Félagsmálaskóli alþýðu heldur opið trúnaðarmannanámskeið vikuna 5. – 9. febrúar.  Námskeiðið verður haldið í húsnæði Mímis – símenntunar, að Skeifunni 8, Reykjavík. Skráning fer fram hjá Mími símenntun í síma 580 1800 og í tölvupósti mimir@mimir.is. Skráningu lýkur 1. febrúar.

Dr. Ingi Rúnar Eðvarðsson prófessor við Háskólann á Akureyri heldur fyrirlestur í boði Rannsóknastofu í vinnuvernd mánudaginn 22. janúar kl. 16.15 um - þekkingarstjórnun í íslenskum smáfyrirtækjum. Fyrirlesturinn verður í Háskóla Íslands, stofu 301 í Árnagarði.

BHM og BSRB hafa sent frá sér sameiginlega yfirlýsingu vegna þeirrar yfirlýsingar sem Páll Magnússon útvarpsstjóri sendi starfsmönnum RÚV í nóvember sl. þar sem hann lýsti því yfir að öll kjör starfsmanna muni haldast óbreytt við breytingu á rekstrarformi Ríkisútvarpsins. BHM og BSRB eru sammála um að þessi yfirlýsing bæti engu við það sem fram kemur í sjálfu frumvarpinu þrátt fyrir ítrekaðar óskir samtakanna um breytingar.

Í desember 2006 var gert samkomulag milli Lífeyrissjóðs starfsmanna Akureyrarbæjar (LSA) og félagsmanns í Kili-stéttarfélagi starfsmanna í almannaþjónustu í tengslum við hæstaréttarmál sem BSRB stóð að.  LSA hafði verið sýknaður af kröfum félagsmannsins fyrir héraðsdómi 25. júlí 2005.

Vinnueftirlitið býður til ráðstefnu um áhættumat og forvarnir á vinnustöðum á Grand Hótel þriðjudaginn 23. janúar kl. 13-16. Á ráðstefnunni verða kynnt ný ákvæði reglugerðar nr. 920/2006 um skyldu atvinnurekenda til að gera áætlun um öryggi og heilbrigði á vinnustað. Einnig munu fulltrúar fyrirtækja greina frá reynslu sinni af áhættumati og forvörnum í starfi. Í lokin verða pallborðsumræður með fulltrúum stjórnvalda og fulltrúum atvinnurekenda og launþega. Aðgangur er ókeypis.

Námskrá Framvegis, miðstöðvar um símenntun, fyrir vorönn 2007 er nú komin. Að venju er fjölbreytnin mikil og ættu flestir að geta fundið eitthvað við sitt hæfi. Námskrána er hægt að nálgast hér.

Ögmundur Jónasson formaður BSRB sagði að BSRB stæði á því fastar en fótunum að uppsagnirnar í Snæfellsbæ sl. sumar hafi verið ólögmætar enda tæki frávísun Hæstaréttar ekkert á lögmæti uppsagnanna heldur vísaði málinu frá á lagatæknilegum forsendum. „Við teljum að fólki hafi verið sagt upp á ómálefnalegum forsendum og eftir stendur að einn starfsmaður, trúnaðarmaður Starfsmannafélags Dala- og Snæfellsnessýslu, hefur ekki verið endurráðinn. Niðurstaða í því grafalvarlega máli fæst vonandi á næstu mánuðum. Þessi mál hafa því ekki verið til lykta leidd.“

Þann 10. nóvember 2006 féll dómur, lögreglumanni í hag þar sem viðurkennd var greiðsluskylda ríkisins á vangreiddum vöxtum á laun sem greidd voru lögreglumanninum í maí 2004. Lögreglumaðurinn sem höfðaði málið er félagsmaður í Landssambandi lögreglumanna (LL) en BSRB greiddi kostnað vegna reksturs málsins.

Starfsmannafélag Akraness sameinaðist Starfsmannafélagi Reykjavíkurborgar nú um áramótin. Markmiðið með sameiningunni er að efla samtakamátt og samningsstöðu félaganna og um leið að auka þjónustu til félagsmanna. Talsverður fjöldi félagsmanna STAK starfar hjá Orkuveitu Reykjavíkur og Faxaflóahöfnum sem bæði St.Rv. og STAK hafa samið við.