Fulltrúar BSRB á heimsþingi PSI. F.v.: Þuríður Einarsdóttir, Anna Atladóttir, Páll H. Hannesson, Árni Stefán Jónsson, Kristín Á. Guðmundsdóttir, Ögmundur Jónasson, Vernharð Guðnason og Þórarinn Eyfjörð.

„Þetta hefur verið mjög kröftugt þing og það segir sig sjálft að þegar fólk kemur saman úr öllum heimshornum þá beinast sjónir manna helst að þeim sem eiga við mikið andstreymi að stríða," sagði Ögmundur Jónasson formaður BSRB um heimsþing PSI, alþjóðasamtaka launafólks í almannaþjónustu. Þinginu lýkur í dag í Vínarborg.

Ögmundur Jónasson formaður BSRB hvatti til þess í ræðu sem hann flutti á heimsþingi PSI, Samtaka launafólks i almannaþjónustu, að auknum kröftum og fjármagni verði varið, á vegum samtakanna til að rannsaka afleiðingar markaðs- og einkavæðingar grunnþjónustu samfélagsins. Nú væri komin reynsla af einkavæðingu undangenginna ára og tími til að vega og meta árangurinn. Mikilvægt væri að ríkisstjórnir og sveitarstjórnir gerðu sér grein fyrir því hvaða afleiðingar það hefði í för með sér þegar haldið væri út á braut einkavæðingar: „Við verðum að koma staðreyndum í þessum efnum á framfæri við heimsbyggðina og fylgja málflutningi okkar eftir á afgerandi hátt svo allir geri sér grein fyrir því að barátta okkar er í þágu allra." Ögmundur hefur setið í stjórn PSI undanfarið kjörtímabil og er í framboði til stjórnar PSI að nýju.

28. þing Alþjóðasamtaka starfsmanna í almannaþjónustu, Public Services International, hófst í Vínarborg í gær, 24. september. Samtökin fagna 100 ára afmæli sínu um þessar mundir. Þingið stendur til 28. september. Á þinginu eru komnir saman 1500 fulltrúar frá öllum heimshornum og eru fulltrúar BSRB þar á þeðal.

Vika símenntunar verður haldin 24.-30. september 2007. Markmið viku símenntunar er að auka símenntun í atvinnulífinu og hvetja fólk til að leita sér þekkingar alla ævi. Í viku símenntunar 2007 er lögð áhersla á að ná til þeirra sem hafa litla formlega menntun og hvatt til þess að huga sérstaklega að læsi og lestrarörðugleikum á vinnustað. Miðvikudagurinn 26. september er árlegur símenntunardagur í fyrirtækjum og stofnunum.

Starfshópur á vegum stjórnar BSRB sem unnið hefur að endurskoðun á sí- og endurmenntunarmálum á vegum BSRB hefur skilað af sér áfangaskýrslu. Í skýrslunni eru lagðar fram tillögur í sjö liðum. Meðal þess sem lagt er til er að kannað verði nánara samstarf við ASÍ um fræðslumál en samtökin starfa þegar saman að slíkum málum á vettvangi Félagsmálaskóla alþýðu. Þá er lagt til að þessi samtök skoði að fara fram með sameiginlegar kröfur gagnvart stjórnvöldum í komandi kjarasamningum varðandi löggjöf um fullorðinsfræðslu og verulega fjármuni til hennar.

Niðurstaða launakönnunar sem SFR - stéttarfélag í almannaþjónustu stóð að sl. vor í samvinnu við Verzlunarmannafélag Reykjavíkur sýnir að launamunur á milli ríkisstarfsmanna og starfsmanna á almennum vinnumarkaði er 20 - 30%. Launakönnunin gefur ítarlegar upplýsingar um kaup og kjör ríkisstarfsmanna og veitir mikilvægar upplýsingar um launamun á opinberum og almennum vinnumarkaði. Niðurstaða könnunarinnar er sláandi þegar kemur að samanburði milli ríkisstarfsmanna og starfsmanna á almennum markaði. Þannig er heildarlaunamunur milli ríkisstarfsmanna og starfsmanna á almennum markaði að meðaltali 20%. Þegar einstaka starfahópar eru hins vegar skoðaðir þá er munurinn allt upp í 30%! Þessi launamunur á sér engar eðlilegar skýringar.

Öll félögin sem mynda Samflot starfsmannafélaga sveitarfélaga, fyrir utan Starfsmannafélag Kópavogs, ákváðu á fundi í dag að veita samflotinu fullnaðarumboð til samninga og að félögin munu greiða atkvæði í einu lagi um verðandi kjarasamning við Launanefnd sveitarfélaga. Samningur um þetta var undirritaður á fundi á Hótel Selfoss í dag.

Leikhópurinn Á senunni býður félagsmönnum í BSRB og fjölskyldum þeirra tilboð á hinn frábæra og bráðfjöruga fjölskyldusöngleik Abbababb! eftir Dr. Gunna í leikstjórn Maríu Reyndal.  Abbababb! var frumsýnt í Hafnarfjarðarleikhúsinu sunnudaginn 11. febrúar við gríðarleg fagnaðarlæti frumsýningargesta og frábæra dóma gagnrýnenda og gekk fyrir fullu húsi fram á vorið. Í júní sl hlaut sýningin Grímuna, íslensku leiklistarverðlaunin, sem besta barnasýningin árið 2007.  Þá var Lára Stefánsdóttir tilnefnd til Grímunnar fyrir dansana í verkinu.  Þeir sem vilja leyfa sér og börnum sínum að njóta þurfa að hafa hraðar hendur, því verkið verður einungis sýnt í september og október.

Konur eru að jafnaði með fjórðungi lægri laun en karlar samkvæmt nýrri launakönnun sem SFR - stéttarfélag í almannaþjónustu lét gera meðal félagsmanna sinna. Samkvæmt könnuninni er kynbundinn launamunur 14,7% þegar tekið hefur verið tillit til aldurs, starfsaldurs, vinnutíma, starfsstéttar og menntunar. Þá kemur fram að mikill launamunur er meðal þeirra sem minnst bera úr býtum og þeirra sem eru með hæstu launin. Einnig sýnir könnunin fram á að laun félagsmanna í SFR eru mun lakari en laun félagsmanna VR í sambærilegum störfum.

Vika símenntunar verður haldin 24.-30. september 2007. Markmið viku símenntunar er að auka símenntun í atvinnulífinu og hvetja fólk til að leita sér þekkingar alla ævi. Í viku símenntunar 2007 er lögð áhersla á að ná til þeirra sem hafa litla formlega menntun og hvatt til þess að huga sérstaklega að læsi og lestrarörðugleikum á vinnustað.

Námsskrá Félagsmálaskóla alþýðu fyrir haustönn 2007 er nú tilbúin. Boðið er upp á ýmis námskeið sem gagnast launafólki í lífi og starfi. Annars vegar er um að ræða styttri námskeið sem eru eina dagstund og hins vegar tveggja daga námskeið. Meðal þess sem í boði er eru námskeið um jafnrétti og námshvatningu á vinnustað, námskeið um samningatækni, undirbúning kjarasamninga og lífið í Karphúsinu. Þá er í boði námskeið í ensku talmáli auk grunn- og framhaldsnámskeiðs fyrir trúnaðarmenn.