Grunnnámskeið fyrir trúnað­armenn í Munaðarnesi dagana 6. og 7. mars. Dagskrá námskeiðsins verður með svipuðu sniði og undanfarin ár. Þátttakendur á námskeiðinu mæta í Munaðarnesi á hádegi þriðjudagsins 6. mars og fer rúta frá BSRB-húsinu, Grettisgötu 89, kl. 10.00. Námskeiðinu lýkur síðdegis 7. mars. Rútan fer frá Munaðarnesi kl. 17.15. Þeir sem hafa áhuga á þátttöku eru beðnir að hafa samband við skrifstofu BSRB, Grettisgötu 89, í síma 525 8300 fyrir 2. mars.

Trúnaðarmannafundur SFR í gær samþykkti ályktun um að afar mikilvægt sé að fylgst sé að fylgst verði vandlega með þróun matvælaverðs í aðdraganda þess að virðisaukaskattur á matvæli lækkar 1. mars nk. Mikilvægt sé að skattabreytingin skili sér í kaupmáttaraukningu launafólks en verði ekki „stolið“ með hækkun á álagningu birgja og kaupmanna.

Bandalag starfsmanna ríkis og bæja var stofnað í Reykjavík 14. febrúar árið 1942 og fagnar því 65 ára afmæli sínu í dag. Tilkoma heildarsamtakanna hleypti nýjum krafti í kjarabaráttu opinberra starfsmanna. Þegar á fyrstu starfsárunum náðu BSRB og aðildarfélögin umtalsverðum árangri í réttinda- og kjaramálum. Skýrt dæmi þar um eru lög um lífeyrissjóð starfsmanna ríkisins frá árinu 1943. Fyrir nýstofnuð samtök var lífeyrissjóðslöggjöfin mikill sigur og sést ef til vill best á því að það var ekki fyrr en aldarfjórðungi síðar að farið var að stofna almenna lífeyrissjóði fyrir launafólk.

Félag áfengisráðgjafa hefur hlotið aðild að SFR sem deild. Félag áfengisráðgjafa sem stofnað var 1994 hefur starfað sem fagfélag frá stofnfundi en flestir félagsmanna hafa átt stéttarfélagsaðild að SFR og starfað samkvæmt kjarasamningum SFR og vinnuveitenda. Í atkvæðagreiðslu þar sem kosið var um hvort FÁR ætti að gerast sjálfstætt stéttarfélag eða óska eftir því að verða deild innan SFR, var síðari kosturinn valinn með nærri 90 prósentum greiddra atkvæða.

Annar hádegisfyrirlestur Rannsóknastofu í vinnuvernd á þessu ári verður mánudaginn 12. febrúar kl. 12:00 – 13.00 í Háskóla Íslands, Lögbergi stofu 103. Fyrirlesturinn er öllum opinn. Þá mun Anh-Dao Tran, menntunarráðgjafi og verkefnisstjóri Framtíðar í nýju landi halda fyrirlestur sem hún nefnir: Staða ungmenna af erlendum uppruna á íslenskum vinnumarkaði og hlutverk atvinnurekenda.

Í gær efndi Verkalýðsfélagið Hlíf í Hafnarfirði til glæsilegs fagnaðar í tilefni þess að liðin eru eitt hundrað ár frá stofnun félagsins. Efnismikil og fjölbreytt dagskrá var á hátíðasamkomunni þar sem áfangar í sögu félagsins voru rifjaðir upp, ávörp flutt og boðið var upp á skemmtiatriði af ýmsum toga. Borð svignuðu undan veitingum. Athygli vekur að stofnendur Hlífar voru af báðum kynjum. Engu að síður varð þróunin sú að samhliða Hlíf þróaðist síðar Verkakvennafélagið Framtíðin. Þessi tvö félög, Framtíðin og Hlíf, sameinuðust síðan í eitt félag – Verkalýðsfélagið Hlíf árið 1999. Ögmundur Jónasson, formaður BSRB, var viðstaddur hátíðahöldin í gær og færði formanni Hlífar, Kolbeini Gunnarssyni, kveðjur bandalagsins.