Hjúkrunarfræðingar á Landspítala-háskólasjúkrahúsi efna til fjöldagöngu gegn umferðarslysum á þriðjudaginn kemur, 26. júní, kl:17:00 til að vekja almenning til umhugsunar um afleiðingar hraðaksturs og þess að aka bíl undir áhrifum áfengis, fíkniefna eða lyfja. Hópur hjúkrunarfræðinga á spítalanum hafði frumkvæði að viðburðinum og hefur nú þegar fengið baráttukveðjur og stuðningsyfirlýsingar úr mörgum áttum, meðal annars úr röðum slökkviliðs- og sjúkraflutningamanna, lögreglumanna, lækna, sjúkraþjálfara, sjúkraliða, presta og iðjuþjálfara. Þá hafa forstjóri, hjúkrunarforstjóri og fleiri stjórnendur Landspítala-háskólasjúkrahúss lýst stuðningi við framtakið.

Lokið er í Reykjavík ráðstefnu Samtaka opinberra starfsmanna á Norðurlöndum, NTR. Á ráðstefnunni var rætt um nýsköpunarstarf innan almannaþjónustunnar og ákveðið að efna til viðræðna við félagsmálaráðherra Norðurlandanna um leiðir til að þróa norræna velferðarkerfið. Eftirfarandi ályktun var samþykkt í lok ráðstefnunnar: „Mikilvægt er að virkja alla þá orku sem býr með starfsmönnum almannaþjónustunnar, samfélaginu til hagsbóta. Miklu skiptir að allir þeir sem stýra velferðarþjónustunni og starfa við hana verði meðvitaðir um nauðsyn þess að reyna stöðugt nýjar leiðir og breytt fyrirkomulag ..."

14. júní sl. var undirritað samkomulag milli aðildarfélaga BHM, BSRB og KÍ annars vegar og Reykjavíkurborgar hins vegar um fyrirkomulag á samráði og upplýsingamiðlun vegna starfsmanna borgarinnar. Samkomulagið tekur gildi 1. júlí nk. Markmið þess er að koma á skilvirku samráði með hagsmuni beggja aðila, borgarinnar og starfsmanna hennar, að leiðarljósi. Með samráðinu gefst tækifæri til að auka þátttöku fulltrúa starfsmanna í ákvörðunum sem varða störf borgarstarfsmanna, stöðu þeirra og  atvinnuöryggi.

Vilhjálmur Vilhjálmsson borgarstjóri ávarpaði gesti á ráðstefnu NTR í Höfða í gær. Hann greindi m.a. frá könnun sem borgin hefur látið gera meðal starfsmanna sinna. Tilgangur könnunarinnar var að afla upplýsinga um líðan starfsmanna í starfi og hvernig til hefði tekist með mannlega þáttinn á vinnustöðum. Meginniðurstaðan var þríþætt. Í fyrsta lagi kom fram að hæfni og áhugi starfsmanna var mjög mikill. Í öðru lagi að starfsmannastjórn væri í góðu lagi og í þriðja lagi að vinnuumhverfið væri gott.

Nýjungar í opinberri þjónustu er yfirskrift ráðstefnu NTR, Nordisk Tjänstemannaråd, sem hefst með móttöku Reykjavíkurborgar í Höfða í kvöld. NTR eru samtök starfsmannafélaga sveitarfélaga á Norðurlöndum. Ögmundur Jónasson formaður BSRB er núverandi formaður samtakanna.

BSRB leggst alfarið á móti því að afnumin verði sú skylda að auglýsa laus störf innan Stjórnarráðsins. BSRB varar við því að hróflað verði við auglýsingaskyldunni og telur mikilvægt að fólki séu gefin jöfn tækifæri til starfa og starfsframa innan Stjórnarráðsins. BSRB gerir hins vegar ekki athugasemdir við breytingar á ráðuneytum eða að Hagstofu Íslands verði breytt úr ráðuneyti í sjálfstæða ríkisstofnun, svo fremi breytingarnar hafi ekki áhrif á réttindi starfsmanna sem þær varða. Þetta kemur fram í umsögn BSRB um frumvarp til laga um breytingu á lögum um Stjórnarráð Íslands.

Félag íslenskra flugumferðarstjóra er orðið aðili að BSRB. Eftir atkvæðagreiðslu í félaginu sótti það um aðild að BSRB og var aðildin samþykkt með dúndrandi lófataki á stjórnarfundi BSRB 1. júní sl.

Framvegis, miðstöð símenntunar í Reykjavík, verður með íslenskunámskeið í júní. Er bæði um að ræða byrjendanámskeið og framhaldsnámskeið. Skráning er á netfanginu: skraning@framvegis.is
Courses in Icelandic for foreigners, both for beginners and students who have had a beginners course will be held at Framvegis in June. Register by email skraning@framvegis.is or call 5814914 between 10 am and 12 am.

Mikið fjölmenni var á menningarhátíð BSRB í Munaðarnesi á laugardaginn þegar myndlistarsýning Guðbjargar Hákonardóttur, Guggu, var opnuð. Steinunn Sigurðardóttir las úr verkum sínum og Auður Hafsteinsdóttir, Bryndís Halla Gylfadóttir og Steinunn Birna Ragnarsdóttir fluttu hrífandi tónlist.

Skýrsla um aðbúnað og viðhorf vaktavinnufólks sem unnin var af Rannsóknastofu í vinnuvernd var kynnt á mjög fjölmennum fundi í BSRB húsinu í morgun. Skýrslan var unnin fyrir starfshóp á vegum BHM, BSRB, ríkisins, Reykjavíkurborgar og Launanefndar sveitarfélaga. Það var Ólöf Eiríksdóttir frá Rannsóknastofu í vinnuvernd sem kynnti skýrsluna.

Árleg menningarhátíð BSRB verður haldin í Munaðarnesi nk. laugardag, 9. júní kl. 14.00. Opnuð verður sýning á verkum Guðbjargar Hákonardóttur – Guggu. Á hátíðinni verður að venju boðið upp á tónlist og upplestur. Auður Hafsteinsdóttir fiðluleikari, Bryndís Halla Gylfadóttir sellóleikari og Steinunn Birna Ragnarsdóttir píanóleikari flytja tónlist. Steinunn Sigurðardóttir les úr eigin verkum. Þá flytur Ögmundur Jónasson formaður BSRB ávarp. Boðið er upp á veitingar. Sýningin er opin á afgreiðslutíma veitingahússins Kaffi Paradís til 1. október.