"Í kjarasamningum sem gerðir verða á næstu mánuðum og misserum er nauðsynlegt að hafa í huga mikilvægi þess að draga stórlega úr kjaramisréttinu í samfélaginu. Misréttið verður að sjálfsögðu ekki upprætt í kjarasamningum einvörðungu. Í slíkum samningum er hins vegar hægt að leggja lóð sín á vogarskál aukins réttlætis á vinnumarkaði. Það má gera með því að bæta stórlega kjör láglauna- og millitekjuhópa," segir m.a. í grein eftir Þuríði Einarsdóttur formann Póstmannafélags Íslands og Ögmund Jónasson formann BSRB sem birtist í Morgunblaðinu í dag.

Reglum um greiðslur Fjölskyldu- og styrktarsjóðs BHM, BSRB og KÍ (FOS) í fæðingarorlofi var breytt 1. júní sl. Þá var horfið frá tekjutengdum greiðslum til mæðra og þess í stað greiddir fæðingarstyrkir til foreldra. Styrkirnir eru jafnháir til karla og kvenna en hliðsjón höfð af starfshlutfalli.  Breytingin varðar foreldra barna sem fæðst hafa eftir 1. júní. Í dag er greiðsla miðað við 100% starf 170 þúsund krónur. Í gildi verður að vera ráðningarsamningur við upphaf fæðingarorlofs. Hægt er að nálgast umsóknareyðublöð á heimasíðu sjóðsins http://www.fos.is/

Í hádeginu í dag var undirritað samkomulag um rekstur Ráðgjafarstofu um fjárhag heimilanna til næstu fimm ára, eða til 31. desember 2012. Alls eru það 16 aðilar sem standa að rekstri Ráðgjafarstofunnar en það eru: félagsmálaráðuneytið, Íbúðalánasjóður, Reykjavíkurborg, Kaupþing, Glitnir, Landsbanki Íslands, Samband íslenskra sparisjóða, Samband íslenskra sveitarfélaga, Þjóðkirkjan, Landssamtök lífeyrissjóða, ASÍ, BSRB, BHM, Rauði kross Íslands, Kópavogsbær og Kreditkort. Þessir aðilar hafa allir staðið að rekstri Ráðgjafarstofunnar undanfarin ár fyrir utan Kreditkort sem er nýr aðili að samkomulaginu. Kreditkort hefur þó verið styrktaraðili Ráðgjafarstofunnar til margra ára.

Ragnar Örn pétursson formaður Starfsmannafélags Suðurnesja telur að dagar Launanefndar sveitafélaga séu taldir þar sem komið hafi í ljós að láglaunastefna nefndarinnar sé ekki að virka. Hvetur hann sveitarfélög á Suðurnesjum að feta í fótspor sveitarfélaga á höfðuborgarsvæðinu sem hafa hækkað mánaðarlegar eingreiðslur til þeirra starfsmanna sem hafa lægst laun. Þetta kemur fram í viðtalivið Ragnar Örn sem birtist í Víkurfréttum í gær. Viðtalið fer hér á eftir.

Frá verðlaunaafhendingunni: Gissur Pétursson forstjóri Vinnumálastofnunar, Guðjónína Sæmundsdóttir frá Miðstöð símenntunar á Suðurnesjum, Una Eyþórsdóttir og Jón Karl Ólafsson frá Icelandair, Þórunn H. Sveinbjörnsdóttir og forseti Íslands Ólafur Ragnar Grímsson.

Forseti Íslands, Ólafur Ragnar Grímsson, afhenti Starfsmenntaverðlaun Starfsmenntaráðs í BSRB húsinu sl. föstudag 23. nóvember. Verðlaunin eru þrískipt og eru veitt fyrirtæki, skóla og einstaklingi fyrir að skara fram úr í fræðslumálum fullorðinna. Vinningshafar voru:Í flokki fyrirtækja og félagasamtaka: Icelandair fyrir öfluga þjálfun og símenntun starfsmanna sinna. Í flokki skóla og fræðsluaðila: Miðstöð símenntunar á Suðurnesjum fyrir frumkvöðlastarf í fullorðinsfræðslu hér á landi. Í opnum flokki: Þórunn H. Sveinbjörnsdóttir, fyrrum varaformaður Eflingar fyrir að fara nýjar leiðir í fullorðinsfræðslu.

Ögmundur Jónasson formaður BSRB sagði á aðalfundi bandalagsins í dag þegar hann mælti fyrir ályktun fundarins að menn yrðu að opna augu fyrir þeim alvarlega vanda sem blasti við innan almannaþjónustunnar. Víða væri orðið erfitt að manna störf og færi ástandið hríðversnandi. „Ef ekkert verður að gert blasir við neyðarástand. Það er á ábyrgð viðsemjenda okkar að semja um stórbætt kjör í komandi kjarasamningum enda sýna kannanir að starfsmenn innan almannaþjónustunnar eru að dragast  verulega aftur úr í launum. Ef starfsfólki innan almannaþjónustunnar verður ekki greitt kaup og búið að því eins og best gerist á launamarkaði horfir þar hreinlega til landauðnar á mikilvægu sviðum velferðarþjónustunnar." Í ályktun BSRB er sett fram krafa um verulegar kjarabætur  auk þess sem lögð er áhersla á að taka verði mið af þörfum fjölskyldunnar þegar samið er um kaup, vinnutíma og önnur kjör.

„Heil og sæl í vinnunni"  er yfirskrift  heilsueflingarverkefnist á vegum Vinnueftirlits ríkisins.  Í Evrópu nefnist það „Move Europe".  Verkefnið kemur frá evrópska samstarfsnetinu um heilsueflingu á vinnustöðum og kallast „Move Europe". Vinnueftirlitið hefur umsjón með verkefninu hérlendis í nánu samstarfi við Lýðheilsustöð. Markmið verkefnisins er að auka vitund innan vinnustaða á mikilvægi þess að efla heilsu og forvarnir. Verkefninu er um leið ætlað að hvetja til aðgerða þegar kemur að heilsueflingu á vinnustöðum og með því auka heilbrigði starfsmanna. Bætt heilsufar starfsmanna hefur í för með sér margs konar hagræðingu fyrir vinnustaði. Lögð verður sérstök áhersla á eftirfarandi þætti: hreyfingu, næringu, tóbaksvarnir, áfengis- og vímuvarnir sem og streitu og andlega líðan. 

Mánudaginn 29. október s.l opnaði Árni Mathiesen, fjármálaráðherra, nýjan fræðsluvef Landssamtaka lífeyrissjóða um lífeyrismál. Vefslóðin er www.gottadvita.is Á heimasíðum flestra lífeyrissjóða er hnappur sem hægt er að smella á til að færast á fræðsluvefinn.

BSRB hefur falið lögfræðingi að afla gagna um samninga Landspítalans við starfsmannaleigur en spítalinn hefur varið umtalsverðum fjármunum, eða yfir hundrað milljónum króna það sem af er árinu, í greiðslur til starfsmannaleiga. BSRB óskaði eftir gögnum frá spítalanum vegna þessa og fékk þau en þar var strikað yfir alla hluta samninganna þar sem tímakaup starfsmanna kemur fram.

Stjórn BSRB skorar á borgaryfirvöld í Reykjavík að ógilda þegar í stað samninga um sameiningu REI og GGE enda ekki rétt að þeim staðið. Auk þess krefst stjórn samtakanna þess að hætt verði við áform um hlutafélagavæðingu Orkuveitu Reykjavíkur og kallar eftir breytingum á lögum sem komi í veg fyrir að einkaaðilar eignist náttúruauðlindir. Þetta er meðal þess sem fram kemur í ályktun sem stjórn BSRB sendi frá sér í dag.

„Ég hvet íslenska fjölmiðla til þess að beina sjónum að mannréttindamálum í ríkari mæli en þeir gera og þá einnig að stöðu verkalýðshreyfingarinnar ekki síst í þeim löndum þar sem íslenskt „útrásarfólk" er á ferð. Það kann að vera góðra gjalda vert í einhverjum tilvikum að færa út kvíar á Balkanskaga og í Kína, svo dæmi séu tekin. En þá skyldu menn hafa í huga að hagnaður á kostnað mannréttinda er verri en enginn. Slíkur hagnaður á engan rétt á sér. Sú skylda hvílir á talsmönnum Íslands hvar sem þeir fara að halda fána mannréttinda hátt á loft," segir Ögmundur Jónasson formaður BSRB í grein á heimasíðu sinni þar sem fjallað er um árlega skýrslu Alþjóðasambands verkalýðsfélaga (ITUC)  um mannréttindabrot og ofsóknir á hendur verkalýðshreyfingunni í heiminum.

Ögmundur Jónasson formaður BSRB hvatti til þess í ræðu sem hann flutti á heimsþingi PSI, Samtaka launafólks i almannaþjónustu, að auknum kröftum og fjármagni verði varið, á vegum samtakanna til að rannsaka afleiðingar markaðs- og einkavæðingar grunnþjónustu samfélagsins. Nú væri komin reynsla af einkavæðingu undangenginna ára og tími til að vega og meta árangurinn. Mikilvægt væri að ríkisstjórnir og sveitarstjórnir gerðu sér grein fyrir því hvaða afleiðingar það hefði í för með sér þegar haldið væri út á braut einkavæðingar: „Við verðum að koma staðreyndum í þessum efnum á framfæri við heimsbyggðina og fylgja málflutningi okkar eftir á afgerandi hátt svo allir geri sér grein fyrir því að barátta okkar er í þágu allra." Ögmundur hefur setið í stjórn PSI undanfarið kjörtímabil og er í framboði til stjórnar PSI að nýju.

Fulltrúar BSRB á þinginu. F.v. Árni Stefán Jónsson, Þuríður Einarsdóttir og Ögmundur Jónasson.

28. þing Alþjóðasamtaka starfsmanna í almannaþjónustu, Public Services International, hófst í Vínarborg í gær, 24. september. Samtökin fagna 100 ára afmæli sínu um þessar mundir. Þingið stendur til 28. september. Á þinginu eru komnir saman 1500 fulltrúar frá öllum heimshornum og eru fulltrúar BSRB þar á þeðal.

Vika símenntunar verður haldin 24.-30. september 2007. Markmið viku símenntunar er að auka símenntun í atvinnulífinu og hvetja fólk til að leita sér þekkingar alla ævi. Í viku símenntunar 2007 er lögð áhersla á að ná til þeirra sem hafa litla formlega menntun og hvatt til þess að huga sérstaklega að læsi og lestrarörðugleikum á vinnustað. Miðvikudagurinn 26. september er árlegur símenntunardagur í fyrirtækjum og stofnunum.

Starfshópur á vegum stjórnar BSRB sem unnið hefur að endurskoðun á sí- og endurmenntunarmálum á vegum BSRB hefur skilað af sér áfangaskýrslu. Í skýrslunni eru lagðar fram tillögur í sjö liðum. Meðal þess sem lagt er til er að kannað verði nánara samstarf við ASÍ um fræðslumál en samtökin starfa þegar saman að slíkum málum á vettvangi Félagsmálaskóla alþýðu. Þá er lagt til að þessi samtök skoði að fara fram með sameiginlegar kröfur gagnvart stjórnvöldum í komandi kjarasamningum varðandi löggjöf um fullorðinsfræðslu og verulega fjármuni til hennar.

Öll félögin sem mynda Samflot starfsmannafélaga sveitarfélaga, fyrir utan Starfsmannafélag Kópavogs, ákváðu á fundi í dag að veita samflotinu fullnaðarumboð til samninga og að félögin munu greiða atkvæði í einu lagi um verðandi kjarasamning við Launanefnd sveitarfélaga. Samningur um þetta var undirritaður á fundi á Hótel Selfoss í dag.

Vika símenntunar verður haldin 24.-30. september 2007. Markmið viku símenntunar er að auka símenntun í atvinnulífinu og hvetja fólk til að leita sér þekkingar alla ævi. Í viku símenntunar 2007 er lögð áhersla á að ná til þeirra sem hafa litla formlega menntun og hvatt til þess að huga sérstaklega að læsi og lestrarörðugleikum á vinnustað.

Námsskrá Félagsmálaskóla alþýðu fyrir haustönn 2007 er nú tilbúin. Boðið er upp á ýmis námskeið sem gagnast launafólki í lífi og starfi. Annars vegar er um að ræða styttri námskeið sem eru eina dagstund og hins vegar tveggja daga námskeið. Meðal þess sem í boði er eru námskeið um jafnrétti og námshvatningu á vinnustað, námskeið um samningatækni, undirbúning kjarasamninga og lífið í Karphúsinu. Þá er í boði námskeið í ensku talmáli auk grunn- og framhaldsnámskeiðs fyrir trúnaðarmenn.

Ögmundur Jónasson formaður BSRB svarar nokkrum spurningum um stöðu verkalýðshreyfingarinnar í síðasta tölublaði BHM-tíðinda. Þar er hann m.a. spurður um hlutverk heildarsamtaka launafólks og telur hann þau hafa gegnt mikilvægu hlutverki í baráttunni fyrir réttindum launafólks. Þá segir hann að sér lítist vel á þá framtíðarsýn að allt launafólk á Íslandi sameinist í einum heildarsamtökum.

Hjúkrunarfræðingar á Landspítala-háskólasjúkrahúsi efna til fjöldagöngu gegn umferðarslysum á þriðjudaginn kemur, 26. júní, kl:17:00 til að vekja almenning til umhugsunar um afleiðingar hraðaksturs og þess að aka bíl undir áhrifum áfengis, fíkniefna eða lyfja. Hópur hjúkrunarfræðinga á spítalanum hafði frumkvæði að viðburðinum og hefur nú þegar fengið baráttukveðjur og stuðningsyfirlýsingar úr mörgum áttum, meðal annars úr röðum slökkviliðs- og sjúkraflutningamanna, lögreglumanna, lækna, sjúkraþjálfara, sjúkraliða, presta og iðjuþjálfara. Þá hafa forstjóri, hjúkrunarforstjóri og fleiri stjórnendur Landspítala-háskólasjúkrahúss lýst stuðningi við framtakið.

14. júní sl. var undirritað samkomulag milli aðildarfélaga BHM, BSRB og KÍ annars vegar og Reykjavíkurborgar hins vegar um fyrirkomulag á samráði og upplýsingamiðlun vegna starfsmanna borgarinnar. Samkomulagið tekur gildi 1. júlí nk. Markmið þess er að koma á skilvirku samráði með hagsmuni beggja aðila, borgarinnar og starfsmanna hennar, að leiðarljósi. Með samráðinu gefst tækifæri til að auka þátttöku fulltrúa starfsmanna í ákvörðunum sem varða störf borgarstarfsmanna, stöðu þeirra og  atvinnuöryggi.

Vilhjálmur Vilhjálmsson borgarstjóri ávarpaði gesti á ráðstefnu NTR í Höfða í gær. Hann greindi m.a. frá könnun sem borgin hefur látið gera meðal starfsmanna sinna. Tilgangur könnunarinnar var að afla upplýsinga um líðan starfsmanna í starfi og hvernig til hefði tekist með mannlega þáttinn á vinnustöðum. Meginniðurstaðan var þríþætt. Í fyrsta lagi kom fram að hæfni og áhugi starfsmanna var mjög mikill. Í öðru lagi að starfsmannastjórn væri í góðu lagi og í þriðja lagi að vinnuumhverfið væri gott.

Nýjungar í opinberri þjónustu er yfirskrift ráðstefnu NTR, Nordisk Tjänstemannaråd, sem hefst með móttöku Reykjavíkurborgar í Höfða í kvöld. NTR eru samtök starfsmannafélaga sveitarfélaga á Norðurlöndum. Ögmundur Jónasson formaður BSRB er núverandi formaður samtakanna.

BSRB leggst alfarið á móti því að afnumin verði sú skylda að auglýsa laus störf innan Stjórnarráðsins. BSRB varar við því að hróflað verði við auglýsingaskyldunni og telur mikilvægt að fólki séu gefin jöfn tækifæri til starfa og starfsframa innan Stjórnarráðsins. BSRB gerir hins vegar ekki athugasemdir við breytingar á ráðuneytum eða að Hagstofu Íslands verði breytt úr ráðuneyti í sjálfstæða ríkisstofnun, svo fremi breytingarnar hafi ekki áhrif á réttindi starfsmanna sem þær varða. Þetta kemur fram í umsögn BSRB um frumvarp til laga um breytingu á lögum um Stjórnarráð Íslands.

Framvegis, miðstöð símenntunar í Reykjavík, verður með íslenskunámskeið í júní. Er bæði um að ræða byrjendanámskeið og framhaldsnámskeið. Skráning er á netfanginu: skraning@framvegis.is
Courses in Icelandic for foreigners, both for beginners and students who have had a beginners course will be held at Framvegis in June. Register by email skraning@framvegis.is or call 5814914 between 10 am and 12 am.

11. þing ETUC, Evrópusamtaka verkalýðsfélaga var sett í 21. maí í Sevilla á Spáni. Yfirskrift þingsins er: Í sókn fyrir félagslega Evrópu, samstöðu og sjálfbærni.  Þinginu verður slitið á morgun 24. maí. Fulltrúar BSRB á þinginu eru Garðar Hilmarsson formaður Starfsmannafélags Reykjavíkurborgar og Páll H. Hannesson alþjóðafulltrúi BSRB.

Edda R. Davíðsdóttir var kjörin nýr formaður Starfsmannafélags Mosfellsbæjar á aðalfundi félagsins. Edda tekur við af Sveingerði Hjartardóttur.

Hæstiréttur hefur dæmt uppsögn tölvunarfræðingsins Salmann Tamimi ólöglega en Landspítalinn háskólasjúkrahús sagði honum upp vegna skipulagsbreytinga. Áður hafði héraðsdómur dæmt uppsögnina löglega. Salmann Tamimi er félagsmaður í Starfsmannafélagi Reykjavíkurborgar.

Breytingar urðu á stjórn Félags flugmálastarfsmanna ríkisins á aðalfundi félagsins 27. apríl sl. Jóhannes Long tók við formennskunni af Hallgrími Hallgrímssyni. Aðrir í stjórn eru Þorleifur Már Friðjónsson varaformaður, Ragnheiður Júlíusdóttir gjaldkeri, Guðmundur Móeses Björnsson ritari og Ástrós Friðbjarnadóttir meðstjórnandi.

Á morgun 1. maí, alþjóðlegum baráttudegi verkamanna, verða haldnir baráttufundir um allt land. Er launafók hvatt til að fjölmenna á fundina. Í Reykjavík verður safnast saman á Hlemmi kl. 13.00. Gangan leggur af stað kl. 13.30. Lúðrasveit verkalýðsins og Lúðrasveitin Svanur leika fyrir göngu. Gengið niður Laugaveg, Bankastræti, Austurstræti og inn á Ingólfstorg. Útifundur á Ingólfstorgi hefst kl. 14.10. Útifundur lýkur kl. 15.00.

"Á tímum aukins misréttis og vaxandi ójafnaðar í tekjuskiptingu þjóðarinnar er mikilvægt að launafólk snúi bökum saman til að bæta kjör launafólks og vinna að því að útrýma fátækt í landinu. Yfir 5000 börn á Íslandi lifa undir fátæktarmörkum. Bilið milli ofurlaunamanna og þeirra sem lifa á almennum launakjörum  breikkar stöðugt.  Þeir sem hafa lifibrauð sitt af fjármagnstekjum búa við allt aðra skattlagningu  en almennt launafólk. Þetta misrétti í launa- og skattamálum verður að uppræta." Á þessum orðum hefst 1. maí ávarp samtaka launafólks í Reykjavík.

Í vikunni var haldinn ársfundur norrænna verkalýðsfélaga (NOFS) sem aðild eiga að Evrópusamtökum launafólks innan almannaþjónustunnar (EPSU og EUREC). Á fundinum var fjallað almennt um starfsemi Evrópusamtakanna og þá sérstaklega aðkomu þeirra að þjónustutilskipun Evrópusambandsins. Mestur hluti fundarins fór í umræðu um vinnumarkaðsmál og viðbrögð ríkisstjórna á Norðurlöndum við þeim hluta tilskipunarinnar sem snýr að vinnumarkaði.

Aðalfundur KJALAR var haldinn í þriðja sinn 20. mars. Fundurinn var sendur út í gegnum fjarfundabúnað frá Akureyri og Siglufirði til sex staða samtímis, þ.e. Dalvík, Skagaströnd, Blönduós, Hvammstangi, og Borgarbyggð,sem er nýlunda. Skýrsla stjórnar, flutt af formanni félagsins Örnu Jakobínu, var send út frá Akureyri, en reikningana kynnti gjaldkerinn Hörður Þór frá Siglufirði.

Mikilvægur þáttur í baráttunni gegn fátækt og baráttunni fyrir jafnrétti kynjanna í þróunarríkjunum og hinum fátækari ríkjum heims er að tryggja öllum íbúum öruggan og auðveldan aðgang að ómenguðu vatni. Í tengslum við alþjóðlegan baráttudag kvenna 8. mars hvetja alþjóðleg samtök opinberra starfsmanna, með Public Services International (PSI) í broddi fylkingar, ríkisstjórnir heims til að endurnýja heit sín um eitt af þúsaldarmarkmiðum Sameinuðu þjóðanna sem meiningin er að líti dagsins ljós fyrir árið 2015 – að þá hafi tekist að tengja við vatnsveitur um helming þeirra heimila sem hafa verið ótengd og haft óviðunandi aðgang að vatni. Skortur á hreinu vatni kemur verst niður á konum og börnum. PSI skorar á ríkisstjórnir heims að axla samfélagslega ábyrgð. Málefni er snerta vatn og vatnsveitur eigi að vera á höndum opinberra aðila. Tilraunir til einkavæðingar hafi engan vanda leyst.

Janúartölublað Dreifibréfs BSRB er komið á vefinn. Í Dreifibréfinu er fjallað um þróun eigna og skulda íslenskra heimila, Réttindakerfi lífeyrissjóðanna og Vefnám trúnaðarmanna. Sjá Dreifibréfið

Nú er tilvalið að skella sér í Munaðarnes um helgina, njóta veðurblíðunnar. Hvað er unaðslegra eftir hátíðirnar en að liggja í heitum potti og stara upp í stjörnubjartan himin. Hægt er að panta húsin á skrifstofu BSRB í síma 525 8300 eða á netfangið bsrb@bsrb.is