Kristín Á. Guðmundsdóttir var endurkjörin formaður Sjúkraliðafélags Íslands með 64% atkvæða. Kosningaþátttaka var 66%. Formannskjör fer fram á þriggja ára fresti.

11. þing ETUC, Evrópusamtaka verkalýðsfélaga var sett í 21. maí í Sevilla á Spáni. Yfirskrift þingsins er: Í sókn fyrir félagslega Evrópu, samstöðu og sjálfbærni.  Þinginu verður slitið á morgun 24. maí. Fulltrúar BSRB á þinginu eru Garðar Hilmarsson formaður Starfsmannafélags Reykjavíkurborgar og Páll H. Hannesson alþjóðafulltrúi BSRB.

Edda R. Davíðsdóttir var kjörin nýr formaður Starfsmannafélags Mosfellsbæjar á aðalfundi félagsins. Edda tekur við af Sveingerði Hjartardóttur.

Hæstiréttur hefur dæmt uppsögn tölvunarfræðingsins Salmann Tamimi ólöglega en Landspítalinn háskólasjúkrahús sagði honum upp vegna skipulagsbreytinga. Áður hafði héraðsdómur dæmt uppsögnina löglega. Salmann Tamimi er félagsmaður í Starfsmannafélagi Reykjavíkurborgar.

Breytingar urðu á stjórn Félags flugmálastarfsmanna ríkisins á aðalfundi félagsins 27. apríl sl. Jóhannes Long tók við formennskunni af Hallgrími Hallgrímssyni. Aðrir í stjórn eru Þorleifur Már Friðjónsson varaformaður, Ragnheiður Júlíusdóttir gjaldkeri, Guðmundur Móeses Björnsson ritari og Ástrós Friðbjarnadóttir meðstjórnandi.

Íslenskukennsla Framvegis í samvinnu við Alþjóðahús
Kennsla í íslensku 1 fyrir byrjendur hefst mánudaginn 14. maí. Námskeiðin eru 30 kennslustundir. Kennt er á mánudögum og miðvikudögum klukkan 17- 19 og frá klukkan 19 - 21 eða á þriðjudögum og fimmtudögum frá klukkan 19 - 21. Íslenska 2 er einnig 30 kennslustundir og fer kennsla fram á þriðjudögum og fimmtudögum frá klukkan 17 - 19. Íslenska 3 verður auglýst sérstaklega.

Guðbjörg Jónsdóttir fjármálastjóri BSRB hefur látið af störfum og Drífa Valdimarsdóttir tekið við störfum hennar. Drífa starfaði áður á fjármálasviði Reykjavíkurborgar. Þá hefur Erna Guðmundsdóttir lögfræðingur BSRB hætt störfum en enn hefur ekki verið ráðið í hennar stað. BSRB þakkar þeim Guðbjörgu og Ernu góð störf til fjölmargra ára og óskar þeim velfarnaðar á nýjum vettvangi.

Fjölmennir baráttufundir voru haldnir víða um land í gær. Í Reykjavík fór kröfuganga frá Hlemmi og var gengið á Ingólfstorg þar sem þar sem mikið fjölmenni safnaðist saman og hlýddi á kröftugar ræður Grétars Þorsteinssonar forseta ASÍ og Kristínar Á. Guðmundsdóttur formanns Sjúkraliðafélags Íslands. Kristín Á. sagði m.a. að jafnaðarhugsjónin væri aðalsmerki verkalýðshreyfingarinnar. Eftir fundinn var að venju boðið upp á kaffi og með því í BSRB húsinu og komu um 800 manns.

Ögmundur Jónasson formaður BSRB sagði í 1. maí ræðu á Akureyri í dag að tryggja yrði stöðugleika í efnahagslífinu, ná yrði niður vöxtum og verðbólgu og útrýma fátækt. Koma yrði í veg fyrir klofning í þjóðfélaginu og hann hvatti til umburðarlyndis í umræðunni um erlent verkafólk. Hann sagði að umburðarlyndið yrði að ná til allra, líka þeirra sem vöruðu við ofþenslu á vinnumarkaði. Ögmundur beindi orðum sínum til auðmanna og sagði að frelsið væri ekki bara fyrir hinn fjáða.

Grundvallarhugsjón verkalýðshreyfingarinnar er og hefur ætíð verið jöfnuður:
Jöfnuður í formi réttinda
Jöfnuður í formi réttlætis
Jöfnuður í formi bræðralags
Jafnaðarhugsjónin hefur verið og er eitt af aðalsmerkjum verkalýðshreyfingarinnar um heim allan," sagði Kristín Á. Guðmundsdóttir í upphafi ræðu sinnar á fjölmennum baráttufundi samtaka launafólks á Ingólfstorgi í dag 1. maí. Gengið var frá Hlemmi á Ingólfstorg og léku Lúðrasveit verkalýðsins og Lúðrasveitin Svanur fyrir göngufólk. Á Ingólfstorgi fluttu Grétar Þorsteinsson forseti ASÍ og Kristín Á. Guðmundsdóttir formaður SLFÍ ávörp og hljómsveitin Baggalútur skemmti fundargestum.