Alþjóðasamtök starfsmanna í almannaþjónustu, Public Services International, PSI, urðu 100 ára gömul í vikunni. Í marsmánuði árið 1907 boðaði framkvæmdastjóri Bandalags starfsmanna ríkis og bæja, "Verband der Gemeinde- und Staatsarbeiter", í Þýskalandi „verkamenn er starfa hjá sveitarfélögum og ríki, í orkuverum, í gas- og vatnsveitum allra landa" til „fyrstu alþjóðlegu ráðstefnunnar" dagana 25.-27. ágúst 1907 og fór fundurinn fram í borginni Stuttgart í Þýskalandi.

Ögmundur Jónasson formaður BSRB svarar nokkrum spurningum um stöðu verkalýðshreyfingarinnar í síðasta tölublaði BHM-tíðinda. Þar er hann m.a. spurður um hlutverk heildarsamtaka launafólks og telur hann þau hafa gegnt mikilvægu hlutverki í baráttunni fyrir réttindum launafólks. Þá segir hann að sér lítist vel á þá framtíðarsýn að allt launafólk á Íslandi sameinist í einum heildarsamtökum.

Formannaskipti urðu í Starfsmannafélagi Garðabæjar fyrr í sumar. Gunnar Richardson lét af formennsku og við tók Gunnar Erlingsson.