Hátt í 300 manns mættu á jólaball SFR og Starfsmannafélags Reykjavíkurborgar sem haldið var í Súlnasal Hótel Sögu í dag. Hljómsveit hússins stýrði fjörinu og naut dyggrar aðstoðar frískra barna sem sungu og dönsuðu af krafti. Hápunktur skemmtunarinnar var svo að sjálfsögðu þegar jólasveinarnir birtust og tóku á svipstundu öll völd í sínar hendur.

"Í kjarasamningum sem gerðir verða á næstu mánuðum og misserum er nauðsynlegt að hafa í huga mikilvægi þess að draga stórlega úr kjaramisréttinu í samfélaginu. Misréttið verður að sjálfsögðu ekki upprætt í kjarasamningum einvörðungu. Í slíkum samningum er hins vegar hægt að leggja lóð sín á vogarskál aukins réttlætis á vinnumarkaði. Það má gera með því að bæta stórlega kjör láglauna- og millitekjuhópa," segir m.a. í grein eftir Þuríði Einarsdóttur formann Póstmannafélags Íslands og Ögmund Jónasson formann BSRB sem birtist í Morgunblaðinu í dag.

Reglum um greiðslur Fjölskyldu- og styrktarsjóðs BHM, BSRB og KÍ (FOS) í fæðingarorlofi var breytt 1. júní sl. Þá var horfið frá tekjutengdum greiðslum til mæðra og þess í stað greiddir fæðingarstyrkir til foreldra. Styrkirnir eru jafnháir til karla og kvenna en hliðsjón höfð af starfshlutfalli.  Breytingin varðar foreldra barna sem fæðst hafa eftir 1. júní. Í dag er greiðsla miðað við 100% starf 170 þúsund krónur. Í gildi verður að vera ráðningarsamningur við upphaf fæðingarorlofs. Hægt er að nálgast umsóknareyðublöð á heimasíðu sjóðsins http://www.fos.is/

"Enda þótt manneklan í sjúkra- og aðhlynningarstörfum hafi í för með sér alvarlegustu afleiðingarnar og geti hreinlega leitt til neyðarástands fyrir skjólstæðinga velferðarþjónustunnar verður einnig að skoða af miklu raunsæi hvað gerist ef erfiðleikum er háð að manna almenn skrifstofustörf. Án skipulagningar starfseminnar, bókhalds og annars utanumhalds um rekstur skapast fljótlega ringulreið. Fjármálastofnanir sem á undanförnum árum hafa vaxið og dafnað sem aldrei fyrr soga nú til sín starfsfólk og oftast á mun betri launakjörum en ríki og sveitarfélög bjóða upp á. Ef launakjörin á þessum sviðum opinberrar stjórnsýslu verða ekki löguð í komandi kjarasamningum er ljóst að ríki og sveitarfélög geta ekki keppt við einkamarkaðinn," segir m.a. í grein eftir Garðar Hilmarsson formann Starfsmannafélags Reykjavíkur og Kristínu Á. Guðmundsdóttur formann Sjúkraliðafélags Íslands, sem birtist í Morgunblaðinu í dag.

"Í könnun sem framkvæmd var á vegum SFR - stéttarfélags í almannaþjónustu kom til dæmis í ljós að launamunur var að meðaltali um 20% milli starfsmanna á almennum vinnumarkaði og þeirra sem vinna hjá hinu opinbera. Þessi munur kom bæði fram þegar bornar voru saman sambærilegar starfsgreinar og einnig þegar borin voru saman sambærileg störf eða starfsheiti. Í samanburðinum milli starfa var munurinn allt upp í 39% milli sambærilegra starfa," segir í grein sem birtist í Morgunblaðinu í gær, 9. desember. Greinin er rituð af þeim Árna Stefáni Jónssyni og Elínu Björgu Jónsdóttur varaformönnum BSRB.

Í hádeginu í dag var undirritað samkomulag um rekstur Ráðgjafarstofu um fjárhag heimilanna til næstu fimm ára, eða til 31. desember 2012. Alls eru það 16 aðilar sem standa að rekstri Ráðgjafarstofunnar en það eru: félagsmálaráðuneytið, Íbúðalánasjóður, Reykjavíkurborg, Kaupþing, Glitnir, Landsbanki Íslands, Samband íslenskra sparisjóða, Samband íslenskra sveitarfélaga, Þjóðkirkjan, Landssamtök lífeyrissjóða, ASÍ, BSRB, BHM, Rauði kross Íslands, Kópavogsbær og Kreditkort. Þessir aðilar hafa allir staðið að rekstri Ráðgjafarstofunnar undanfarin ár fyrir utan Kreditkort sem er nýr aðili að samkomulaginu. Kreditkort hefur þó verið styrktaraðili Ráðgjafarstofunnar til margra ára.

Almennur fundur Reykjavíkurdeildar Sjúkraliðafélags Íslands krefst róttækra umbóta á heilbrigðisstofnunum og vekur athygli á að mikill skortur á hjúkrunarfólki og aukið álag vegna mannfæðar gerir kröfu til heilbrigðisráðherra um róttækar umbætur og aðrar aðgerðir til að gera starfsfólki heilbrigðisstofnanna kleift að gegna störfum sínum. Fundurinn var haldinn í gær þriðjudaginn 4. desember í BSRB húsinu að Grettisgötu 89.