Útifundur til að mótmæla blóðsúthellingunum á Gaza verður haldinn á Lækjartorgi í dag, þriðjudag 30. desember kl. 16. Kröfur dagsins eru: Stöðvið fjöldamorð  Ísraelshers á Gaza. Slítum stjórnmálasambandi við Ísrael. Meðal ræðumanna er Ögmundur Jónasson formaður BSRB og fundarstjóri er Gylfi Arnbjörnsson forseti ASÍ.

 "Stjórn Félags íslenskra flugumferðarstjóra undrast að Kristján L. Möller samgönguráðherra skuli tilkynna fyrirvaralaust, án nokkurs samráðs við starfsfólk sem hlut á að máli, að ekkert verði af fyrirhuguðum flutningi flugleiðsöguþjónustu á Keflavíkurflugvelli til Flugstoða ohf. núna um áramótin," segir m.a. í yfirlýsingu frá félaginu. 

Sjúkraliðafélag Íslands skrifaði undir kjarasamning við Launanefnd sveitarfélaga í dag kl. 13. Samningurinn verður kynntur eftir áramót.

Grasrótarhreyfing óánægðra íbúa á Suðurlandi stendur fyrir útifundi við Landsbankann á Selfossi í hádeginu í dag kl 12:30. Frummælendur eru Elín Björg Jónsdóttir formaður Félags opinberra starfsmanna á Suðurlandi og varaformaður BSRB, Bjarni Harðarson bóksali og Sigríður Jónsdóttir kennari og ljóðskáld. 

Félagsmenn í Kili samþykktu kjarasamning við SA vegna Norðurorku. Á kjörskrá voru 23 og var full þátttaka í atkvæðagreiðslunni. 22 sögðu já en einn greiddi atkvæði á móti.

Einungis einn greiddi atkvæði gegn kjarasamningi Starfsmannafélags Garðabæjar við Launanefnd sveitarfélaga. Samningurinn var því samþykktur með 98,7% atkvæða.

Starfsmannafélag Suðurnesja samþykkti samning um framlengingu á kjarasamningi félagsins við Launanefnd sveitarfélaga. Á kynningarfundi í gær fór fram atkvæðagreiðsla og var samningurinn samþykktur með öllum greiddum atkvæðum.

KJÖLUR undirritaði kjarasamning við Norðurorku hf. í gær 15. desember. Samningurinn er á svipuðum nótum og gerðir hafa verið. Gildistími er frá 1. des. 2008 til 31. des. 2010. Samhliða undirskrift samnings við KJÖL var einnig undirritaður kjarasamningur Norðurorku og Einingar - Iðju.

Sjúkraliðafélag Íslands vann mál sem það höfðaði fyrir hönd Ásgerðar Júlíusdóttur sjúkraliða gegn einkafyrirtækinu Alhjúkrun. Héraðsdómur Reykjavíkur staðfesti að kjör sjúkraliða hjá einkareknum stofnunum sé ekki einkamál atvinnurekandans og beri að líta á kjarasamninga félagsins sem lágmarkskjör sjúkraliða. Var Alhjúkrun ehf dæmt til að greiða stefnanda 1.250 þúsund krónur auk dráttavaxta og 400 þúsund krónur í málskostnað.

"Réttur almennings til að mótmæla er ótvíræður og sýnir stjórn BSRB þeim mótmælum sem fram hafa farið að undanförnu mikinn skilning. Brotið hefur verið á almenningi og reiði fólks er mikil," segir í ályktun sem stjórn BSRB hefur sent frá sér.

Forsvarsmenn nokkurra lífeyrissjóða áttu í gær fund með Paul Hawken og John Picard, kunnum bandarískum sérfræðingum í umhverfisvernd og sjálfbærri þróun.  Þeir hvetja lífeyrissjóði til að beina fjárfestingum sínum í starfsemi þar sem sjálfbær þróun er höfð að leiðarljósi.

Tryggingastofnun ríkisins hefur ákveðið að við útreikning á tekjutengdum greiðslum til lífeyrisþega erlendis á árinu 2009 verði miðað við gengi íslensku krónunnar eins og það var í janúar 2008. Þetta kemur í framhaldi af því að BSRB barst bréf frá ellilífeyrisþega búsettum í Svíþjóð og var kveðja frá honum lesin upp á útifundinum á Ingólfstorgi 24. nóvember.

Starfsmannafélag Kópavogs hefur samþykkt kjarasamning félagsins við Launanefnd sveitarfélaga.

KJÖLUR stéttarfélag starfsmanna í almannaþjónustu hefur samþykkt kjarasamning sem félagið undirritaði 29. nóvember sl. við  Launanefnd sveitarfélaga.

Félag opinberra starfsmanna á Suðurlandi hefur samþykkt kjarasamning Samflotsins við Launanefnd sveitarfélaga með 93% greiddra atkvæða.

Stjórn BSRB varar við einhliða ákvörðunum stjórnenda fyrirtækja og stofnana um að lækka kjarasamningsbundin laun og skerða kjör til að mæta þverrandi tekjum. Ólöglegt er með öllu að skerða kjarasamningsbundin kjör starfsmanna. Engar almennar ákvarðanir um breytingar á kjörum starfsfólks, þar með talið starfshlutfall, á að taka án vitundar og samráðs við starfsfólk og stéttarfélög þess.

Stjórnir KJALAR stéttarfélags starfsmanna í almannaþjónustu og Sjúkraliðafélags Íslands hafa sent frá sér ályktanir þar sem lokun hjúkrunardeildarinnar í Seli á Fjórðungssjúkrahúsinu á Akureyri er mótmælt.

Fulltrúaráð Starfsmannafélags Reykjavíkur samþykkti í gær ályktun þar sem nýgerðum kjarasamningum og áformum um að aðilar vinnumarkaðarins setjist saman að samningsborði er fagnað.

Atvinnuleysis-tryggingasjóður tæmist í október á næsta ári gangi spár Vinnumálastofnunar eftir. Þetta kom fram í erindi Gissurar Péturssonar forstjóra Vinnimálastofnunar á opnum fundi sem BSRB hélt í gær. Auk Gissurar flutti Gylfi Dalmann dósent við Háskóla Íslands erindi um íslenska vinnumarkaðinn.

NORDFAG, samtök stéttarfélaga almannaútvarpsstöðva á Norðurlöndunum, lýsa vonbrigðum, undrun og reiði yfir að stjórnvöld á Íslandi hafi grafið undan fjárhagslegum grundvelli RÚV með mjög alvarlegum afleiðingum fyrir íslenskt samfélag, samstarfsaðila RÚV og fyrir RÚV að starfa á sem hagkvæmastan hátt. Þetta kemur fram í opinberu bréfi frá samtökunum til Þorgerðar Katrínar Gunnarsdóttur menntamálaráðherra.

Opinn fundur verður á vegum BSRB fimmtudaginn 11. desember kl. 16:30 - 18:00 í BSRB - húsinu Grettisgötu 89. Yfirskrift fundarins er „Vinnumarkaðurinn og atvinnuhorfur framundan." Framsögur hafa Gylfi Dalmann dósent við Háskóla Íslands og Gissur Pétursson forstjóri Vinnumálastofnunar.

BSRB varar við einhliða launalækkunum og vill að vísitölugrunnur lána verði endurskoðaður. Þetta kemur fram í tveimur ályktunum frá framhaldsaðalfundi BSRB sem haldinn var í morgun. Ályktanirnar fara hér á eftir:

Stjórn Starfsmannafélags Kópavogs skrifaði í gær undir nýjan kjarasamning við Launanefnd sveitarfélaga. 
Samningurinn felur í sér framlengingu og breytingu á eldri samningi og er byggður á sama grunni og önnur starfsmannafélög hafa verið að skrifa undir við Launanefnd sveitarfélaga.

Framhaldsaðalfundur BSRB verður haldinn mánudaginn 8. desember, og hefst hann kl. 10.00. Fyrir fundinum liggur tillaga að breytingum á reglugerð fyrir orlofsheimili BSRB.

Opinn fundur BSRB um framtíðarþróun efnahagsmála á Íslandi var afar fróðlegur. Gylfi Zoëga prófessor við Háskóla Íslands og Jón Þór Sturluson aðstoðarmaður viðskiptaráðherra ræddu aðdraganda kreppunnar og þá kosti sem væru í stöðunni til að vinna sig út úr henni en þar skiptir peningastefnan höfuðmáli.

Opinn fundur verður á vegum BSRB í dag kl. 16:00 - 17:30 í BSRB - húsinu Grettisgötu 89. Yfirskrift fundarins er Framtíðin - með eða án krónu. Framsögu hafa Gylfi Zoëga prófessor við Háskóla Íslands og Jón Þór Sturluson aðstoðarmaður viðskiptaráðherra.

Starfsmannafélag Reykjavíkur undirritaði kjarasamning við LN í gær vegna félagsmanna á Akranesi. Gildistími samningsins er 1. des. 2008 til 31. ágúst 2009 með fyrirvara, sbr. yfirlýsingu sem fylgir samningnum. Ný launatafla tekur gildi frá.1. desember 2008 og samkvæmt henni hækka launataxtar um 20.300 krónur.

Starfsmannafélag Suðurnesja og Launanefnd sveitarfélaga skrifuðu í dag undir framlengingu á kjarasamningi aðila til  31. ágúst 2009. Samkomulagið felur m.a. í sér að ný launatafla tekur gildi frá 1. desember s.l. og samkvæmt henni hækka launataxtar um 20.300 krónur. Launaviðbótum sem heimilaðar voru tímabundið 28. janúar 2006 hefur einnig verið bætt inn í launatöflu og orlofs-og persónuuppbætur hækka.

Landssamband lögreglumanna var stofnað 1. desember 1968 og varð því 40 ára í gær. Í tilefni dagsins var haldinn hátíðar stjórnarfundur og var Mæðrastyrksnefnd afhentur styrkur upp á 709.000 krónur frá Líknar- og hjálparsjóði Landssambandsins. Það samsvarar 1000 kr. frá hverjum starfandi lögreglumanni í landinu.

Samflotið og Kjölur gengu frá kjarasamningi við Launanefnd sveitarfélaga á laugardag og Starfsmannafélag Reykjavíkurborgar samdi sama dag við samninganefnd borgarinnar. Samningar þessara aðila eru mjög áþekkir. Gildistími samningsins er 1. desember 2008 til 31. ágúst 2009 með fyrirvara, sbr. yfirlýsingu sem fylgir samningnum.  Ný launatafla tekur gildi frá.1. desember 2008 og samkvæmt henni hækka launataxtar um 20.300 krónur. Samningur Starfsmannafélags Reykjavíkur gildir hins vegar frá 1. nóvember.

Ögmundur Jónasson afhenti í dag Ragnhildi Guðmundsdóttur formanni Mæðrastyrksnefndar og Margréti K. Sigurðardóttur fjármálastjóra nefndarinnar styrk frá BSRB. Þá afhenti Árni Stefán Jónsson formaður SFR styrk frá félaginu og Sigurður Ingi Georgsson styrk frá Félagi umsjónarmanna hjá ríkisstofnunum.

Fundur BSRB með fulltrúum viðskiptabankanna var mjög fróðlegur og upplýsandi um það hvernig bankarnir hyggjast bregðast við greiðsluvanda viðskiptavina sinna vegna efnahagsástandsins í landinu. Yfirskrift fundarins var „Hvað gerir bankinn fyrir þig?" og bentu frummælendur á þau úrræði sem í boði eru og fyrirhuguð eru á næstunni.

Hvað gerir bankinn fyrir þig? er yfirskrift opins fundar á vegum BSRB á morgun, miðvikudag, kl. 16:30 - 18:00 í BSRB - húsinu Grettisgötu 89. Á fundinum munu fulltrúar viðskiptabankanna kynna úrræði sem þeir bjóða viðskiptavinum sínum upp á til að mæta áföllum heimilanna vegna efnahagsástandsins.

Starfsmenn Fjórðungssjúkrahúss Akureyrar mótmæla harðlega lokun öldrunardeildarinnar Sels á sjúkrahúsinu. Starfsmenn deildarinnar héldu fund í gær, 24. nóvember, og samþykkti fundurinn ályktun þar sem skorað er á stjórnendur FSA að draga ákvörðunina til baka.

Fjölmenni sótti útifund BSRB, Félags eldri borgara í Reykjavík, Landssamtakanna Þroskahjálpar og Öryrkjabandalags Íslands, á Ingólfstorgi síðdegis í dag. Á fundinum var samþykkt ályktun þar sem skorað er á stjórnvöld að beita öllum tiltækum ráðum til að verja velferðarkerfið sem byggt hefur verið upp af almenningi á undanförnum áratugum. Þegar kreppi að í samfélaginu sé mikilvægt að beita velferðarkerfinu til jöfnunar. Áralangri baráttu fyrir réttlátu þjóðfélagi megi ekki kasta á glæ.

BSRB, Félag eldri borgara í Reykjavík, Landssamtökin Þroskahjálp og Öryrkjabandalag Íslands standa fyrir útifundi á Ingólfstorgi mánudaginn 24. nóvember nk. kl. 16:30. Tilefni fundarins er óvissuástandið í efnahagsmálum þjóðarinnar, kjaraskerðing sem nú þegar blasir við mörgum og síðast en ekki síst hugmyndir stjórnvalda um stórkostlegan niðurskurð á útgjöldum til velferðar.

BSRB mótmælir ákvörðun ríkisstjórnarinnar um flatan 10% niðurskurð á velferðarkerfinu og telur það fráleitt á þeim samdráttartímum sem framundan eru.

Stjórn BSRB krefst lækkunar raunvaxta og endurskoðunar á vísitölugrunni auk aðgerða til að aðstoða fólk með vísitölubundin lán í því verðbólguskoti sem spáð er á næstunni.

Opinn fundur BSRB um kosti og galla verðtryggingar var vel sóttur og sköpuðu erindi Ingólfs H. Ingólfssonar félagsfræðings og Péturs H. Blöndal alþingismanns líflegar umræður.

Opinn fundur verður haldinn á vegum BSRB í dag, fimmtudaginn 20. nóvember,  kl. 16:30 - 18:00 í BSRB - húsinu Grettisgötu 89. Á fundinum verður fjallað um kosti og galla verðtryggingar og hvort æskilegt sé að afnema hana tímabundið eða til langframa. Framsögu hafa Ingólfur H. Ingólfsson félagsfræðingur og Pétur H. Blöndal alþingismaður. Fundarstjóri er Helga Jónsdóttir framkvæmdastjóri BSRB .

Stjórn og trúnaðarráð FOSS skorar á sveitarstjórnir á Suðurlandi eða Launanefnd sveitarfélaga að ganga nú þegar til samninga við Samflotið. Þetta kemur fram í ályktun sem samþykkt var á fundi þriðjudaginn 18. nóvember.

Starfsmannafélög Suðurnesja, Hafnarfjarðar og Vestmannaeyja hafa náð samkomulagi við Samtök atvinnulífsins fyrir hönd Hitaveitu Suðurnesja h.f. um breytingar og  framlengingu kjarasamnings aðila til sex mánaða, eða til 30. apríl 2009.
Félagsmenn fá tveggja launaflokkahækkun frá 1. nóvember s.l. og 21.000 króna eingreiðslu. Þá hækkar desemberuppbót í 67.500

Alþingi samþykkti í gær frumvarp félagsmálaráðherra um breytingar á lögum um greiðslujöfnun fasteignaveðlána til einstaklinga. Greiðslujöfnunin felur ekki í sér eftirgjöf á skuldum heldur er um frestun á hluta afborgana að ræða. Viðskiptavinir allra viðurkenndra lánastofnana sem eru með verðtryggð fasteignalán geta óskað eftir greiðslujöfnun lána sinna ef þeir telja það henta aðstæðum sínum. Umsókn um greiðslujöfnun þarf að koma á framfæri við viðkomandi lánastofnun og verður hún fólki að kostnaðarlausu.

Morgunverðarfundur verður haldinn miðvikudaginn 19. nóvember 2008 kl. 8.30 -10:00 á Grand hóteli í Reykjavík, salur Háteigur B, þar sem fjallað verður um stöðu miðaldra og eldra fólks nú þegar þrengir að á vinnumarkaði. Á fundinum munur þrír frummælendur fjalla um sérstöðu hópsins í þróun og ástandi samtímans. Morgunverður framreiddur frá kl. 08.00. Allir velkomnir.

Nú geta félagsmenn í BSRB bókað orlofshús bandalagsins í Munaðarnesi, Stóru Skógum og á Eiðum á heimasíðu BSRB. Til þess að gera það þurfa þeir að greiða leiguna með greiðslukorti. Hnappur til að bóka húsin er í dálknum til hægri á síðunni.

Fjallað er um stöðuna á vinnumarkaði, skattleysismörk og persónuafslátt í Dreifibréfi BSRB sem var að koma út. Atvinnuleysi hefur aukist verulega og má gera ráð fyrir að það aukist enn frekar á næstu mánuðum.

„Við þær aðstæður sem nú ríkja í íslensku samfélagi er mikilvægara en nokkru sinni að jafna kjörin í landinu og styrkja innviði samfélagsins. Tryggja þarf fulla atvinnu og efla alla grunnþjónustu.  Öflugt velferðarkerfi gerir okkur kleift að standa af okkur áföllin og með samstöðu og samheldni mun þjóðinni takast að vinna bug á erfiðleikunum. Forsenda samstöðunnar er hins vegar jöfnuður og félagslegt réttlæti. Kjarabilið hefur farið ört breikkandi, þar með talið kynbundið launamisrétti. Á því þarf að taka af festu." Þannig hefst ályktun funndar fulltrúaráðs Starfsmannafélags Reykjavíkurborgar sem haldinn var sl. þriðjudag.

Opinn fundur BSRB um efnahagsþrengingar og kreppur sem gengu yfir Færeyjar og Finnland snemma á 10. áratug síðustu aldar var vel sóttur og góður rómur gerður að erindunum sem Gunvør Balle sendiherra Færeyja á Íslandi og Sigurbjörg Árnadóttir framkvæmdastjóri héldu. Framsöguerindin fjölluðu um orsakir hrunsins hjá þessum þjóðum, hvernig ástand skapaðist og hvernig þær unnu sig út úr kreppunni. Þá var fjallað um hvað Íslendingar geti lært af reynslu þessara þjóða.

Opinn fundur verður haldinn á vegum BSRB á morgun, miðvikudaginn 12. nóvember, kl. 16:00 - 17:30 í BSRB - húsinu Grettisgötu 89. Á fundinum verður fjallað um hvernig Færeyingar og Finnar brugðust við efnahagsþrengingum á borð við þær sem Íslendingar upplifa nú. Framsögu hafa Gunvør Balle sendiherra Færeyja á Íslandi og Sigurbjörg Árnadóttir framkvæmdastjóri.  Fundarstjóri verður Helga Jónsdóttir framkvæmdastjóri BSRB.

Undirritaður hefur verið samningur á milli BSRB og Nýja tölvu- og viðskiptaskólan um afsláttakjör fyrir BSRB félaga og sérstök námskeið í Office 2007 tölvuforritum, sem er nýjasta uppfærsla af algengustu forritum fyrir PC-tölvur. Samninginn undirrituðu Kristín Á. Guðmundsdóttir formaður fræðslunefndar BSRB og Jón Vignir Karlsson skólastjóri NTV.

NOFS  (Nordens Offentliganställdas Fackliga Samorganisation) sem er norrænn samstarfsvettvangur Eurec og EPSU, og BSRB er aðili að, hefur sent BSRB samstöðukveðju vegna þeirra efnahagsþrenginga sem Íslendingar eiga nú við að glíma. Segir í kveðjunni að NOFS hafi verulegar áhyggjur af stöðunni hér á landi í kjölfar fjármálakreppunnar í heiminum.

Fræðslusetrið Starfsmennt fékk Starfsmenntaverðlaun Starfsmenntaráðs í flokki skóla og fræðsluaðila vegna verkefnisins Járnsíða sem unnið var í samvinnu við Sýslumannafélag Íslands. Afhending verðlaunanna fór fram í dag í BSRB húsinu. Samskip fékk verðlaunin í flokki fyrirtækja fyrir metnaðarfullt fræðslustarf. Engin verðlaun voru að þessu sinni veitt í opnum flokki félagasamtaka og einstaklinga.

Lífeyrissjóðir og aðrir aðilar sem tekið hafa við greiðslum í séreignarsjóði hafa á undanförnum dögum gefið út yfirlýsingar um sjóðina sem rétt er að benda á.Samkvæmt upplýsingum frá lífeyrissjóðunum  hefur öllum innborgunum vegna viðbótarlífeyrissparnaðar verið ráðstafað með öruggum hætti frá því að fjármálamarkaðir lokuðu í byrjun október þannig að ávöxtun þeirra er tryggð. Þau iðgjöld sem borist hafa frá þeim tíma munu því ekki sæta lækkunum af völdum yfirstandandi efnahagsþrenginga. Fyrirsjáanlegt er að uppsafnaður viðbótarlífeyrissparnaður fyrir þann tíma muni rýrna að hluta enda hefur hann verið ávaxtaður á ýmsan hátt, m.a. í innlendum og erlendum skuldabréfasjóðum og hlutabréfum.

Elín Jónasdóttir sálfræðingur Rauða krossins mun halda fyrirlestur á vegum BSRB og Félagsmálaskóla alþýðu í fundarsölunum á jarðhæð BSRB - hússins þriðjudaginn 11. nóvember kl. 9:00 - 10:30. Fyrirlesturinn fjallar um gildi sálræns stuðnings í aðstæðum sem geta valdið áföllum og er hugsaður fyrir trúnaðarmenn aðildarfélaga BSRB.
Fundurinn verður sendur í fjarfundarbúnaði til 6 staða á landinu. Það er til Ísafjarðar, Sauðárkróks, Akureyrar, Egilsstaða, Vestmannaeyja og Selfoss. Skráning á námskeiðið er á skrifstofu BSRB í síma 525 8300, eða í netfang bsrb@bsrb.is

Fjölmenni var á opnum fundi BSRB um skuldastöðu heimilanna og úrræði sem ákveðið hefur verið að grípa til vegna hækkandi lána. Framsögu á fundinum höfðu Ragnhildur Arnljótsdóttir ráðuneytisstjóri félags- og tryggingamálaráðuneytisins, Svanhildur Guðmundsdóttir sviðsstjóri þjónustusviðs Íbúðalánasjóðs, Haukur Hafsteinsson framkvæmdastjóri LSR og Ásta S. Helgadóttir forstöðumaður Ráðgjafarstofu um fjármál heimilanna. Fundarstjóri var Helga Jónsdóttir framkvæmdastjóri BSRB. Að loknum stuttum framsögum var opnað fyrir spurningar úr sal og sköpuðust líflegar og mjög fróðlegar umræður við það.

Opinn fundur verður á vegum BSRB í dag miðvikudaginn 5. nóvember kl. 16:30 - 18:00 í BSRB - húsinu Grettisgötu 89. Á fundinum verður fjallað um skuldastöðu heimilanna og úrræði sem ákveðið hefur verið að grípa til vegna hækkandi lána.
Framsögu hafa: Ragnhildur Arnljótsdóttir ráðuneytisstjóri félags- og tryggingamálaráðuneytisins, Svanhildur Guðmundsdóttir sviðsstjóri þjónustusviðs Íbúðalánasjóðs, Haukur Hafsteinsson framkvæmdastjóri LSR og Ásta S. Helgadóttir forstöðumaður Ráðgjafarstofu um fjármál heimilanna. Fundarstjóri er Helga Jónsdóttir framkvæmdastjóri BSRB. Að loknum stuttum framsögum verður opnað fyrir spurningar úr sal.

Frá árinu 1993 til ársins 2007 hefur meðalhlutfall í tekjuskatti einstaklinga hækkað um rúmlega fimmtung og skattbyrði aukist mest í lægri tekjuhópunum. Þetta er ein af niðurstöðum í skýrslu nefndar á vegum fjármálaráðuneytisins sem hafði meðal annars það hlutverk að fara yfir íslenska skattkerfið. Nefndin lauk störfum 11. september síðastliðin eftir um tveggja og hálfs árs starf. Formaður nefndarinnar var Friðrik Már Baldursson og var fulltrúi BSRB í nefndinni Ragnar Ingimundarson hagfræðingur.

Trúnaðarmannaráð KJALAR stéttarfélags starfsmanna í almannaþjónustu krefst ítarlegrar rannsóknar sem leiði í ljós hverjir eru ábyrgir fyrir hruni efnahagslífsins. Þá þarf að leiða í ljós hvernig fjármunum þjóðarinnar hefur verið sóað. Trúnaðarmannaráð KJALAR stéttarfélags starfsmanna í almannaþjónustu gerir þá kröfu að Launanefnd sveitarfélaga gangi strax til samninga við KJÖL stéttarfélag um kjarasamning, segir m.a. í ályktun trúnaðarmannaráðsins 21. október 2008.

„En látum það aldrei henda okkur að níða réttindin hvert af öðru. Ég frábið að illa fengin lífeyrisréttindi alþingismanna, ráðherra og æsðstu embættismanna ríkisins séu sett í eina spyrðu með lífeyrisréttindum sjúkraliðans, löggæslumannsins og gangavarðarins hjá hinu opinbera eins og gert var í Morgunblaðinu í gær og tekið upp í leiðara í dag. Slíkt kann að vera til stundarvinsælda fallið og skemmta einhverjum skröttum en ekki þjónar það réttindabaráttu launafólks. Opinberir starfsmenn hafa staðið blífast á sínum lífeyrisréttindum í áratuga langri baráttu og ávinningur hennar hefur skilað sér til alls launafólks - því skulum við aldrei gleyma," sagði Ögmundur Jónasson formaður BSRB m.a. þegar hann ávarpaði ársfund ASÍ í morgun.

Stjórn BSRB og jafnréttisnefnd bandalagsins mótmæla harðlega ákvörðun ríkis­stjórnarinnar sem kynnt var í gær að fresta fyrirhuguðu jafnréttisþingi sem dagsett hafði verið 7. nóvember næstkomandi. 

Í tilefni af því að tuttugu ár eru liðin síðan Ögmundur Jónasson var kjörinn formaður BSRB afhenti Þuriður Einarsdóttir honum blómvönd frá BSRB á aðalfundi bandalagsins 17. október sl. Ögmundur var formaður Starfsmannafélags Sjónvarpsins þegar hann var kjörinn formaður BSRB 21. október 1988. Hann tók við af Kristjáni Thorlacius sem þá hafði gegnt formennsku bandalagsins í 28 ár.

Elín Jónasdóttir sálfræðingur Rauða krossins mun halda fyrirlestur á vegum BSRB og Félagsmálaskóla alþýðu í sal 2 á jarðhæð BSRB - hússins föstudaginn 24. október kl. 8:00 - 9:30. Fyrirlesturinn fjallar um gildi sálræns stuðnings í aðstæðum sem geta valdið áföllum og er hugsaður fyrir starfsmenn stéttarfélaga og trúnaðarmenn.

Aðalfundur BSRB hafnar því að almennt launafólk beri allan herkostnað af bruðli og óhófi undangenginna ára. Þá krefst fundurinn ítarlegrar rannsóknar sem leiði í ljós hverjir eru ábyrgir fyrir skuldsetningu bankakerfisins og þar með þjóðarinnar. Einnig þarf að upplýsa um hvernig þessum fjármunum hefur verið ráðstafað í einkaþágu gæslumanna fjárins. Þetta kemur fram í ályktun aðalfundar BSRB sem haldinn var í dag, 17. október, en ályktunin ber yfirskriftina Styrkjum innviðina - sannleikann í ljós.

Aðalfundur BSRB verður haldinn á morgun, föstudaginn 17. október, og hefst hann kl. 9.00. Auk venjubundinna aðalfundarstarfa verður fjallað sérstaklega um stöðu lífeyrissjóða sem félagar í BSRB eiga aðild að og ástandið í efnahagsmálum óg áhrif þess á komandi kjarasamninga.

Félags- og tryggingamálaráðuneytið hefur sett á fót nýtt samræmt þjónustu- og upplýsinganet vegna sérstakra aðstæðna á fjármálamarkaði sem felur í sér nýtt vefsvæði, grænt símanúmer, fyrirspurnalínu og netspjall.

Vinnueftirlitið og Rannsóknastofa í vinnuvernd vilja vekja athygli á að þau efnahagslegu áföll sem nú dynja á íslensku þjóðinni koma við okkur öll og hafa áhrif á líðan okkar. Þær aðstæður sem nú hafa skapast gera að verkum að áhyggjur okkar beinast að mörgum þáttum og áhyggjurnar eru með okkur hvort sem við erum heima eða í vinnunni.

Sættir hafa tekist í deilu Starfsmannafélags Reykjavíkurborgar og Strætó bs. Undanfarið hafði verið unnið að því að koma samskiptum félagsins og stjórnenda Strætó bs. í eðlilegt horf en miklar deilur höfðu verið á milli aðila sem vísað hafði verið til dómstóla. Þegar taka átti málið fyrir var ákveðið að slíðra sverðin, setjast að samningaborði og leiða málin þannig til lykta.

Stjórn BSRB hefur fylgst grannt með þróun mála undanfarna daga og haldið tvo stjórnarfundi frá því að ljóst var að íslenskir bankar stæðu frammi fyrir verulegum erfiðleikum sem síðan leiddu til hruns bankakerfisins. Ögmundur Jónasson formaður BSRB segir ljóst að lífeyrissjóðirnir hafi orðið fyrir miklum búsifjum vegna hrunsins.

Geta eldri starfsmenn verið lykillinn að velgengni fyrirtækja? Þessi spurning verður rædd og reifuð á málþingi á vegum Verkefnisstjórnar 50+ sem haldið verður í Ketilshúsi á Akureyri fimmtudaginn 25. september milli klukkan 13 og 16.

Hanna Birna Kristjánsdóttir borgarstjóri Reykjavíkur heimsótti BSRB-húsið í dag og átti fund með Ögmundi Jónassyni formanni BSRB, Helgu Jónsdóttur framkvæmdastjóra BSRB og Garðari Hilmarssyni formanni Starfsmannafélags Reykjavíkurborgar. Ögmundur sagði eftir fundinn að BSRB hefði ætíð leitast við að eiga gott samstarf við ráðamenn borgarinnar og þessi fundur með borgarstjóra hefði verið bæði ánægjulegur og upplýsandi fyrir alla aðila.

Starfslokanámskeið verður haldið í BSRB húsinu dagana 29. og 30. september og 1. október. Námskeiðið hefst kl. 16.30 þessa daga og lýkur kl. 19.00. Vonast ég til að félögin veki athygli á þessu námskeiði meðal félagsmanna sinna sem eru farnir að nálgast starfslok eða hafa nýlega lokið störfum. Þátttöku þarf að tilkynna á skrifstofu BSRB í síma 525 8300 fyrir 26. september 2008. Einnig er hægt að tilkynna þátttöku í netfangið bsrb@bsrb.is

Vala Dröfn Hauksdóttir hefur tekið við sem formaður Starfsmannafélags Garðabæjar en Gunnar Erlingsson fráfarandi formaður hefur látið af störfum hjá Garðabæ. Vala Dröfn var varaformaður félagsins.

BSRB hefur gefið út erindi sem Allyson Pollock prófessor við háskólann í Edinborg hélt á vegum bandalagsins sl. vor. Yfirskrift erindisins er Heilbrigðisþjónustan - á vegferð til einkavæðingar. Bæklingurinn er mikilvægt innlegg í umræðuna um frumvarp ríkisstjórnarinnar um sjúkratryggingar sem er til umræðu nú á haustþingi.

BSRB hefur kappkostað að afla upplýsinga um reynslu annarra þjóða af samsvarandi breytingum og hér eru í bígerð. Af því tilefni fengu samtökin Allyson Pollock hingað til lands en hún er einn helsti sérfræðingur Breta á þessu sviði. Allyson Pollock veitir forstöðu rannsóknarstofnun við Edinborgarháskóla (Centre for International Public Health Policy) sem sérhæfir sig í skipulagi heilbrigðisþjónustunnar. Erindi hennar á vegum BSRB fjallar um reynslu Breta af sams konar kerfisbreytingum og lagðar eru til í frumvarpinu um sjúkratryggingar. Pollock vísar í áform íslenskra stjórnvalda og ber fyrirliggjandi frumvarp saman við lagabreytingar í Bretlandi í byrjun 10. áratugar síðustu aldar. Þar segir hún m.a.: „Einkavæðingarferlið hefði ekki getað átt sér stað í Bretlandi án löggjafarinnar frá 1991. Hún gegndi lykilhlutverki með því að innleiða þær kerfisbreytingar að koma á innri markaði, aðgreina veitendur og kaupendur og verðleggja veitta þjónustu. Í kjölfarið fylgdi fjöldi nýrra reglugerða og verkferla til að hrinda einkavæðingunni í framkvæmd. Verkferlarnir byggðu ekki einungis á meginlöggjöfinni heldur einnig á reglugerðum sem voru samdar af embættismönnum. Sjúkratryggingafrumvarp íslenskra stjórnvalda nú er af sama toga og opnar leiðir fyrir ógrynni stefnumarkandi reglugerða á forræði ráðherra."

BSRB varar alvarlega við að frumvarp um sjúkratryggingar verði óbreytt gert að lögum á næstu dögum. Þetta kemur fram í umsögn bandalagsins um frumvarpið.

Nú fer hver að verða síðastur til að skrá sig á fyrsta áfanga trúnaðarmannanámskeiðs BSRB og Félagsmálaskóla alþýðu. Fyrsti áfangi verður kenndur dagana 8. - 10. september. Annar áfangi verður síðan haldinn 15. - 17. september og 22. 23. og 29. september. Námskeiðin eru í BSRB húsinu, Grettisgötu 89, og eru frá kl. 9 til 16 alla dagana. Trúnaðarmannafræðslan sem BSRB og Félagsmálaskóli alþýðu bjóða upp á er metin til 10 eininga á framhaldsskólastigi. Námskeiðið er í fimm  hlutum. Í fyrsta hlutanum er lögð höfuðáhersla á vinnumarkaðinn og verkalýðshreyfinguna, störf og stöðu trúnaðarmannsins. Einnig er fjallað um fjölmenningu á vinnustöðum og samskipti á vinnustað. Í öðrum áfanga er starfsemi stéttarfélaga tekin fyrir, launaútreikningar, fjölmenning á vinnustöðum og vinnuréttur. Námskeiðið fer fram í BSRB - húsinu Grettisgötu 89.

Gengið verður formlega frá sameiningu Félags opinberra starfsmanna á Suðurlandi (FOSS) og Starfsmannafélags Sveitarfélagsins Árborgar (STÁ) á sameiginlegum fundi stjórna félaganna 18. ágúst nk.  kl. 17 á skrifstofu FOSS, Austurvegi 38, Selfossi. Kynningafundur um sameininguna verður síðan haldinn á Hótel Selfossi 27. ágúst og hefst hann kl. 20.

Níu starfsmönnum á Keflavíkurflugvelli hefur verið sagt upp störfum. Um er að ræða starfsmenn sem sinnt hafa vopnaleit og öryggisvörslu. „Þetta eru slæmar fréttir", sagði Ögmundur Jónasson, formaður BSRB, en hann kveðst óttast að meira kunni að vera í pípunum bæði á Keflavíkurflugvelli og jafnvel hjá öðrum lögregluembættum. „Stjórnvöld hafa verið sinnulaus gagnvart löggæslunni. Víða hefur henni verið gert að skera stórlega niður og svo þröngur stakkur er henni sniðinn að mér kæmi ekki á óvart að okkur taki að berast fleiri svona ótíðindi."

Félag flugmálastarfsmanna ríkisins gekk frá kjarasamningi við Samtök atvinnulífsins og Flugstoðir ohf. nú upp úr hádegi. Samningurinn er á svipuðum nótum og samningur BSRB við ríkið. Laun hækka um 21.000 krónur á mánuði og gildir samningurinn frá 1. júní til 30 október 2009. Atkvæðagreiðsla um samninginn verður rafræn og hefst fimmtudaginn 17. júlí og er stefnt að því að henni ljúki viku seinna.

Samningur Sjúkraliðafélags Íslands við Samtök fyrirtækja í heilbrigðisþjónustu (SFH) var samþykktur með meirihluta atkvæða í rafrænni atkvæðagreiðslu. Svarhlutfall var 37,97%. Já sögðu 97 eða 81%. Nei sögðu 22 eða 18%. Skrifað var undir samkomulag við Samtök fyrirtækja í heilbrigðisþjónustu mánudaginn 23. júní. Samningurinn gengur út á sömu kjarabætur (afturvirkt frá 1. maí sl.) og samið var um við fjármálaráðuneytið og undirritað  þann 25. maí sl.

Í nótt náðust  samningar í kjaradeilu Flugumferðarstjóra. Loftur Jóhannsson, formaður félagsins, segir samninginn að uppstöðu til framlengingu á fyrri samningi. Hann gildi til 31.október 2009 og feli í sér samtals um 11% hækkun. Loftur minnir á að samningurinn sé með fyrirvara um samþykki félagsmanna. Miðað við aðstæður hafi samninganefnd félagsins hins vegar talið hyggilegt að ljúka málinu á framangreindum nótum.

Í dag 23. júní er dagur opinberrar almannaþjónustu samkvæmt samþykkt Allsherjarþings Sameinuðu þjóðanna frá 2002. Í tilefni dagsins skora Alþjóðasamtök starfsmanna í almannaþjónustu, PSI, Alþjóðasamband kennara, EI og Oxfam International, sem eru alþjóðleg hjálparsamtök, á ríkisstjórnir heimsins að leggja fram stóraukna fjármuni til að tryggja menntun og þjálfun heilbrigðisstarfsfólks og kennara um heim allan. Markmiðið er að allir eigi aðgang að heilbrigðisþjónustu og menntun enda sé þar um grundvallarmannréttindi að ræða.

Sjúkraliðafélag Íslands hefur samþykkt kjarasamning BSRB við ríkið. Á kjörskrá voru 1250. Fjöldi svarenda var 545 eða 43,60%. Já sögðu 458, eða 84% svarenda. Nei sögðu 76 eða 14%. Auðir seðlar voru 17 eða 2% svarenda.

94% félagsmanna í Samfloti sem greiddu atkvæði um kjarasamning BSRB við samninganefnd ríkisins samþykktu samninginn. Á kjörskrá voru 321 og greiddu 164 atkvæði eða 51,09%. Já sögðu 154 eða 93,90%. Nei sögðu 8 eða  4,88%. Auðir og ógildir voru 2 eða 1.22%.

Ríkisstarfsmenn í Starfsmannafélagi Reykjavíkurborgar samþykktu kjarasamning BSRB við ríkið með 92,5% atkvæða þeirra sem greiddu atkvæði. 114 voru á kjörkskrá og af þeim greiddu atkvæði 53 eða 46%. Já sögðu 49 eða 92,5%. Nei sögðu 4 eða 7,5%. Auðir og ógildir voru engir.

Þátttakendur í trúnaðarmannanámskeiði BSRB og FA sl. vor.

Trúnaðarmannanámskeið BSRB og Félagsmálaskóla alþýðu halda áfram í haust. Fyrsti áfangi verður kenndur dagana 8. - 10. september og annar áfangi 15. - 17. september og 22. - 24. september. Námskeiðin eru haldin í BSRB húsinu, Grettisgötu 89, og eru frá kl. 9 til 16 alla dagana. Trúnaðarmannafræðslan sem BSRB og Félagsmálaskóli alþýðu bjóða upp á er metin til 10 eininga á framhaldsskólastigi. Námskeiðið er í fimm  hlutum. Í Fyrsta hlutanum er lögð höfuðáhersla á vinnumarkaðinn og verkalýðshreyfinguna, störf og stöðu trúnaðarmannsins. Einnig er fjallað um fjölmenningu á vinnustöðum og samskipti á vinnustað. Í öðrum áfanga er starfsemi stéttarfélaga tekin fyrir, launaútreikningar, fjölmenning á vinnustöðum og vinnuréttur. Námskeiðið fer fram í BSRB - húsinu Grettisgötu 89.

Félag íslenskra flugumferðarstjóra hefur boðað tuttugu stuttar vinnustöðvanir dagana 27. júní til 20. júlí næstkomandi. Verkfallsboðunin nær til allra starfandi flugumferðarstjóra í landinu hjá Flugmálastjórn Íslands, Flugmálastjórn á Keflavíkurflugvelli og hjá Flugstoðum. Þetta segir í fréttatilkynningu frá Félagi íslenskra flugumferðastjóra. Flugumferðarstjórar munu sinna neyðarþjónustu á meðan fyrirhuguðu verkfalli þeirra stendur. Nærri 100% þeirra sem tóku þátt í atkvæðagreiðslu um vinnustöðvunina greiddu atkvæði með vinnustöðvunum.

Ríkisstarfsmenn í Kili samþykktu nýgerðan kjarasamning aðildarfélaga BSRB og ríkisins með 93% þeirra sem greiddu atkvæði. Þátttaka í atkvæðagreiðslunni var mjög góð eða 72% þeirra sem samningurinn nær til. Á kjörskrá voru 234 og þar af greiddu 167 atkvæði. Já sögðu 155 eða 93%, nei sögðu 7 eða 4% og auðir og ógildir seðlar voru 5 eða 3%.

Félagar í SFR hafa samþykkt kjarasamning við ríkið sem aðildarfélög BSRB undirrituðu 25. maí síðastliðinn. Tæplega 89% þeirra sem greiddu atkvæði um samninginn samþykktu hann. Á kjörskrá voru alls 5554 félagsmenn hjá ríki og sjálfseignastofnunum. Af þeim greiddu 1855 félagsmenn atkvæði eða 33,4%. Já sögðu 1624 eða 87,65%. Nei sögðu 202 eða 10,89%. Þeir sem skiluðu auðu voru 29 eða 1,56%. Atkvæðagreiðslan var rafræn.

Listafólkið ásamt formanni BSRB: Zsuzanna Budai, Þórarinn Eldjárn, Soffía Sæmundsdóttir, Hallveig Rúnarsdóttir, Hrönn Þráinsdóttir og Ögmundur Jónasson.

Húsfyllir var á menningarhátíð BSRB í Munaðarnesi laugardaginn 7. júní þegar myndlistarsýning Soffíu Sæmundsdóttur, Sumarganga, var opnuð. Hátíðargestir skemmtu sér konunglega við upplestur Þórarins Eldjárns á ljóðum sínum og tónlistaratriðum. Hallveig Rúnarsdóttir söng lög Tryggva M. Baldvinssonar við ljóð úr Heimskringlu Þórarins Eldjárn við undirleik Hrannar Þráinsdóttur og Freyjukórinn söng undir stjórn og undirleik Zsuzönnu Budai. Að dagskrá lokinni var boðið upp á léttar veitingar í Kaffi Paradís.

Félagsmenn í Starfsmannafélagi Suðurnesja samþykktu samhljóða nýgerðan kjarasamning við ríkið. Um 45% félagsmanna sem eru með samning við ríkið og starfa á Heilbrigðisstofnun Suðurnesja greiddu atkvæði og samþykktu samninginn samhljóða.

Nýgerður kjarasamningur BSRB við ríkið var samþykktur af Félagi starfsmanna stjórnarráðsins. 85% þeirra sem greiddu atkvæði sögðu já, 8% nei og 7% skiluðu auðu. Kosningin var rafræn og tóku 56% félagsmanna þátt í henni. Félag starfsmanna stjórnarráðsins er fyrsta félagið sem lýkur kosningu um samninginn en niðurstöður eiga að liggja fyrir eigi síðar en 20. júní.

Árni Stefán Jónsson formaður SFR og Kristín Á. Guðmundsdóttir formaður SLFÍ kynna samninginn í BSRB-húsinu.

Fyrstu kynningarfundir kjarasamninga BSRB og ríkisins voru í gær. Árni Stefán Jónsson formaður SFR og Kristín Á. Guðmundsdóttir formaður Sjúkraliðafélags Íslands kynntu samninginn á fundi í BSRB-húsinu og var sá fundur sendur með fjarfundarbúnaði til Patreksfjarðar þar sem Gylfi Guðmundsson formaður FOSVest stýrði fundi. Elín Björg Jónsdóttir formaður FOSS og Þórarinn Eyfjörð framkvæmdastjóri SFR kynntu samninginn á fundi á Hótel Selfossi og Arna Jakobína Björnsdóttir formaður Kjalar var með kynningarfund í Sjálfstæðishúsinu á Blönduósi.

Myndlistarsýning Soffíu Sæmundsdóttur, Sumarganga, verður opnuð á menningarhátíð BSRB í Munaðarnesi laugardaginn 7. júní kl. 14. Á hátíðinni mun Þórarinn Eldjárn lesa úr eigin verkum og lög eftir Tryggva M. Baldvinsson við ljóð úr Heimskringlu Þórarins verða flutt af Hallveigu Rúnarsdóttur og Eyjólfi Eyjólfssyni við undirleik Hrannar Þráinsdóttur.  Einnig mun Freyjukórinn syngja nokkur lög og Ögmundur Jónasson formaður BSRB flytja ávarp. Að lokinni dagskrá er boðið upp á léttar veitingar. Hátíðin er ókeypis og opin öllum.

Nemendur í 1. og 2. bekk Eiðaskóla söfnuðu rusli við orlofshús BSRB við Eiðavatn og fengu greitt fyrir það 20 þúsund krónur. Nemendunum þótti heillaráð að styrkja Rauða krossinn á Austurlandi með peningunum og afhentu honum þá í dag.

BSRB verður með fundi um allt land til að kynna nýgerðan samning bandalagsins við ríkið. Samningurinn gildir fyrir starfsmenn ríkisins í eftirtöldum félögum: Félag flugmálastarfsmanna ríkisins, Félag starfsmanna stjórnarráðsins, Kjölur-stéttarfélag starfsmanna í almannaþjónustu, Samflot bæjarstarfsmannafélaga, SFR-stéttarfélag í almannaþjónustu, Sjúkraliðafélag Íslands, Starfsmannafélag Garðabæjar, Starfsmannafélag Kópavogs, Starfsmannafélag Reykjavíkurborgar, Starfsmannafélag Suðurnesja.

BSRB stóð fyrir morgunverðarfundi með dr. Allyson Pollock í dag. Dr. Pollock fjallaði um afleiðingar af einkavæðingu heilbrigðisþjónustunnar í Englandi sem hófst í tíð Thatchers en hélt áfram eftir að Verkamannaflokkurinn tók við. Afleiðingin er dýrara kerfi sem þjónar sjúklingum verr en þegar heilbrigðisþjónustan var alfarið á vegum hins opinbera. Hún benti á að bæði Skotar og Walesverjar hafi hafnað þessari markaðsvæðingu og hvatti hún Íslendinga að vera á varðbergi gagnvart þessari þróun. Eins og kunnugt er þá er til umfjöllunar á þingi nú frumvarp ríkisstjórnarinnar um breytt fyrirkomulag sjúkratrygginga sem greiðir fyrir markaðsvæðingu heilbrigðisþjónustunnar.

Dr. Allyson Pollock prófessor við háskólann í  Edinborg í Skotlandi er með morgunverðarerindi hjá BSRB fimmtudaginn 29. maí kl. 8.15 - 10.  Dr. Pollock veitir forstöðu sérstakri rannsóknarstofnun við háskólann í Edinborg sem hefur það verk með höndum að kanna afleiðingar mismunandi skipulagsforma í heilbrigðisþjónustunni. Stofnunin heitir The Centre for International Public Health Policy. Dr. Pollock er menntaður læknir, sem síðan hefur sérhæft sig í rannsóknum á skipulagi heilbrigðisþjónustunnar. Erindið verður túlkað. Morgunverðarkaffi í boði BSRB. Fundurinn er í BSRB - húsinu, Grettisgötu 89.

Gengið var frá samningi aðildarfélaga BSRB sem áttu lausa samninga við ríkið 1. maí sl. við samninganefnd ríkisins rétt í þessu. Samið var til skamms tíma eða til loka mars á næsta ári. Samið var um 20.300 króna hækkun frá 1. maí. Einnig var samið um hækkun greiðslu ríkisins í styrkarsjóði BSRB um 0,2%, fer úr 0,55% í 0,75% um næstu áramót. Þá er í samningnum gengið frá ýmsum öðrum réttindamálum.

Fulltrúar BSRB áttu í dag annan fund með fjórum ráðherrum ríkisstjórnarinnar, forsætis-, utanríkis-, fjármála- og félagsmálaráðherra vegna lausra samninga við ríkið. Að sögn Ögmundar Jónassonar formanns BSRB var þetta ágætur fundur og niðurstaða hans sú að hafnar yrðu markvissar viðræður samninganefndar ríkisins og BSRB um gerð kjarasamnings.

Fundi fulltrúa BSRB og fjögurra ráðherra ríkisstjórnarinnar í Stjórnarráðinu lauk nú skömmu fyrir kl. 13.00. Að sögn Ögmundar Jónassonar formanns BSRB var þetta ágætur fundur þar sem skipst var á skoðunum og upplýsingum. Það var sameiginleg niðurstaða aðila að efna til annars fundar með sömu aðilum í næstu viku. "Þá erum við að vonast til þessað afstaða ríkisstjórnarinnar til spurninga BSRB liggi skýrar fyrir," sagði Ögmundur.

Fulltrúar BSRB munu eiga fund með fjórum ráðherrum ríkisstjórnarinnar í Stjórnarráðinu kl. 12 á hádegi í dag. Eftir fyrsta formlega fund BSRB og launanefndar ríkisins vegna lausra samninga ríkisstarfsmanna óskaði BSRB eftir fundi með forsætisráðherra, utanríkisráðherra, fjármálaráðherra og félagsmálaráðherra til að ræða áform ríkisstjórnarinnar um hvernig hún hyggst efna fyrirheit sín í kjaramálum.

Ögmundur Jónasson formaður BSRB  hefur ritað fjórum ráðherrum ríkisstjórnarinnar, forsætisráðherra, utanríkissráðherra, fjármálaráðherra og félagsmálaráðherra formlegt bréf þar sem áréttaðar eru óskir BSRB um fund með ráðherrunum þar sem þeir geri grein fyrir áformum stjórnarinnar  um hvernig hún hyggst efna fyrirheit sín í kjaramálum.

Í gær óskaði BSRB formlega eftir fundi með ríkisstjórninni, oddvitum stjórnarflokkanna auk fjármálaráherra og félagsmálaráðherra, áður en frekari samningaviðræður færu fram. BSRB félögin sem eiga lausa samninga við ríkið og koma sameiginlega að samningaborði vilja fá að vita hvernig ríkisstjórnin ætli að efna gefin fyrirheit um kjarabætur til til umönnunarstétta og annarra hópa innan almannaþjónustunnar þar sem launagliðnun hefur orðið mikil og manneklu gætt sökum bágra kjara.

Gunnar Björnsson formaður samninganefndar ríkisins og Ögmundur Jónasson heilsast við upphafa samningafundarins.

Fyrsta formlega samningafundi BSRB og aðildarfélaga þess við launanefnd ríkisins lauk rétt áðan hjá Sáttasemjara ríkisins. Samninganefnd ríkisins heldur enn fast við að samið verði til langs tíma en BSRB vill að gengið verði hið fyrsta frá skammtímasamningi. Í framhaldi af þessari niðurstöðu fundarins vill BSRB fund með ríkisstjórninni til að fá hennar sýn á stöðu mála og hvaða ráðagerðir hún hefur á prjónunum.

Fyrsti formlegi samningafundur BSRB og aðildarfélaga bandalagsins með samninganefnd ríkisins verður hjá Ríkissáttasemjara í dag. kl. 14.00 Á fundinn mæta fulltrúar þeirra aðildarfélaga BSRB sem eiga lausa samninga við ríkið.

Fjölmenni var á baráttufundum verkalýðshreyfingarinnar víða um land í dag 1. maí. Ögmundur Jónasson formaður BSRB var ræðumaður á fundinum í Vestmannaeyjum. Hann kom víða við í ræðu sinni og sagði m.a. að BSRB hefði lagt til skammtíma samninga við ríkið í ljósi þeirrar stöðu sem nú væri í efnahagslífinu, óðaverðbólg og himinháir vextir: „Samfélagið þarf að ná áttum - leggja til atlögu gegn þeim vágestum sem ógna okkur. Það þolir ekkert heimili eða veikburða atvinnurekstur okurvextina til frambúðar eða þá holskeflu verðhækkana á vöru og þjónustu sem nú ríður yfir. Það er komið að þeim sem stýra verðlaginu að sýna ábyrgð." Árni Stefán Jónsson formaður SFR flutti ræðu á Ingólfstorgi og Garðar Hilmarsson formaður Starfsmannafélags Reykjavíkurborgar í Hafnarfirði.

"Undanfarin ár hefur verkalýðshreyfingin varað við harðri lendingu í efnahagsmálum. Stjórnvöld hafa ekkert mark tekið á viðvörunum og ráðleggingum hvorki frá efnahagssérfræðingum né frá samtökum á vinnumarkaði. Vandi okkar í efnahagsmálum er að stórum hluta heimatilbúinn. Andvaraleysi ráðamanna  hefur grafið undan efnahagskerfi landsins. Þess vegna skellur nú verðbólguholskeflan af fullu afli á almenningi. Ef há verðbólga festist á núverandi stigi mun hún sliga heimili landsins á skömmum tíma.  Ríkisstjórnin stendur ráðþrota og aðgerðalaus. Verkalýðshreyfingin hefur bent á bæði aðgerðir og leiðir.  Stjórnvöld höfðu marvísleg úrræði og leiðir til að mýkja lendinguna í efnahagsmálum. Nú bendir allt til þess að hún verði harkarleg. Til að koma til móts við launafólk ber að afnema gjaldtöku í heilbrigðiskerfinu og stórbæta úrræði í félagslega húsnæðiskerfinu. Það er dapurlegt að fylgjast með þeim aðgerðum ríkisstjórnarinnar að hún er tilbúin að koma bönkunum til aðstoðar meðan hún heldur að sér höndum gagnvart stórmálum sem snerta hagsmuni almennings hvað varðar verðlags- og húsnæðismál," segir m.a. í 1. maí ávarp fulltrúaráðs verkalýðsfélaganna í Reykjavík, BSRB, BHM, KÍ og SÍF.

Baráttufundir verða um allt land á morgun á alþjóðlegum baráttudegi verkalýðsins. Árni Stefán Jónsson formaður SFR og varaformaður BSRB verður ræðumaður BSRB á fundinum á Ingólfstorgi. Ögmundur Jónasson formaður BSRB er ræðumaður í Vestmannaeyjum og Garðar Hilmarsson formaður Starfsmannafélags Reykjavíkurborgar í Hafnarfirði. Í Reykjavík verður safnast saman kl. 13.00 á Hlemmi og lagt af stað niður Laugaveg á Ingólfstorg þar sem útifundurinn verður haldinn. Lúðrasveit verkalýðsins og Lúðrasveitin Svanur leika fyrir göngunni. BSRB býður í 1. maí kaffi í BSRB-húsinu Grettisgötu 89 eftir útifundinn.

BSRB hvetur til þess að þegar í stað hefjist viðræður við fjármálaráðuneytið um  skammtímasamning. Þetta kemur fram í ályktun sem stjórn BSRB sendi frá sér í dag. Í ályktuninni ítrekar stjórnin mikilvægi þess að kjör innan almannaþjónustunnar verði stórbætt. Svo er komið að mjög víða er þar við alvarlega manneklu að stríða sem rekja má til bágra kjara og er brýnt að taka af alvöru á þeim vanda.

SFR krefst þess að lágmarkslaun SFR félaga verði ekki undir 200.000.- kr. á mánuði, að bættur verði réttur starfsmanna vegna veikinda og slysa, að sí- og endurmenntunarúrræði verði styrkt, að orlofsréttur verði bættur ásamt fleiru. Þetta kom fram á fyrsta fundi samninganefndar SFR og samninganefndar ríkisins sem haldinn var í gær. Næsti samningafundur er boðaður mánudaginn 14. apríl.

Snorri Magnússon var kjörinn nýr formaður Landssambands lögreglumanna. Valið var á milli tveggja lista. Annars vegar lista með Snorra sem formanni og hins vegar lista með Gils Jóhannssyni sem formanni. Þátttaka í kjörinu var mjög góð og vann Snorri afgerandi sigur.

Fríður hópur trúnaðarmanna við lok námskeiðsins nú fyrir páska.

Mjög góður rómur var gerður að fyrsta áfanga trúnaðarmannafræðslu BSRB og Félagsmálaskóla alþýðu sem lauk fyrir páska. Ákveðið hefur verið að endurtaka námskeiðið dagana 5. - 7. maí í vor. Samtímis verður námskeiðið kennt í gegnum fjarfundabúnað í Vestmannaeyjum. Skráning er hafin á námskeiðið í maí.

Björgvin G. Sigurðsson viðskiptaráðherra, Liselotte Widing verkefnisstjóri Leiðakerfis neytenda og Gísli Tryggvason, talsmaður neytenda.
Leiðakerfi neytenda (http://www.neytandi.is/) sem er gagnvirk vefgátt á vegum talsmanns neytenda var opnuð af viðskiptaráðherra nýlega. Þar geta neytendur á einum stað leitað bæði upplýsinga um rétt sinn og fengið aðstoð við að leita réttar síns - annað hvort beint hjá seljanda vöru eða þjónustu sem er fyrsta skrefið eða, ef það dugar ekki, með því að kerfið hjálpar við að setja saman kæru til úrskurðarnefndar eða annars aðila sem tekur á málum neytenda.

Hinn alþjóðlegi dagur vatnins er nú sem endranær haldinn 22. mars. Blessunarlega erum við Íslendingar einstaklega vel settir þegar kemur að aðgengi að vatni, en öðru máli gegnir um aðra heimshluta. Áætlað hefur verið að dag hvern deyi um 10.000 manns, aðallega börn, sökum skorts á hreinu drykkjarvatni og hafa Sameinuðu þjóðirnar sett vatnsvandann á lista svokallaðra þúsaldarmarkmiða sem flest ríki hafa skuldbundið sig til að ná.

Ívar Baldvin formaður Lúðrasveitar verkalýðsins og Ögmundur Jónasson formaður BSRB.

Í  dag var undirritaður samningur á milli BSRB og Lúðrasveitar verkalýðsins þar sem BSRB skuldbindur sig til að styrkja lúðrasveitina um 350 þúsund kr. á ári á árunum 2008 og 2009. Í staðinn mun Lúðrasveit verkalýðsins leika í 1. maí kaffi BSRB auk þess sem bandalaginu er heimilt að fá lúðrasveitina til að leika við tvö önnur tilefni árlega.

Vinningsnúmerið í happdrætti kjarakönnunar BSRB, BHM og KÍ var 11066. Það er Margrét Eiríksdóttir sem hlýtur borgarferð fyrir tvo til Evrópu í vinning. Margrét er í Félagi íslenskra hjúkrunarfræðinga.

2. tbl. Dreifibréfs BSRB 2008 er komið út. Í því er haldið áfram að fjalla um breytingar á almannatryggingarkerfinu og yfirlýsingu ríkisstjórnarinnar frá 5. desember 2007.

Póstmannafélag Íslands samþykkti kjarasamning félagsins við Íslandspóst með rúmum 76% atkvæða þeirra sem greiddu atkvæði. Á  kjörskrá voru 1163 og greiddu 565 atkvæði eða um 48% félagsmanna.

Alþjóðlegur baráttudagur kvenna var haldinn hátíðlegur sl. laugardag. "Friður og menning" var yfirskrift fjölbreyttrar dagskrár í Tjarnarsal Ráðhúss Reykjavíkur. Að fundinum stóðu fjölmörg félög og hagsmunasamtök sem starfa þágu kvenna, launafólks, jafnréttis, mannréttinda og friðar.

Margrét Kristmannsdóttir framkvæmdastjóri Pfaff og formaður Félags kvenna í atvinnurekstri var á meðal frummælenda á fundi samtaka launafólks um launajafnrétti 6. mars sl. Margrét á sæti í öðrum af tveimur starfshópum sem félagsmálaráðherra skipaði í haust en meginviðfangsefni þeirra er að leita markvissra leiða til að eyða óútskýrðum launamun kynjanna, sem og að jafna stöðu kvenna og karla í nefndum og við stjórnun stofnana og fyrirtækja. Margt athyglisvert er að finna í erindi Margrétar og er það birt hér á eftir í heild sinni.

Aðferðir til að ná launajafnrétti - kostir, gallar og nýjar hugmyndir, var yfirskrift fundar sem samtök launafólks BSRB, BHM, ASÍ,KÍ og SSF stóðu fyrir í dag í Rúgbrauðsgerðinni. Fundurinn var haldinn í tilefni af alþjóðlegum baráttudegi kvenna 8. mars. Hann var vel sóttur og heppnaðist mjög vel að öllu leyti.

Friður og menning er yfirskrift fjölbreyttrar dagskrár í tilefni af alþjóðlegum baráttudegi kvenna fyrir friði og jafnrétti sem haldin verður í Tjarnarsal Ráðhúss Reykjavíkur laugardaginn 8. mars kl. 14.00.

Konur -  virkjum kraftinn - horfum fram á við - er yfirskrift kvennafundar á Nasa við Austurvöll laugardaginn 8. mars kl. 17.00. Það eru konur í almannaþjónustu sem standa fyrir fundinum. Á fundinum verður þeirri spurning svarað hvort það skipti máli að konur séu í áhrifastöðum?

Aðferðir til að ná launajafnrétti - kostir, gallar og nýjar hugmyndir, er yfirskrift fundar sem samtök launafólks BSRB, BHM, ASÍ,KÍ og SSF bjóða til 6. mars næstkomandi kl. 13:00 - 16:00 í Rúgbrauðsgerðinni, Borgartúni 6, Reykjavík. Fundurinn er haldinn í tilefni af alþjóðlegum baráttudegi kvenna 8. mars.

Efnt verður til útifundar á Lækjartorgi í hádeginu á morgun, miðvikudaginn 5. mars klukkan 12:15, til að mótmæla blóðbaðinu á Gazaströnd. Kröfur dagsins eru: Stöðvum fjöldamorðin og rjúfum umsátrið um Gaza. Ræðumenn verða Katrín Fjeldsted læknir og Ögmundur Jónasson alþingismaður. Fundarstjóri er Sveinn Rúnar Hauksson formaður Félagsins Ísland-Palestína.

„Án þess þó að hafa rannsakað það nákvæmlega, þá held ég að það hafi ekkert íslenskt fyrirtæki farið í útrás, án þess að lífeyrissjóðir hafi verið þar meðal helstu fjárfesta. Eðli síns vegna eru lífeyrissjóðir mjög æskilegir fjárfestar fyrir fyrirtæki, já ég segi æskilegir fjárfestar jafnvel þótt öllum sé heimilt að kaupa og selja fyrirtæki sem skráð er á markaði. Fjárfestingarrammi lífeyrissjóða er mun lengri en flestra annarra fjárfesta þannig að eign þeirra skapar ákjósanlega kjölfestu í hluthafahópi og gerir fyrirtækjum kleift að horfa lengra fram á veg í ákvörðunum sínum," sagði Sigurður Einarsson stjórnarformaður Kaupþings banka m.a. í erindi sem hann hélt á Málstofu BSRB í dag en vel á annað hundrað manns sótti málstofuna.

"Stjórn SLFÍ  tekur undir orð formanns Landsamtaka eftirlaunaþega Helga Hjálmarssonar, um yfirlýsingu ríkisstjórnarinnar 5. desember 2007  að fyrirhugaðar aðgerðir ríkisstjórnar Íslands til að bæta kjör aldraðra og öryrkja  sé; "OF LÍTIÐ OF SEINT." Fundurinn vekur athygli stjórnvalda á þeirri staðreynd að með fyrirhuguðum aðgerðum  er enn gengið á rétt þeirra einstaklinga sem með ráðdeild og sparnaði hafa lagt til hliðar til elliáranna  með greiðslum í lífeyrissjóði, sérstökum aldurstengdum lífeyrissparnaði  og/eða öðrum sparnaði," segir í upphafi ályktunar sem félagsstjórn Sjúkraliðafélags Íslands samþykkti í gær.

BSRB stendur fyrir málstofu um lífeyrismál í BSRB - húsinu Grettisgötu 89 föstudaginn 29. febrúar kl. 13 - 15.30. Erindi flytja Sigurður Einarsson stjórnarformaður Kaupþings banka, Sigríður Lillý Baldursdóttir forstjóri Tryggingastofnunar ríkisins, Hrafn Magnússon framkvæmdastjóri Landssambands lífeyrissjóða, Katrín Jakobsdóttir alþingismaður og Ögmundur Jónasson formaður BSRB. Fundarstjóri er Kristín Á. Guðmundsdóttir formaður Sjúkraliðafélags Íslands.

Sigur vannst í tveimur málum sem SFR rak fyrir héraðsdómi Reykjavíkur. Annars vegar var um að ræða biðlaunamál sem höfðað var gegn Hjartavernd og hins vegar mál gegn ríkinu um endurkröfu á ofgreiddum launum til félagsmanns SFR.

Samkomulag hefur náðst um nýjan kjarasamning milli Póstmannafélags Íslands og Íslandspósts hf.  Samningurinn er sambærilegur við samninga sem gerðir voru milli aðildarfélaga Alþýðusambands Íslands og Samtaka atvinnulífisins um síðustu helgi.

"Stjórn BSRB mótmælir harðlega þeirri kröfu sem Samtök atvinnulífsins hafa sett fram á hendur ríkisstjórninni um að hún fylgi þeirri launastefnu sem mótuð verði við samningaborð Samtaka atvinnulífsins. Þessi krafa um forræðisvald atvinnurekenda er ósvífin og ólýðræðisleg því hún byggir á því að hundsaðar verði kröfur sem fram koma frá hendi samtaka opinberra starfsmanna í kjarasamningum þegar þeir losna í vor. Krafan er einnig ósvífin að því leyti að hún byggir á því að launakjör á þeim stofnunum sem nú búa við vaxandi manneklu vegna bágra kjara verði ekki leiðrétt eins og margoft hefur verið látið í veðri vaka af hálfu stjórnvalda að gert verði í komandi kjarasamningum," segir m.a. í ályktun sem stjórn BSRB hefur sent frá sér.

Fyrsta tölublað Dreifibréfs BSRB árið 2008 er komið á netið. Í Dreifibréfinu er fjallað um breytingar á almannatryggingakerfinu og yfirlýsingu ríkisstjórnarinnar frá 5. desember 2007. Einnig er fjallað um efnahagshorfurnar við upphaf kjarasamninga.

Í morgun áttu fulltrúar læknaritara, ásamt formönnum BSRB og SFR, fund með forstöðumönnum Landspítala háskólasjúkrahúss um fyrirhugaða „útvistun" á störfum læknaritara á sjúkrahúsinu og málefni sem því tengjast. Ögmundur Jónasson, formaður BSRB, sagði fundinn hafa verið gagnlegan. Fulltrúar stéttarfélaganna hefðu ítrekað mótmæli sín við einkvæðingu þessarar starfsemi og teflt fram rökum máli sínu til stuðnings.  Engin  sameiginleg niðurstaða varð á fundinum en ákveðið var að halda viðræðum áfram og horfa þá jafnframt til lengri tíma.

Héraðsdómur Reykjavíkur hefur dæmt Landspítala til að greiða þremur starfsmönnum bætur vegna uppsagna en dómurinn taldi, að ekki hefði verið rétt staðið að uppsögnum starfsmannanna árið 2006. Sá sem hæstu bæturnar hlýtur fær 900 þúsund, annar fær 400 þúsund og sá þriðji 300 þúsund. Tveir starfsmannanna voru félagar í SFR og einn í Starfsmannafélagi Reykjavíkurborgar. Það voru félögin sem ráku málin. Gísli Guðni Hall hrl. var lögmaður stefnenda.

Samflotsfélögin hafa tekið í notkun nýja og bætta heimasíðu sem er ætlað að verða upplýsingaveita í komandi kjarasamningavinnu Samflotsfélaganna. Slóðin á heimasíðuna er www.samflot.is

Í gær var haldinn hjá ríkissáttasemjara fyrsti fundur samninganefnda Póstmannafélagsins og Íslandspósts.  Á fundinum var farið yfir stöðu samninganna með sáttasemjara.  Næsti fundur samningsaðila verður á morgun föstudaginn 1. febrúar.

BSRB í samvinnu við Félagsmálaskóla alþýðu mun nú í vor og næstu misseri bjóða upp á mjög öfluga trúnaðarmannafræðslu sem er metin til 10 eininga á framhaldsskólastigi. Námskeiðið verður í fimm  hlutum. Fyrsti hluti hefst 17. mars nk. og lýkur 19 mars. Í þessum fyrsta áfanga er lögð höfuðáhersla á vinnumarkaðinn og verkalýðshreyfinguna, störf og stöðu trúnaðarmannsins. Einnig er fjallað um fjölmenningu á vinnustöðum og samskipti á vinnustað. Kennarar eru Haukur Harðarson, Maríanna Traustadóttir og Helga Björk Pálsdóttir. Námskeiðið fer fram í BSRB - húsinu Grettisgötu 89.

Vinningsnúmerið í happdrætti kjarakönnunar BSRB, BHM og KÍ er 110666. Í vinning er helgarferð fyrir tvo til Evrópu. Vinningshafinn hafi samband við Capacent rannsóknir í síma 5401000 eða skrifstofu sinna heildarsamtaka.

Stjórn og samninganefnd Póstmannafélags Íslands hefur ákveðið að vísa kjaradeilu félagsins við Íslandspóst hf. til Ríkissáttasemjara.  Þessi ákvörðun var tilkynnt samninganefnd fyrirtækisins á fundi í dag. Aðilar hafa  á síðustu þrem mánuðum haldið fimm fundi, var það mat samninganefndar Póstmannafélagsins að ef samningar eiga að nást þurfi aðkomu Ríkissáttasemjara að málinu.

"Læknaritarastarfið er eitt af lykilstörfum í heilbrigðiskerfinu. Persónuverndarsjónarmið og krafa um góða fagmennsku eru þar grundvallaratriði. Læknaritarar vilja að sjálfsögðu koma að endurskipulagningu á verksviði sínu ef um slíkt ætti að vera að ræða. Furðu sætir að stjórnendur á LSH skuli sýna starfsstéttinni þá framkomu sem raun ber vitni," segir m.a. í grein eftir Árna Stefán Jónsson formann SFR og Ögmund Jónasson formann BSRB sem birtist í Morgunblaðinu í dag. Í greininni segir einnig að yfirlýstur tilgangur með útvistun sé að ná niður útgjöldum sem stéttarfélögin óttast að verði á kostnað starfsmanna.

Í morgun slitnaði upp úr viðræðum um málefni vaktavinnufólks milli BSRB og BHM annars vegar og ríkis og sveitarfélaga hins vegar. Þessar viðræður hafa staðið allar götur frá síðustu kjarasamningum en þá var gerð bókun þess efnis að farið yrði í saumana á málefnum vaktavinnufólks og leitað leiða til að gera vaktavinnu eftirsóknarverðari.

„Ég lít hugmyndir stjórnenda á Landspítala háskólasjúkrahúsi um að bjóða út störf læknaritara mjög alvarlegum augum enda augljóslega um að ræða aðför að réttindum og kjörum. Útboðin eru hugsuð til að  ná kostnaði niður og þar sem fyrst og fremst er um að ræða launakostnað er ljóst hvert spjótunum er beint," segir Ögmundur Jónasson formaður BSRB um áform Landspítalans að úthýsa störfum læknaritara.