BSRB hvetur félagsmenn sína til að taka þátt í baráttufundum verkalýðshreyfingarinnar um allt land. Fundurinn í Reykjavík hefst með göngui frá Hlemmi kl. 13.30 en safnast verður saman kl. 13.00. Vernharð Guðnason formaður Landssambands Slökkviliðs- og sjúkraflutningamanna verður ræðumaður BSRB á fundinum á Ingólfstorgi þegar göngu lýkur. Að loknum baráttufundinum á Ingólfstorgi verður 1. maí kaffi BSRB að Grettisgötu 89, í nýjum salarkynnum á jarðhæð hússins.
Fleiri fulltrúar BSRB munu ávarpa baráttufundi víða um land. Ögmundur Jónasson formaður BSRB mun flytja ræðu á fundi í Stapa í Reykjanesbæ kl. 14.00. Árni Stefán Jónsson formaður SFR mun ávarpa fundinn í Hafnarfirði og Helga Hafsteinsdóttir formaður Starfsmannafélags Dala- og Snæfellsnessýslu mun flytja ræður í Snæfellsbæ og á Stykkishólmi.

"Verkalýðshreyfingin getur aldrei sætt sig við misrétti og ranglæti. Það er ljóst að við einkavæðingu undanfarinna ára og sölu ríkiseigna, hefur almannahagsmuna ekki verið gætt. Nú leggja stjórnvöld allt kapp á að breyta þeim stofnunum ríkisins sem ekki hafa verið seldar í hlutafélög. Ljóst er  að endanlegur tilgangur slíkra breytinga er að koma þessum stofnunum á markað. Öllum frekari áformum í þessum efnum er harðlega mótmælt," segir m.a. í 1. maí ávarpi Fulltrúaráðs verkalýðsfélaganna í Reykjavík, BSRB, Bandalags háskólamanna, Kennarasambands Íslands og Iðnnemasambands Íslands.

LEB, ASÍ, BSRB, SGS, Samiðn og Öryrkjabandalag Íslands efna til Ráðstefnu um Skatta og Skerðingar 3. maí 2006, kl. 13:00 til 16:00 í Öskju, Náttúrufræðistofnun Háskóla Íslands.

Nokkrir þingmenn Sjálfstæðisflokksins hafa lagt fram frumvarp sem gengur út á að svipta opinbera starfsmenn þeim rétti að þeim skuli veitt áminning áður en þeim er sagt upp störfum. Ögmundur Jónasson formaður BSRB ritar grein um frumvarpið á heimasíðu sinni og segir m.a.: "Áminningarskyldan, sem svo hefur verið nefnd, var sett í lög og samninga til þess að koma í veg fyrir duttlungastjórnun. Áminningarskyldan sem forstöðumaður skal hlíta gerir það nefnilega að verkum að starfsmanni gefst kostur á því að bæta ráð sitt eða eyða misskilningi ef um slíkt er að ræða."

Mikil umræða fer nú fram um mannekluna á sjúkrahúsum og hjúkrunarheimilum. Formaður BSRB, Ögmundur Jónasson, segir að þessi umræða sé löngu tímabær. “Vinnuálagið  er víða óbærilegt og kemur ekki aðeins niður á sjúklingum heldur einnig starfsfólki. Þessu veldur stöðugur niðurskurður undangenginna ára. Það er augljóst að róttækra aðgerða er þörf. Stjórnvöld verða að endurskoða fjárveitingar til heilbrigðisstofnana og dvalarheimila aldraðra með það fyrir augum að bæta launakjör  þeirra sem eru á lægstu launum og einnig þarf að fjölga stöðugildum sjúkraliða og hjúkrunarfræðinga. Þetta þolir enga bið.”

Til að geta brugðist við þeim hættum sem steðjað geta að samfélagi okkar er algjörlega nauðsynlegt að hafa stór, öflug og vel þjálfuð slökkvilið, (björgunarlið) sérstaklega í ljósi breytinga á vörnum landsins.  Kjölfestan í bráðaþjónustu við samfélagið er í slökkviliðunum. Það er því nauðsynlegra nú, við breyttar aðstæður í varnarmálum þjóðarinnar, en nokkru sinni áður að efla og stækka slökkviliðin hér á suðvesturhorninu, segir í ályktun 11. þings Landssambands slökkviliðs- og sjúkraflutningamanna sem haldið var sl. föstudag. Ályktunin fjallar um aukna ábyrgð Íslendinga á eigin öryggi.

Ögmundur Jónasson segir á heimasíðu sinni frá grein í nýútkomnu blaði sænskra bæjarstarfsmanna SKTF-Tidningen,  sem fjallar um afleiðingar „markaðsvæðingar“ raforkugeirans í Svíþjóð. Þar kemur m.a. fram að síðan þetta gerðist, árið 2002, hafi rafmagnsreikningarnir í Stokkhólmi hækkað um 40% og að ofurlaun renni í vasa forstjóra og stjórnenda. "Allt þetta borgum við, segir málgagn sænskra bæjarstarfsmanna. Við gerum það með  hærri rafmagnsreikningum og tapið er einnig okkar því við verðum af fjármunum sem ella hefðu runnið til velferðarþjónustunnar. "

Starfsmenn ríkisútvarpsins gera alvarlegar athugasemdir við frumvarp ríkisstjórnarinnar um RÚV í ályktun sem samykkt var á fjölmennum starfsmannafundi sem haldinn var af í hádeginu vegna frumvarps í dag. Fulltrúar BSRB, BHM og Rafiðnaðarsambandsins auk útvarpsstjóra sátu fundinn og viðruðu skoðanir sínar. M.a. var farið yfir stöðu frumvarpsins en engar breytingar hafa verið gerðar á því í menntamálanefnd Alþingis þrátt fyrir að heildarsamtök starfsmanna hafi bent á mikilvægi þess að breyta frumvarpinu til að tryggja réttarstöðu starfsmanna verði frumvarpið að lögum.