökkviliðs- og sjúkraflutningamanna, m.a. um hækkandi fasteignaverð og hækkandi fasteignaskatta og áhrif þess á kjör heimilanna í landinu. Hann varar við einkavæðingu og einkarekstri á grunnþáttum almannaþjónustunnar...Árni Stefán Jónsson, formaður SFR – stéttarfélags í almannaþjónustu, er ræðumaður dagsins í Hafnarfirði. Hann ræðir þá óheyrilegu misskiptingu sem við blasir í samfélaginu í kjölfar markaðsvæðingar síðustu ára og einkavæðingaráráttu stjórnvalda. Árni Stefán minnir á launamun kynjanna... 

Fundur trúnaðarmannaráðs SFR haldinn 27. apríl 2006 lýsir þungum áhyggjum af þeirri þróun efnahagsmála sem nú birtist með aukinni verðbólgu og tilheyrandi verðhækkunum á brýnustu lífsnauðsynjum. Þessi þróun bitnar harðast á þeim sem lægst hafa launin en það er jafnframt sá hópur sem síst hefur stuðlað að þenslunni sem nú ríkir í efnahagslífinu.

Vatnsveitur í opinberri eigu og einkaeigu - hver er munurinn? nefnist bæklingur sem BSRB hefur gefið út. Bæklingurinn byggir á erindi sem David Hall hélt á vegum BSRB á síðasta ári. David Hall, prófessors frá Greenwich háskólanum í Lundúnum veitir forstöðu deild við skólann sem kölluð er Public Services International Research Unit, en sú stofnun sérhæfir sig í rannsóknum á ýmsum þáttum almannaþjónustunnar. Sérsvið Davids er vatnið og reyndar rafmagnið einnig, en hann hefur einnig rannsakað ýmislegt sem lýtur að heilbrigðiskerfinu, sorpeyðingu og öðrum grunnþáttum almannaþjónustunnar. Hægt er að nálgast bæklinginn á skrifstofu BSRB, Grettisgötu 89 og er hann ókeypis. einnig er hægt að panta hann í síma 525 8300 eða á netfangið: safi@bsrb.is og verður hann þá sendur viðkomandi að kostnaðarlausu.

SFR vann mál gegn ríkinu þar sem tekist var á um veikindi í orlofi. Málið varðaði starfsmann fangelsismálastofnunar sem hafði meiðst á fæti í orlofi. Ákvað yfirstjórn fangelsins sem viðkomandi starfaði hjá að 8 vaktir væru ekki veikindadagar heldur orlofsdagar. Niðurstaða Héraðsdóms er að vaktirnar átta væru veikindadagar en ekki orlofsdagar. Þá var Fangelsismálastofnun dæmd til að greiða stefnanda 300 þúsund krónur í málskostnað.

Streita og streitustjórnun nefnist námskeið sem verður haldið í Félagsmálaskóla alþýðu 7. apríl að Grensásvegi 16a, 108 Reykjavík.

Námskeið í spænsku III hefst hjá Framvegis 4. apríl nk. ef næg þátttaka næst. Skráning fer fram á skrifstofu Framvegis, Síðumúla 6, eða í síma 581 4913.

Niðurstaða úr atkvæðagreiðslu Landssambands slökkviliðs- og sjúkraflutningamanna var mjög afgerandi. 197 voru á kjörskrá og 183 greiddu atkvæði eða um 93%. Já við verkfallsboðun sögðu 97,8%. Nei sögðu tveir og tveir voru auðir og ógildir. Verkfall skellur því á dagana 20. og 21. mars náist ekki samningar fyrir þann tíma og svo ótímabundið viku seinna.

Trúnaðarmannaráðsfundur SFR samþykkti tillögur uppstillingarnefndar um stjórn SFR sem kjörin verður á aðalfundi félagsins 25. mars nk. Jens Andrésson formaður SFR hættir formennsku en uppstillinganefnd lagði til að Árni Stefán Jónsson framkvæmdastjóri félagsins verði formaður.

Eins og hér greinir frá eru viðbrögðin við atkvæðagreiðslunni á Evrópuþinginu í dag um þjónustutilskipun ESB misvísandi. Hitt virðist ljóst að sigrar verkalýðshreyfingarinnar eru í besta falli varnarsigrar því þegar á heildina er litið er verið að þrengja að henni og lýðræðissamfélaginu. Ljóst er að áhrifa markaðarins kemur til með að gæta í ríkari mæli en verið hefur, bæði í samfélaginu í heild sinni og í daglegu lífi fólks.

Fasteignamat ríkisins tók á síðasta ári upp eigin reglur varðandi reglur og leiðbeiningar um öryggi í upplýsingatækni þar sem Fasteignamatið áskilur  sér m.a. rétt til að skrá notkun á internetinu í þeim tilgangi  að fylgjast með að reglum þessum sé fylgt og til að tryggja sem  hagkvæmasta  notkun netsins auk þess sem allur tölvupóstur sem sendur er í póstkerfi stofnunarinnar sé eign hennar og henni heimilt að skoða hann. BSRB sendi erindi til Persónuverndar vegna þessara reglna og nú hefur Persónuvernd sent Fasteignamatinu leiðbeiningar þar sem bent er á að ýmislegt í þessum reglum þurfi að lagfæra. 

"Sú staða sem uppi er í kjaramálum starfsmanna sveitarfélaga er áhyggjuefni fyrir félagsmenn okkar og ljóst er að KJÖLUR mun ekki sitja hjá í því ferli sem þegar er farið af stað. Kjarsamningar sem gerðir voru fyrir starfsmenn Reykjavíkurborgar í desember skapa nýjan samanburð og breyta launaumhverfi innan sveitarfélaga mikið," segir á heimasíðu Kjalar, stéttarfélags starfsmanna í almannaþjónustu.

Fyrsti sjálfstæði kjarasamningur Starfsmannafélags Reykjavíkurborgar og Faxaflóahafna sf. var undirritaður í gær, 5. janúar 2006 í fundarsal hafnarstjórnar. Samningurinn er í öllum meginatriðum sambærilegur nýgerðum kjarasamningi félagsins við Reykjavíkurborg.