BSRB óskar landsmönnum gleðilegra jóla og farsældar á nýju ári.

Stjórn BSRB gerir sér fulla grein fyrir nauðsyn þess að ríkissjóður afli sér aukinna tekna í gegnum skattkerfið en varar við þeim áhrifum sem boðaðar breytingar á óbeinum sköttum munu hafa á verðlag og þar með skuldastöðu heimilanna. Afar mikilvægt er að skatta­hækkanir hafi ekki áhrif á neysluverðsvísitöluna.

BSRB ákvað að senda ekki vinum og velunnurum jólakort þetta árið heldur að nýta peningana til góðgerða. Ákveðið var að veita Mæðrastyrksnefnd Reykjavíkur styrk að upphæð 300 þúsund krónur enda vitað að sá styrkur mun nýtast vel þeim sem mest þurfa á að halda nú um hátíðirnar.

Samgöngu- og sveitarstjórnarráðuneytið úrskurðaði ákvörðun sveitarfélags um uppsögn félagsmanns BSRB ólögmæta 18. nóvember s.l.

SFR telur ólöglega staðið að breytingum á rekstrarformi búrekstursins hjá Landbúnaðarháskólanum á Hvanneyri en í kjölfar breytinganna hefur öllum starfsmönnum sem komu að búrekstrinum verið sagt upp og einungis hluti þeirra verið endurráðinn og þá á allt öðrum og lakari starfskjörum.

Formenn og framkvæmdastjórar aðildarfélaga NTR (Nordisk tjenestemannsråd) funda nú í Kaupmannahöfn. Þeir heimsóttu í gær loftslagsráðstefnu Sameinuðu þjóðanna í Bella senter. Fulltrúar BSRB á fundinum í Kaupmannahöfn eru Elín Björg Jónsdóttir formaður BSRB og Helga Jónsdóttir framkvæmdastjóri.

Héraðsdómur Vesturlands dæmdi í gær Stykkishólmsbæ til að greiða sjúkraliða bætur upp á 5,8 milljónir króna vegna ólögmætrar uppsagnar auk málskostnaðar upp á 800 þúsund krónur.

Verkefnisstjórn 50+ hefur skilað af sér skýrslu til félagsmálaráðherra þar sem farið er yfir störf hópsins undanfarin 5 ár. Verkefnisstjórnin var skipuð 7 fulltrúum, sex þeirra voru tilnefndir af aðilum vinnumarkaðar og hinu opinbera þ.e. Sambandi íslenskra sveitarfélaga, Samtökum atvinnulífsins, Fjármálaráðuneyti, Alþýðusambandi Íslands, Vinnumálastofnun en Bandalag starfsmanna ríkisins, Bandalag háskólamanna og Kennarasamband Íslands tilnefndu sameiginlega einn fulltrúa. Formaður var skipaður án tilnefningar.

Sjúkraliðafélag Íslands telur að mjög sé brotið á sjúkraliðum og gerir alvarlegar athugasemdir við að verið sé að ráða hjúkrunarfræðinga í störf sjúkraliða. Þá hafa félaginu borist kvartanir vegna þess að hjúkrunarnemar eru ráðnir í störf sjúkraliða.

Trúnaðarmanna-fræðsla BSRB og Félagsmálaskóla alþýðu hefst aftur í janúar. Fyrsta þrep verður haldið 18. - 20 janúar. Annað þrep verður haldið 25. - 27. janúar, þriðja þrep 1. - 3. febrúar, fjórða þrep 8. - 10. febrúar, fimmta þrep er kennt dagana 15. - 17. febrúar og sjötta þrep 1. og 2. mars. Námskeiðin eru í BSRB húsinu, Grettisgötu 89, og eru frá kl. 9 til 16 alla dagana.

"Innan verkalýðshreyfingar-innar gerum við okkur vissulega grein fyrir því að nú þegar unnið er að lokafrágangi fjárlaga á Alþingi fyrir komandi ár standa spjótin á stjórnvöldum úr öllum áttum. Margir vilja koma sínum sjónarmiðum á framfæri. Samtök atvinnulífsins leggjast gegn álögum á stóriðju en hafa hins vegar illu heilli tekið undir með þeim sem tala fyrir því að í staðinn verði ýmsar aðrar álögur hækkaðar, svo sem tryggingagjald og aðrir launaskattar á lágtekju- og millitekjuhópa. Ekki fáum við heldur stuðning úr þeim herbúðum til að verja almannaþjónustuna," segir í grein eftir Elínu Björgu Jónsdóttur formann BSRB sem birtist í Fréttablaðinu í gær.

SFR-stéttarfélag í almannaþjónustu, Starfsmannafélag Reykjavíkurborgar, Sjúkraliðafélag Íslands og Efling héldu í gær sameiginlegan fund með trúnaðarmönnum félaganna á Landspítala-Háskólasjúkrahúsi. Þar hafa orðið miklar breytingar í starfsumhverfinu að undanförnu og meiri breytingar eru boðaðar. Markmiðið með fundinum var að fá upplýsingar beint frá trúnaðarmönnum um hvernig ástandið væri í þeirra vinnuumhverfi og hvað þeir sæju gerast í nánustu framtíð.

Sjúkraliðar stóðu fyrir málþingi í Gerðubergi sl. fimmtudag. Á málþinginu var fjallað um "Hjúkrun og aðbúnað geðfattlaðra" og var það haldið í tilefni af Evrópudegi sjúkraliða og var mjög vel heppnað. Að málþinginu stóðu fjórar félagsdeildar Sjúkraliðafélags Íslands, þ.e. Reykjavíkurdeild, Suðurlandsdeild, Suðurnesjadeild og Vesturlandsdeild. Auk þeirra komu að undirbúningi málþingsins Sérdeild í hjúkrun aldraðra og Ungliðadeild félagsins.

Starfsmennta-verðlaunin voru afhent í BSRB-húsinu í dag. Starfsmennta-verðlaunin eru veitt þeim sem eru að vinna framúrskarandi starf í starfsmenntun. Tilgangur Starfsmenntaverðlaunanna er að styðja við nýsköpun og framþróun starfsmenntunar á Íslandi. Stjórnvís hlaut verðlaun í flokki félagasamtaka og einstaklinga. Iðan fræðslusetur hlaut verðlaun í flokki skóla og fræðsluaðila og Securitas hlaut verðlaun Í flokki fyrirtækja.

Framkvæmdastjórn Landspítala - háskólasjúkrahúss var gagnrýnd harðlega á fölmennum fundi Félags læknaritara sem haldinn var í húsi BSRB í gær. Gagnrýnin beindist að fyrirhuguðum breytingum á störfum læknaritara hjá LSH. Félag læknaritara er aðili að SFR.

Framkvæmdastjórn Sjúkraliðafélags Íslands hefur sent frá sér ályktun þar sem skerðingu greiðslna í fæðingarorlofi er mótmælt. Í ályktuninni segir m.a.: "Sjúkraliðafélag Íslands  gerir þá kröfu að aðgerðir stjórnvalda til að mæta fjárlagahalla næstu ára skerði ekki réttindi fólks og að staðinn verði vörður um lífskjör láglauna- og millitekjufólks."

"Stjórn KJALAR telur að áform um breytingar á fæðingarorlofslögum séu brot á samningum við heildarsamtök opinberra starfsmanna. Stjórn KJALAR telur breytingar á greiðslum í fæðingarorlofi sé alvarleg aðför að rétti foreldra og varar við að hróflað verði við lögunum," segir í ályktun frá stjórn Kjalar um skerðingu á greiðslum í fæðingarorlofi.

"BSRB krefst þess að sparnaðarkrafa sem hefur verið lögð á fæðingarorlofssjóð verði endurskoðuð. Íslenska fæðingarorlofskerfið hefur vakið mikla athygli hjá öðrum þjóðum og hefur verið horft til þess sem fyrirmynd.  Ef sparnaðarkröfunni verður haldið til streitu er verið að hverfa áratugi aftur í tímann og vega að þeirri jafnréttishugsun sem í kerfinu felst," segir í ályktun stjórnar BSRB um skerðingu greiðslna í fæðingarorlofi.

Stjórn Starfsmannafélags Fjarðabyggðar hefur sent frá sér yfirlýsingu þar sem undrun og hryggð er lýst yfir þeirri ákvörðun stjórnenda Fjarðabyggðar að leggja niður og loka starfstöð sveitarfélagsins í Neskaupstað og flytja starfsemina á Reyðarfjörð.  

Kjaradeilu Félags íslenskra flugumferðarstjóra og SA fyrir hönd Flugstoða og Keflavíkurflugvallar ohf. var vísað til ríkissáttasemjara í gær. Kjarasamningarnir hafa verið lausir frá síðustu mánaðamótum og hefur lítið þokast í samkomulagsátt. Þetta var því talið heillavænlegast á þessum tímapunkti að sögn flugumferðarstjóra.

Guðbjörn Arngrímsson formaður Starfsmannafélags Fjallabyggðar var kjörinn formaður Samflots á aðalfundi þess sem haldinn var á Hótel Hilton í Reykjavík 20. og 21. nóvember. Elín Björg Jónsdóttir lét af embætti formanns sem hún hafði gegnt frá 1988. Fundarmenn þökkuðu Elínu langt og farsælt samstarf og færðu henni málverk að gjöf með þakklæti fyrir vel unnin störf.

"Stjórn Ungliðadeildar Sjúkraliðafélags Íslands harmar þá stöðu sem upp er komin í íslenska heilbrigðiskerfinu.  Niðurskurður sem ekki sér fyrir endann á og virðist botnlaus hefur nú þegar farið yfir öll þolmörk.  Stjórn deildarinnar leyfir sér að fullyrða að öryggi starfsmanna og skjólstæðinga þeirra sé víðast hvar orðið svo ótryggt að hætta á alvarlegum mistökum eða slysum sé veruleg," segir í byrjun ályktunar sem stjórnin sendi frá sér.

Á aðalfundi BSRB í dag var samþykkt ályktun um mikilvægi almanna-þjónustunnar og var fyrirhuguðum niðurskurði mótmælt harðlega. Í ályktuninni segir m.a.: „Niðurskurður velferðarþjónustunnar er dýrkeyptur og bitnar ekki einungis á þeim sem eiga undir högg að sækja heldur samfélaginu öllu. Þá leiðir niðurskurður á almannaþjónustunni til aukins atvinnuleysis sem þjóð­­félagið sjálft þarf að fjármagna með atvinnuleysisbótum og félagslegum úrræðum. Auk þess bitnar hann ekki síst á konum sem búa nú þegar við óviðunandi launamun."  Í ályktuninni er einnig fjallað um þrepaskipt skattkerfi og önnur tæki til tekjujöfnunar, auðlegðarskatt, óbeina skatta og fleira.

Aðalfundur BSRB tekur undir ályktun slökkviliðsmanna á höfuðborgarsvæðinu sem samþykkt var á félagsfundi 19. nóvember. Þar er því mótmælt harðlega að störf slökkviliðsmanna á Reykjavíkurflugvelli séu  lögð af  og ófaglærðir starfsmenn ráðnir í staðinn.

"Á næstu vikum verður tekist á um skattastefnuna á Alþingi og einnig utan þings því í þjóðfélaginu eru skiptar skoðanir og mismunandi hagsmunir þegar skattkerfið er annars vegar. Vegna þess hve tekjur ríkis og sveitarfélaga hafa fallið af völdum bankahrunsins og keðjuverkandi afleiðinga þess er ekki um annað að ræða en grípa til róttækra aðgerða. Að öðrum kosti verður ekki hægt að stoppa upp í fjárlagagatið," segir í grein eftir Elínu Björgu Jónsdóttur formann BSRB í Morgunblaðinu í gær.

SFR - starfsmannafélag í almannaþjónustu var stofnað í Alþýðuhúsinu í Reykjavík 17. nóvember árið 1939 og er því 70 ára í dag. Stofnendur voru 142 og störfuðu á rúmlega 20 ríkisstofnunum í bænum. Fyrsti formaður var kjörinn Guðjón B. Baldvinsson starfsmaður Tryggingastofnunar ríkisins en hann var á meðal helstu hvatamanna að stofnun félagsins.

Aðalfundur BSRB verður haldinn föstudaginn 20. nóvember. Fundurinn verður haldinn í BSRB - húsinu að Grettisgötu 89 og hefst kl. 9. Á dagskrá fundarins eru venjuleg aðalfundarstörf auk þess sem fulltrúar lífeyrissjóðanna, LSR, LSS og SL, mæta á fundinn og fara yfir stöðu sjóðanna og horfur.

"Landssamband slökkviliðs- og sjúkraflutningamanna harmar þá ákvörðun Flugstoða ohf að frá og með 1. mars 2010 verði ekki slökkviliðsmenn í viðbragðsstöðu á Reykjavíkurflugvelli."

Starfsmenn ríkis og sveitarfélaga geta sótt um styrki til Norrænu ráðherranefndarinnar til að stunda tímabundið starf eða nám á starfsvettvangi sínum í Eistlandi, Lettlandi eða Litháen. Þetta er hluti af mannaskiptaáætlun opinberra starfsmanna á Norðurlöndum og í Eystrasaltsríkjunum.

"BSRB átti aðild að stöðugleikasáttmálanum sem aðilar vinnumarkaðarins komu sér saman um ásamt stjórnvöldum og sveitarfélögum síðastliðið sumar. Bandalagið studdi - og styður enn - það meginmarkmið sáttmálans að verja kjör launafólks og tryggja fulla atvinnu. Hins vegar er ekki sama hvernig að verki er staðið. Það skiptir að sjálfsögðu höfuðmáli hvernig þetta er gert, hverjar áherslurnar eru við atvinnusköpun og hvernig stjórnvöld bera sig að," segir í grein eftir Elínu Björgu Jónsdóttur sem birtist í Fréttablaðinu 11. nóvember.

Hagsmunafélag faglærðra matreiðslumanna í grunnskólum Reykjavíkur var formlega stofnað 5. nóvember sl. Tilgangur félagsins er að efla samheldni félagsmanna auka færni og þekkingu og stuðla að bættum hag þeirra. Félagar geta þeir talist sem stýra mötuneytum í grunnskólum Reykjavíkur. Félagsmenn eru félagar í Starfsmannafélagi Reykjavíkurborgar.

"Enginn deilir um það að áframhaldandi efnahagsþrengingar eru framundan. Þegar finna þeir fyrir kreppunni sem misst hafa vinnu sína, sumir eru í þann veginn að missa heimili sín, og boðaður er niðurskurður í almannaþjónustunni. Margt bendir til þess að kreppan verði dýpri hér en í þeim löndum sem við helst berum okkur saman við," segir í upphafi greinar eftir Elínu Björgu Jónsdóttur formann BSRB.

Í fréttum BSRB 28. október s.l. var fjallað um ný lög sem sett hafa verið með það að markmiði að draga úr skuldavanda heimilanna. Í kjölfarið voru undirritaðir samningar 31. okt s.l. til að lækka greiðslubyrði einstaklinga af fasteignaveðlánum, bílalánum og bílasamningum. Einstaklingar og fjölskyldur geta nú sótt um greiðslujöfnun þessara lána og samninga þannig að greiðslubyrðin mun lækka frá og með gjalddaga í desember. Um greiðslujöfnun fasteignaveðlána í innlendri mynt þarf hins vegar ekki að sækja - hún gerist sjálfkrafa ef lán eru í skilum nema henni sé hafnað sérstaklega.

Kvenréttindafélag Íslands færði Elínu Björgu Jónsdóttur viðurkenningu í gær í tilefni af því að hún er fyrsta konan sem er kjörin formaður BSRB. Meðal þeirra sem afhentu Elínu Björgu viðurkenninguna var Ragnhildur G. Guðmundsdóttir sem var fyrsta konan sem kjörin var varaformaður BSRB.

Ásbjörn Sigurðsson tók við formennsku í Félagi opinberra starfsmanna á Suðurlandi sl. þriðjudag á stjórnarfundi FOSS. Ásbjörn var áður varaformaður félagsins.

Kvenfélaga-samband Íslands afhenti Elínu Björgu Jónsdóttur nýkjörnum formanni BSRB blóm í dag í tilefni af því að hún er fyrsta konan sem gegnir því embætti.

Talsvert er um að félagar í samtökum opinberra starfsmanna á Norðurlöndunum komi í heimsókn til BSRB til að kynna sér efnahagsástandið á Íslandi eftir hrunið. Í síðustu viku tók BSRB á móti tveimur hópum, annars vegar frá Fagforbundet í Stavangri í Noregi og hins vegar frá SKFT í Lundi í Svíþjóð.

Forsætisráðherra og fjármálaráðherra hafa sent frá sér yfirlýsingu fyrir hönd ríkisstjórnarinnar um framgang stöðugleikasáttmálans. BSRB hefur lýst sig reiðubúið að halda áfram samstarfi við ríkisstjórnina og aðra aðila um framgang sáttmálans á grundvelli þessarar yfirlýsingar.

23. október s.l. samþykkti Alþingi lög um aðgerðir í þágu einstaklinga, heimila og fyrirtækja vegna banka- og gjaldeyrishrunsins haustið 2008. Lögunum er ætlað að hvetja til hraðrar endurreisnar íslensks efnahagslífs með endurskipulagningu fjárhags fyrirtækja og einstaklinga.

Nú er þörf á réttlæti - þegar tekjur þjóðarinnar dragast saman þarf að jafna gæðunum. Við þurfum að virkja réttlætiskennd þjóðarinnar og við þurfum að sýna hugkvæmni til að brjótast út úr aðsteðjandi vanda. Það á ekki síst við um samtök launafólks sem standa frammi fyrir geigvænlegum niðurskurði, sagði Elín Björg Jónsdóttir nýkjörinn formaður BSRB m.a. í ræðu sinni þegar hún sleit 42. þingi BSRB.

Að afloknu kjöri formanns BSRB var gengið til atkvæða um aðra fulltrúa í framkvæmdanefnd. Árni Stefán Jónsson formaður SFR var kjörinn 1. varaformaður BSRB, Garðar Hilmarsson formaður Starfsmannafélags Reykjavíkurborgar var kjörinn 2. varaformaður, Þuríður Einarsdóttir formaður Póstmannafélags Íslands var kjörin gjaldkeri og Kristín Á. Guðmundsdóttir formaður Sjúkraliðafélags Íslands var kjörin ritari. Þau voru öll sjálfkjörin.

Elín Björg Jónsdóttir formaður FOSS var kjörin formaður BSRB með 52,38% atkvæða rétt í þessu eða 132 atkvæði af 252. Hún náði kjöri í fyrstu umferð. Árni Stefán Jónsson formaður SFR fékk 82 atkvæði eða 32,54% og Arna Jakobína Björnsdóttir formaður Kjalar fékk 38 atkvæði eða 15,08%. Snorri Magnússon dormaður Landssambands lögreglumanna dró framboð sitt til baka skömmu áður en atkvæðagreiðsla hófst.

„Verja skal kaupmátt almenns launafólks en hann hefur rýrnað mikið á síðustu mánuðum. Stefna ber að kjarajöfnuði því mikill mismunur er enn fyrir hendi þrátt fyrir að dregið hafi úr ofurlaunum í samfélaginu. Mikilvægt skref í þá átt er að eyða kyn­bundnum launa­­mun og greiða sömu laun fyrir sambærilega vinnu," segir m.a. í ályktun 42. þings BSRB  um kjaramál.

„Tryggja þarf að aukin greiðslubyrði hins opinbera á næstu árum bitni ekki á grunnþjónustu í samfélaginu. Almannaþjónustan er mikilvægur hluti af atvinnulífinu og skilar samfélaginu miklum arði. Niðurskurður er því skammgóður vermir, hann er kostnaðarsamur og mun þar á ofan leiða til aukins atvinnuleysis," segir m.a. í ályktun 42. þings BSRB um atvinnumál.

BSRB krefst þess að skilyrði Alþjóðagjaldeyrissjóðsins fyrir lánveitingum verði endurskoðuð í ályktun sem 42. þing bandalagsins hefur samþykkt.

Kosning formanns BSRB fer fram upp úr hádegi í dag á þingi bandalagsins. Eins og kunnugt er hefur Ögmundur Jónasson ákveðið að hætta sem formaður eftir að hafa gegnt starfinu í 21 ár. Fjórir hafa gefið kost á sér til formennsku en til þess að vera réttkjörinn formaður þarf viðkomandi að njóta stuðnings meira en helmings þingfulltrúa.

Á þingi BSRB í dag flutti Páll Skúlason prófessor fyrirlestur sem nefndist: „Staða mála í heiminum. Hvað er til ráða?" Í fyrirlestrinum fjallaði hann um orsakir kreppunnar og hvert bæri að stefna í framtíðinni.

Hátíðardagskrá til heiðurs Ögmundi Jónassyni formanni BSRB sem haldin var í Háskólabíói í gær var mjög fjölsótt og vel heppnuð. Hátíðin var haldin í tilefni af því að Ögmundur hættir nú sem formaður BSRB eftir að hafa gegnt því starfi í 21 ár.

„Við eigum að horfast í augu við það að í þjóðfélaginu ríkir togstreita - það er okkar hlutverk að toga fyrir þá sem standa höllum fæti gagnvart fjármagni og valdi. Það breytir því ekki að togstreitunni á jafnan að beina í eins jákvæðan og uppbyggilegan farveg og kostur er. Ég vil að við séum sem ein fjölskylda. En þá verðum við líka að vera það í reynd," sagði Ögmundur Jónasson formaður BSRB m.a. þegar hann ávarpaði þing BSRB við setningu  þess kl. 11 í morgun á Grand hóteli. Ögmundur hættir nú sem formaður BSRB eftir að hafa gegnt því starfi í 21 ár og var honum þökkuð störf með því að þingheimur reis úr sætum og ætlaði lófaklappi aldrei að linna.

Skrifstofa BSRB er lokuð 21. til 23. október vegna þings BSRB sem haldið er á Grand hóteli í Reykjavík. Þeir sem nauðsynlega þurfa að hafa samband geta hringt í Starfsmannafélag Reykjavíkurborgar í síma 525 8330.

Stjórn BSRB krefst þess að stjórnvöld virði yfirlýsingar sem þau hafa gefið um að verja störf og kjör láglauna- og meðaltekjufólks. Lítils samræmis virðist gæta milli stefnumörkunar stöðugleikasáttmálans sem ríki og sveitarfélög skrifuðu undir í júní og hvernig niðurskurður opinberra aðila birtist í framkvæmd, segir m.a. í ályktun sem stjórn BSRB sendi frá sér í dag.

Hátíðardagskrá til heiðurs Ögmundi Jónassyni formanni BSRB verður haldin í Háskólabíói miðvikudaginn 21. október kl. 17.30. Húsið er opnað kl. 17.

42. þing BSRB verður haldið dagana 21. til 23. október á Grand Hóteli í Reykjavík. Yfirskrift þingsins er: Framtíð byggð á jöfnuði, atvinnu, velferð og réttlæti. Þingsetning er kl. 11.00 miðvikudaginn 21. október.

Fulltrúaráð Starfsmannafélags Reykjavíkurborgar mótmælir harðlega að ekki eigi að standa við áform ríkisstjórnarinnar um hækkun persónuafsláttar sem gefin voru í tengslum við kjarasamninga á árinu 2008.

Undanfarna vetur hefur BSRB staðið fyrir starfslokanámskeiðum á höfuðborgarsvæðinu og reynst mikill áhugi fyrir þessum námskeiðum. Mikill fjöldi fólks hefur sótt námskeiðin og er látið mjög vel af þeim. Fræðslunefnd BSRB telur fulla ástæðu til að endurtaka þessi námskeið í vetur og nú hefur verið ákveðið að vera með starfslokanámskeið í BSRB húsinu dagana 30. nóvember til 2. desember.

Trúnaðarmannafundur Kjalar, stéttarfélags starfsmanna í almannaþjónustu, samþykkti í gær ályktun þar sem varað er við skerðingu á almannaþjónustunni þegar mest ríður á að styðja við þá sem eiga í vök að verjast vegna afleiðinga kreppunnar.

Stjórn BSRB mótmælir harðlega þeim áformum núverandi ríkisstjórnar að ætla sér ekki að standa við gefin fyrirheit frá árinu 2008 um að létta skattbyrði hinna tekjulægstu með hækkun persónuafsláttar. Vísast þar til sérstakrar yfirlýsingar ríkisstjórnar Geirs H. Haarde frá 17. febrúar 2008 en sú yfirlýsing var grundvallarforsenda kjarasamninga á almennum og opinberum vinnumarkaði á því ári.

Kjarasamningur milli KJALAR, stéttarfélags starfsfólks í almannaþjónustu og Samtaka fyrirtækja í heilbrigðisþjónustu, SFH, sem undiritaður var 28. september var samþykktur í atkvæðagreiðslu. 

Tveir ráðgjafar hafa verið ráðnir til BSRB til að sinna starfsendurhæfingu fyrir félagsmenn. Þeir munu starfa hjá styrktarsjóðum aðildarfélaga BSRB í samvinnu við Virk, Starfsendurhæfingarsjóð. Starfsemin miðar að því að draga markvisst úr líkum á því að launafólk hverfi af vinnumarkaði vegna varanlegrar örorku. Það er m.a. gert með því að auka virkni og efla endurhæfingu og önnur úrræði.

"Stjórn og trúnaðarmenn Félags opinberra starfsmanna á Suðurlandi, FOSS  vilja beina þeim tilmælum til sveitarstjórnarmanna að gera allt sem í þeirra valdi stendur til að koma í veg fyrir að þjónusta sveitarfélaganna verði skert á þeim samdráttartímum sem framundan eru.  Nærþjónustan við fólkið er alltaf mikilvæg en aldrei sem á tímum erfiðleika,"  segir í ályktun sem samþykkt var á fundi stjórnar- og trúnaðarmanna FOSS á Hótel Selfossi í gær 5. október.

Nú eru liðin 25 ár síðan hörðustu átök á vinnumarkaði í áratugi hófust með BSRB-verkfallinu 4. október 1984. Verkfallið var víðtækt og lamaði þjóðfélagið meira og minna í fjórar vikur, eða allt til 30. október þegar loks var skrifað undir samninga.

Stjórn Sjúkraliðafélags Íslands lýsir yfir miklum áhyggjum vegna fyrirhugaðs niðurskurðar á heilbrigðisþjónustu landsmanna, í ályktun sem félagið sendi frá sér í gær. Í ályktuninni segir að niðurskurður á fjárveitingum til sjúkrahúsa og annarrar heilbrigðisþjónustu  skerði þjónustu við  alla sem þurfa á henni að halda. Niðurskurðurinn valdi stórauknu álagi á starfsfólk, með tilheyrandi eftirmálum; óbætanlegu heilsutjóni, kvíða og óöryggi.

Hæstiréttur hefur staðfest niðurstöðu héraðsdóms í máli félagsmanns Sjúkraliðafélags Íslands gegn Alhjúkrun ehf. um að fyrirtækinu beri að greiða starfsmanninum laun samkvæmt kjarasamningum Sjúkraliðafélagsins. Sjúkraliðafélagið aðstoðaði félagsmann við málshöfðun fyrir héraðsdómi Reykjavíkur.

Á fyrsta fundi fulltrúaráðs Starfsmannafélags Reykjavíkurborgar sem haldinn var í gær var samþykkt ályktun þar sem þess var krafist að lánveitendur verði látnir taka ábyrgð til jafns við lántakendur á efnahagshruninu.

Starfsmannafélag Suðurnesja, Starfsmannafélag Hafnarfjarðar og Starfsmannafélag Vestmannaeyjabæjar hafa undirritað og samþykkt nýjan kjarasamning við HS Orku hf. Síðasti gildandi kjarasamningur framlengist til 31. desember 2010 með þeim breytingum og fyrirvörum sem í hinum nýja samningi eru. Samningurinn er á svipuðum nótum og þeir samningar sem samþykktir hafa verið á undanförnum mánuðum. Við gildistöku sem er frá 1. maí 2009 hækka laun um 7.750 krónur, 1. nóvember um 1.75% og 1. júní 2010 um 2.5%.

Samband lífeyrisþega ríkis og bæja, SLRB, lýsir áhyggjum sínum yfir fyrirhuguðum niðurskurði í heilbrigðis- og velferðarkerfinu. Ekki sé einungis um að ræða hvort skera skuli niður, heldur hvar innan velferðarkerfisins skorið ver'i niður og hvernig staðið er að slíkum niðurskurði, hvort nægilega góðar upplýsingar séu til staðar í kerfinu, hvort einhverskonar skipulagt áhættumat og/eða spár liggi fyrir um langtíma áhrif niðurskurðar og samdráttar af því tagi sem stefnt er að. Skorar SLRB á heilbrigðisráðherra að beita sér fyrir því að slíkt áhættumat fari fram áður en tekin verður ákvörðun um stórfelldan niðurskurð innan velferðarkerfisins, með ófyrirsjáanlegum  afleiðingum.

Framvegis, miðstöð um símenntun, hefur sent frá sér námsvísi fyrir haustönn 2009 þar sem boðið er upp á mjög fjölbreytt námsframboð. Meðal þess sem boðið er uppá er ritara- og skrifstofustjóra-nám en umsóknarfrestur fyrir það rennur út 10. september. Þá er í boði margvíslegt nám fyrir sjúkraliða, félagsliða, starfsfólk í þjónustu- og skrifstofustörfum o.fl. Framvegis er í eigu Verzlunarskóla Íslands, BSRB, SLFÍ, SFR og Starfsmannafélags Reykjavíkurborgar.

Nú er tækifæri til að skreppa úr bænum um helgina og leigja sér hús í Stóru skógum í Munaðarnesi. Spáin fyrir helgina á Vesturlandi er mjög góð og tilvalið að skreppa í berjamó enda berjaspretta með besta móti í ár. Í Kaffi Munaðarnesi verður suðræn stemming á laugardagskvöldið þar sem Delizie Italiane skemmta gestum auk þess sem tilvalið er að snæða góðan kvöldverð fyrir dansinn. Húsin er hægt að bóka í gegnum heimasíðu BSRB eða hafa samband við skrifstofu BSRB í síma 525 8300.

Þjónustuskrifstofa stéttarfélaganna á Suðurlandi ásamt Foss, Bárunni, VMS, VLFS og FIT hefur gert samning við Virk starfsenduhæfingarsjóð um starf ráðgjafa á sviði starfsendurhæfingar. Ef starfshæfni er skert eða henni er ógnað vegna heilsubrests þá er hægt að leita til ráðgjafa hjá þjónustuskrifstofu stéttarfélaganna á Suðurlandi að Austurvegi 56, 3. hæð.

Samkomulag um breytingar og framlengingu á kjarasamningi milli St.Rv. og Strætó bs. var samþykkt með 68 atkvæðum eða 70,1%, 24 greiddu atkvæði á móti samkomulaginu eða 24,7%, auðir og ógildir voru 5 eða 5,2%. Atkvæði greiddu 97 eða 51,1% félagsmanna á kjarasamningi við Strætó bs.

Nú hefur verið ákveðið að hefja kórstarf BSRB aftur að nýju og nú að fullu. Fyrstu æfingar verða í byrjun september og við skorum á áhugasama, hvar sem er innan BSRB að skrá sig og taka þátt í gefandi kórstarfi í vetur.

42. þing BSRB verður haldið á Grand hótel dagana 21. - 23. október nk. Áætlaður fjöldi þingfulltrúa er um 260 og verða þeim send öll gögn sem varða þingið fyrir lok september.

Starfsmannafélag Reykjavíkurborgar og Strætó bs undirrituðu í gær samkomulag um breytingar og framlengingu á fyrri kjarasamningi. Samkomulagið er að öllu leyti sambærilegt því samkomulagi sem félagið gerði við Reykjavíkurborg fyrr í sumar, þar sem verið er að tryggja hækkanir lægstu launa. Samningurinn gildir frá 31. ágúst 2009 til 30. nóvember 2010.

Aðildarfélög BSRB sem gengu frá kjarasamningum við ríki og sveitarfélög í byrjun júní hafa lokið atvæðagreiðslu um samningana. Þrjú félög felldu samningana en önnur félög hafa samþykkt þá.

Umboðsmaður Alþingis ákvað að taka til athugunar að eigin frumkvæði hvernig aðkomu ráðuneyta væri almennt háttað að málum þar sem fyrir liggur tiltekinn kerfisvandi í starfsemi undirstofnunar ráðuneytis. Með kerfisvanda vísar umboðsmaður til verulegra samskiptaörðugleika á milli starfsmanna ríkisstofnana eða að fram hafi komið ásakanir frá starfsmanni um einelti af hálfu annarra starfsmanna og/eða yfirmanns.

Starfsmannafélag Garðabæjar undirritaði samkomulag við Launanefnd sveitarfélaga í gærmorgun, 8. júlí. Samningurinn er á sömu nótum og önnur Starfsmannafélög sveitarfélaga höfðu samið um deginum áður. Hækkanirnar eru þær sömu og horft til lægstu launa.

Flest aðildarfélög BSRB sem semja við Launanefnd sveitarfélaga skrifuðu undir nýjan kjarasamning fyrr í kvöld. Samningurinn er mjög á svipuðum nótum og kjarasamningur Starfsmannafélags Reykjavíkurborgar sem undirritaður var í gær og samningurinn við ríkið á föstudag. Megináhersla við gerð samninganna var lögð á að hækka launataxta sem eru undir 180.000 kr. og kemur sú hækkun í þremur áföngum.

Kjarasamningur milli Reykjavíkurborgar og Starfsmannafélags Reykjavíkurborgar var undirritaður á áttunda tímanum í kvöld, 6. júlí. Líkt og samningur aðildarfélaga BSRB við ríkið er áhersla lögð á að hækka lægstu laun félagsmanna. Laun undir 180 þúsund krónum hækka um 6.750 1. júlí og 1. nóvember og um 6.500 1. júní 2010. Laun upp að 210.000 krónum hækka árið 2009 en launahækkanir fara stiglækkandi eftir því sem launatalan hækkar.

Samninganefnd Reykjavíkurborgar ákvað í kvöld að fresta viðræðum við Starfsmannafélag Reykjavíkurborgar fram yfir helgi. Þegar það lá fyrir treysti Launanefnd sveitarfélaga sér ekki til að undirrita kjarasamning við önnur starfsmannafélög.

Undirritað hefur verið samkomulag um breytingar og framlengingu á kjarasamningi aðildarfélaga BSRB við ríkið. Gildistími er til 30. nóvember 2010. Í samkomulaginu felast leiðréttingar á lægstu launum eins og gert var ráð fyrir í stöðugleikasáttmála aðila vinnumarkaðarins og ríkisstjórnarinnar frá 25. júní. Persónu- og orlofsuppbót hækka. Þá er í samningnum sérstakt ákvæði um Starfsendurhæfingarsjóð.Í bókunum er m.a. að finna nýtt ákvæði um aðkomu aðildarfélaga BSRB að Fræðslumiðstöð atvinnulífsins.

Viðræður aðildarfélaga BSRB og samninganefndar ríkisins um nýja kjarasamninga hófust í morgun. Viðræður við launanefnd sveitarfélaga og samninganefnd Reykjavíkurborgar hefjast á morgun.

Samtök opinberra starfsmanna, BHM, KÍ og BSRB hafa tekið þátt í samráði aðila vinnumarkaðarins um kjarasamningagerð og forsendur hennar í ljósi efnahagsþrenginga í landinu. Myndin af umfangi fjárhagsvandans er fyrst nú að skýrast og er mun dekkri en lá fyrir við upphaf vinnunnar. Samtökin hafa  lagt áherslu á að verja störf og kjaraumhverfi félagsmanna.

Skrifað var undir stöðugleikasáttmála aðila vinnumarkaðarins og ríkisstjórnarinnar í Þjóðmenningar-húsinu kl. 13:30. Markmið sáttmálans er að stuðla að endurreisn efnahagslífsins. Í framhaldi af undirskriftinni munu opinberir starfsmenn hefja samningaviðræður við ríki og sveitarfélög um nýja kjarasamninga en aðilar á almenna vinnumarkaðinum hafa náð samkomulagi um framlengingu kjarasamninga til haustsins 2010.

„Það eru fleiri ljón í veginum en ég gerði ráð fyrir í byrjun vikunnar um að aðilar næðu saman," sagði Árni Stefán Jónsson varaformaður BSRB um hvernig þríhliða viðræðum aðila vinnumarkaðarins og ríkisstjórnarinnar um stöðugleikasáttmálann miðaði. Ágreiningurinn snýst fyrst og fremst um hvernig skuli fara með ríkisfjármálin.

Fulltrúar BSRB og aðila vinnumarkaðarins áttu í gær fund með ríkisstjórninni þar sem hugmyndir um stöðugleikasáttmála voru ræddar áfram. Þessir aðilar hittust svo aftur í morgun. Í dag kl. 14 ætlar stóra samninganefndin að hittast og í framhaldi af því er fyrirhugaður nýr fundur með ríkisstjórninni þar sem stefnt er að því að ganga frá stöðugleikasáttmálanum.

Fjölmenni var á menningarhátíð BSRB í Munaðarnesi sl. laugardag. Þar var opnuð myndlistarsýning Ingibergs Magnússonar. Hátíðargestir skemmtu sér konunglega við upplestur Einars Más Guðmundssonar þegar hann fór með ljóð sín og spjallaði við gesti hátíðarinnar. Þóra Einarsdóttir óperusöngkona söng við undirleik Önnu Guðnýjar Guðmundsdóttur og voru listamennirnir ítrekað klappaðir upp.

Ríkisstjórnin lagði fram frumvarp til laga um ráðstafanir í ríkisfjármálum í gær. Árni Stefán Jónsson varaformaður BSRB sagði að með þessum aðgerðum væri lögð megináhersla á tekjuhliðina og reynt að hlífa niðurskurði í rekstri og þjónustu ríkisins á næsta ári. Hann sagði það jákvætt en menn hefðu hins vegar áhyggjur af því hvað muni gerast árin 2011 og 2012.

Trúnaðarmanna-fræðsla BSRB og Félagsmálaskóla alþýðu hefst aftur í september.   Annað þrep verður haldið 14. - 16. September, þriðja þrep 21. - 23. September og fjórða þrep 28. - 30. septrember. Fyrsta þrep er kennt dagana 2. - 4. nóvember, en þá er trúnaðarmannakjöri lokið hjá flestum aðildarfélögum BSRB. Námskeiðin eru í BSRB húsinu, Grettisgötu 89, og eru frá kl. 9 til 16 alla dagana.

Nokkur hús eru laus í orlofshúsabyggð BSRB í Munaðarnesi nú um helgina. Húsin eru í Stóruskógum og einnig lítil hús í Munaðarnesi. Hægt er að fá þau í helgarleigu eða vikuleigu. Félagsmenn í BSRB geta bókað húsin beint í gegnum heimasíðu BSRB. Nánari upplýsingar gefur skrifstofa BSRB í síma 525 8300.

Myndlistarsýning Ingibergs Magnússonar verður opnuð á menningarhátíð BSRB í Munaðarnesi laugardaginn 20. júní kl. 14. Á hátíðinni mun Einar Már Guðmundsson rithöfundur lesa úr eigin verkum og Þóra Einarsdóttir óperusöngkona syngur við undirleik Önnu Guðnýjar Guðmundsdóttur.  Ögmundur Jónasson formaður BSRB flytur ávarp. Að lokinni dagskrá er boðið upp á léttar veitingar. Hátíðin er ókeypis og öllum opin.

Settir hafa verið á laggirnar nokkrir undirhópar í þríhliða viðræðum aðila vinnmarkaðarins og ríkisins. Í morgun átti hópur um heilbrigðismálin fund með heilbrigðisráðherra og á mánudag munu hópar um menntamál og samgöngumál hitta ráðherra mennta- og samgöngumála. Þá mun viðræðuhópur um málefni sveitarfélaga einnig hittast á mánudag.

Félag opinberra starfsmanna á Suðurlandi og fjögur stéttarfélög ASÍ á Suðurlandi hafa gert samning við Virk um starf ráðgjafa Starfsendurhæfingarsjóðs á Suðurlandi. Átta manns sóttu um starfið þegar það var auglýst. Stefnt er að því að ráða í stöðuna í þessum mánuði og að ráðgjafinn geti hafið störf sem fyrst.

Viðræður um þríhliða stöðugleikasáttmála aðila vinnumarkaðarins og ríkisins hafa haldið áfram og eru málefnahópar um ríkisfjármál, efnahags- og atvinnumál að skila áfangaskýrslum. Stefnt er að því að ríkisstjórnin leggi fram bandorm um ríkisfjármálin í lok vikunnar þar sem kynntar verða aðgerðir til að ná fram 20 milljarða króna sparnaði á fjárlögum þessa árs. Upp úr 20. júní á síðan að liggja fyrir áætlun um aðgerðir í ríkisfjármálum til ársins 2013.

Jafnréttisnefnd BSRB beinir þeim eindregnu tilmælum til ríkisstjórnar og samningsaðila á vinnumarkaði að standa vörð um velferðarþjónustuna. Starfsfólk í velferðarkerfinu - á sjúkrahúsum, í heilsugæslunni, á stofnunum fyrir fatlaða og í skólum, er í yfirgnæfandi meirihluta konur. Samdráttur og skerðing í velferðarþjónustunni bitnar því harkalega á kvennnastéttum.

Á fundi fulltrúa heildarsamtaka launamanna, Samtaka atvinnulífsins, ríkisins og sveitarfélaga í morgun var ákveðið að halda áfram viðræðum um gerð stöðugleikasáttmála og kjarasamninga. Fulltrúar BSRB og annara samtaka launafólks á opinbera vinnumarkaðinum hittust síðan á fundi með fulltrúum samninganefndar ríkisins og Launanefndar sveitarfélaga til að ræða launalið kjarasamninga félaganna.

Viðræður um þríhliða samkomulag samtaka launafólks, atvinnurekenda og ríkisins eru í ákveðinni óvissu eftir að Seðlabankinn tilkynnti um 1% lækkun stýrivaxta. Vinna í efnahagsnefnd samningsaðila hélt þó áfram eftir hádegi í dag og á morgun hafa verið boðaðir fundir í viðræðunefndinni sem fjallar um launalið opinberra starfsmanna. Þótt viðræður ASÍ og SA séu í uppnámi halda viðræður um launalið kjarasamninga opinberra starfsmanna áfram.

"Við þær aðstæður sem nú eru uppi er nauðsynlegt að styrkja innviði samfélagsins og efla grunnþjónustu þess. Öflugt velferðarkerfi gerir okkur kleift að standa af okkur verstu áföllin og með samstöðu mun þjóðinni takast að vinna bug á erfiðleikunum. Forsendur samstöðunnar eru jöfnuður og félagslegt réttlæti," segir m.a. í ályktun stjórnar BSRB sem samþykkt var í dag. 

Viðræður um þríhliða samkomulag samtaka launafólks, atvinnurekenda og ríkisins hófust í gær en stefnt er að því að viðræðum um stöðugleikasáttmála þessara aðila ljúki 9. júní nk.

Ársfundir Lífeyrissjóðs starfsmanna sveitarfélaga (LSS) og Lífeyrissjóðs starfsmanna ríkisins (LSR) verða haldnir um miðjan mánuðinn. Ársfundur LSS verður haldinn miðvikudaginn 13 maí í fundarsal BSRB á 1. hæð og hefst kl. 10:30. Ársfundur LSR verður haldinn þriðjudaginn 19. maí á Hilton Reykjavík Nordica hóteli Suðurlandsbraut 2 og hefst kl. 15.

Aðalfundur Foss haldinn 7. maí krefst þess að samráð verði haft við stéttarfélög áður en gripið er til aðgerða og niðurskurðar á kjörum starfsmanna í opinberri þjónustu. Fundurinn bendir á að framundan séu viðræður heildarsamtaka launamanna á vinnumarkaði, atvinnurekenda og ríkisvaldsins og að krafa félagsins sé félagslegt réttlæti.

Þar sem starfsmenn ríkisins eru með lausa kjarasamninga hefðu þeir að óbreyttu ekki fengið orlofsuppbót í júní eins og annað launafólk.Fjármálaráðuneytið hefur nú ákveðið að greiða starfsmönnum ríkisins orlofsuppbót "til að stuðla að jafnri stöðu stéttarfélaga í aðdraganda þjóðarsáttar um launaþróun," eins og segir í frétt frá ráðuneytinu.

Svo virðist sem efnahagshrunið hafi dregið nokkuð úr trú fólks á virkni markaðarins í samfélaginu. Þetta kemur fram í könnun sem Þjóðmálastofnun Háskóla Íslands hefur gert á viðhorfum fólks til velferðarmála í kjölfar fjármálahrunsins.

„ Á undanförnum árum höfum við orðið vitni að óheftri græðgi ákveðinna aðila í samfélaginu sem að lokum leiddi til hruns efnahagslífsins. Á þeim tíma jókst óréttlætið í þjóðfélaginu, launabilið varð að gjá og launamisrétti kynjanna hefur ekki verið meira í langan tíma. Nú þegar taka þarf til hendinni og hreinsa upp er mikilvægt að þeir sem sátu eftir á „góðæristímanum" svokallaða verði ekki látnir moka flórinn eftir fjárglæframennina," sagði Þórveig Þormóðsdóttir formaður Félags starfsmanna stjórnarráðsins m.a. í ræðu sinni á Austurvelli í dag .

BSRB óskar íslensku launafólki til hamingju með 1. maí, alþjóðlegan baráttudag verkalýðsins. Sýnum samstöðu og fjölmennum á baráttufundi um allt land. Munið 1. maí kaffi í BSRB - húsinu Grettisgötu 89 í Reykjavík eftir útifundinn á Austurvelli.

Baráttufundir verða haldnir um allt land 1. maí. Nauðsyn þess að launafólk safnist saman til að leggja áherslu á kröfur sínar hefur aldrei verið meiri en nú. Einungis með öflugri baráttu launafólks mun þjóðinni takast að vinna sig út úr efnahagskreppunni án þess að rústa því velferðarkerfi sem verkalýðshreyfingin hefur átt stóran þátt í að byggja upp á Íslandi. Byggjum réttlátt þjóðfélag er kjörorð hreyfingarinnar 1. maí. Fjölmennum á baráttufundina.

BSRB - tíðindi eru komin út. Í blaðinu kennir ýmissa grasa að venju. Fjallað er um lögregluna og búsáhalda-byltinguna, atvinnuleysi, lýðræði fjármagnsins, fræðslumál innan BSRB, réttarstöðu launafólks á krepputímum, ástandið í Nörrebro hverfinu í Kaupmannahöfn og viðtal við Ögmund Jónasson heilbrigðisráðherra um formannslok hans hjá BSRB.

Nefnd um þróun Evrópumála sem ríkisstjórn Sjálfstæðisflokks og Samfylkingar skipaði fyrir rúmu ári komst ekki að niðurstöðu og skiluðu nefndarmenn fimm sérálitum, þar á meðal fulltrúi BSRB í nefndinni. Í áliti BSRB segir að bandalagið hafi ekki tekið afstöðu með eða á móti inngöngu í ESB en vilji fá upplýsta og gagnrýna umræðu um sem flesta þætti er snerta hugsanlega inngöngu. Telja samtökin að skýrsla Evrópunefndarinnar hefði mátt vera gagnlegt innlegg í slíka umræðu.

Auk BSRB áttu sæti í nefndinni fulltrúar frá ASÍ, Samtökum atvinnulífsins, Viðskiptaráði Íslands og þingflokkunum.

Aðalfundur Kjalar krefst þess að sveitarfélög og stjórnvöld hafi víðtækt samráð við samtök launafólks um þær aðgerðir sem grípa þarf til vegna ástandsins í efnahagsmálum. Þá segir í ályktun fundarins að einn mikilvægasti þátturinn í að halda hjólum samfélagsins gangandi sé að viðhalda kaupmætti.

Lífeyrissjóður starfsmanna ríkisins boðar til fundar með sjóðfélögum, miðvikudaginn 15. apríl. Fundurinn verður haldinn á Hilton Reykjavík Nordica hóteli, Suðurlandsbraut 2 og hefst hann kl. 16.30. Fundurinn er opinn öllum sjóðfélögum.

Troðfullt var á fundi Ögmundar Jónassonar heilbrigðisráðherra með trúnaðarmönnum verkalýðsfélaga innan heilbrigðisþjónustunnar þar sem staða mála og framtíðarhorfur voru til umræðu. Í máli hans kom fram að aldrei hefur verið mikilvægara að standa vörð um heilbrigðisþjónustuna en nú og til þess þurfi samstöðu allra sem innan hennar vinna. Ögmundur sagði að sam- væri mikilvægasta forskeyti dagsins í dag og komandi framtíðar. Samstaða, samvinna og samráð ættu að vera leiðarljósið við þau verkefni sem framundan væru í heilbrigðisþjónustunni.

Í kjölfar bankahrunsins sl. haust hefur atvinnuleysi aukist verulega og er útlit fyrir að það muni aukast enn frekar á næstu mánuðum. Þetta kemur fram í 2. tbl. Dreifibréfs BSRB sem sent var út í dag.

Trúnaðarráð Póstmannafélags Íslands átelur stjórnvöld fyrir að hafa ekki aflétt arðsemiskröfu sinni á Íslandspóst hf. á sama tíma og stjórnendur fyrirtækisins telja sig ekki geta staðið við umsamdar launahækkanir til starfsmanna Íslandspósts.

Aðalfundur SFR stéttarfélags í almannaþjónustu haldinn var laugardaginn 28.mars samþykkti framtíðarsýn félagsins og ályktanir í kjara- og efnahagsmálum, um fjármálakreppuna og almannaþjónustuna. Í upphafi ályktunarinnar um kjara- og efnahagsmál segir: "Aðalfundur SFR stéttarfélags í almannaþjónustu haldinn 28.mars 2009 krefst þess að stjórnvöld hafi víðtækt samráð um þær aðgerðir sem grípa þarf til vegna ástandsins í efnahagsmálum. Viðræður við samtök launafólks er grundvöllur þess að vel gangi í endurskipulagningu samfélagsins á félagslegum grunni."

Póstmannafélag Íslands er 90 ára í dag.  Félagið var stofnað í Reykjavík hinn 26. mars 1919. BSRB óskar félagsmönnum til hamingju með daginn.

Ögmundur Jónasson heilbrigðisráðherra boðar til fundar með trúnaðarmönnum verkalýðsfélaga innan heilbrigðisþjónustunnar þar sem staða mála og framtíðarhorfur verða til umræðu. Aldrei hefur verið mikilvægara að standa vörð um heilbrigðisþjónustuna og til þess þarf samstöðu allra sem innan hennar vinna. Velferðarmál eru líka atvinnumál!  Heilbrigðisráðherra boðar til fundarins í samstarfi við BSRB og Starfsgreinasamband Íslands.

Nefnd á vegum félags- og tryggingamálaráðuneytis er vinnur að vinnumarkaðsúrræðum stendur fyrir námsstefnu föstudaginn 3. apríl nk. á Hótel Sögu kl. 9 - 12. Á námstefnunni verður fjallað um tækifæri og úrræði fyrir einstaklinga sem hafa misst atvinnuna. Fjallað verður um breytingar á vinnumarkaðslöggjöfinni og hvaða möguleikar felast í þeim.

BSRB stóð fyrir opnum fundi um Evrópusambandið í dag. Þetta er annar fundurinn í röð funda sem BSRB hyggst standa fyrir um Ísland og ESB. Á fundinum var fjallað um afstöðu  ESB til sjávarútvegs og iðnaðar. Framsögumenn voru Aðalsteinn Leifsson lektor við Háskólann í Reykjavík og Bjarni Már Gylfason hagfræðingur Samtaka iðnaðarins.

Óviðunandi er að launafólk beri byrðar af efnahagshruni, sem það ber enga ábyrgð á og er framkallað af blygðunarlausri græðgi fjármálafyrirtækja og fjárglæframanna, segir m.a. í ályktun aðalfundar Starfsmannafélags Reykjavíkurborgar sem haldinn var í gær.  Þar segir einnig að stjórnvöld eigi að hraða sem mest aðgerðum til varnar kjörum almennings og beita öllum tiltækum ráðum til þess.

Opinn fundur verður um Evrópusambandið á vegum BSRB föstudaginn 20. mars kl. 14 - 16 í BSRB - húsinu Grettisgötu 89. Á fundinum verður fjallað um stefnu ESB í sjávarútvegi og iðnaði. Framsögu hafa Aðalsteinn Leifsson lektor við Háskólann í Reykjavík og Bjarni Már Gylfason hagfræðingur Samtaka iðnaðarins.

Ársæll Ársælsson hefur verið kjörinn nýr formaður Tollvarðafélags Íslands en Guðbjörn Guðbjörnsson hefur látið af formennsku í félaginu.

Árlegur fulltrúaráðsfundur NOFS (Nordens Offentliganställdas Fackliga Samorganisation) var haldinn í BSRB húsinu í dag. Á fundinum flutti Kristian Weise hagfræðingur LO í Danmörku erindi um afleiðingar heimskreppunnar og Ögmundur Jónasson heilbrigðisráðherra um áhrif hennar hér á landi. Fundinn sátu á fjórða tug manna frá öllum Norðurlöndunum. NOFS eru samtök stéttarfélaga opinberra starfsmanna á Norðurlöndum.

Með jafnrétti að leiðarljósi - uppbygging í allra þágu, er yfirskrift fundar á Grand Hótel í Reykjavík mánudaginn 9. mars kl. 11.45 - 13.00. Fundurinn er haldinn í tilefni alþjóðlegs baráttudags kvenna 8. mars. Að fundinum standa ASÍ, BHM, BSRB, KÍ, SSF, Jafnréttisráð og Jafnréttisstofa.

Hvenær hefst uppsagnarfrestur? Hvað er hann langur? Hver er réttur starfsmanna varðandi launalækkun? Má segja upp fastri yfirvinnu? Þetta eru örfáar spurningar sem starfsmenn BSRB hafa þurft að svara ítrekað að undanförnu vegna aðhaldsaðgerða og niðurskurðar stofnana og fyrirtækja. Sonja Ýr Þorbergsdóttir lögfræðingur BSRB hefur tekið saman ýmsar upplýsingar um réttarstöðu starfsmanna á vinnumarkaði þar sem ofangreindum spurningum og fleirum er svarað.

Ottó Eiríksson hefur verið kjörinn nýr formaður Félags íslenskra flugumferðarstjóra en Loftur Jóhannsson hefur látið af störfum formanns.

BSRB stóð fyrir opnum fundi um Evrópusambandið í dag. Þetta var fyrsti fundurinn í röð funda sem BSRB hyggst standa fyrir um Ísland og ESB. Á fundinum var fjallað um stöðu smáríkja innan ESB og hvaða áhrif aðild að sambandinu gæti haft á íslenskan landbúnað. Framsögumenn voru Baldur Þórhallsson, Jean Monnet prófessor í stjórnmálafræði við Háskóla Íslands og Sigurður Jóhannesson sérfræðingur við Hagfræðistofnun Háskóla Íslands.

BSRB stendur fyrir opnum fundi um Evrópusambandið föstudaginn 20. febrúar kl. 14 - 16 í BSRB - húsinu Grettisgötu 89. Á fundinum verður fjallað um stöðu smáríkja innan ESB og afstöðu sambandsins til landbúnaðarmála. Framsögumenn eru Baldur Þórhallsson, Jean Monnet prófessor í stjórnmálafræði við Háskóla Íslands og Sigurður Jóhannesson sérfræðingur við Hagfræðistofnun Háskóla Íslands. Fundarstjóri er Helga Jónsdóttir framkvæmdastjóri BSRB. Að loknum framsöguerindum verður opnað fyrir spurningar úr sal. Fundurinn er öllum opinn.

Í nýju tölublaði Dreifibréfs BSRB er fjallað um þá breytingu sem Alþingi samþykkti á eftirlaunalögum forseta Íslands, ráðherra, alþingismanna og hæstaréttardómara í desember sl. Réttindi þessara hópa eru borin saman við réttindi í A - deild LSR. Þetta er afar fróðleg lesning í ljósi þess að nú hefur fjármálaráðherra lagt fram nýtt frumvarp um eftirlaun þessara hópa.

Ögmundur Jónasson formaður BSRB skýrði frá því á stjórnarfundi bandalagsins að hann óskaði eftir heimild stjórnar til að draga sig í hlé frá störfum fyrir BSRB fram yfir næstu alþingiskosningar þar sem hann er í þann veginn að taka sæti í ríkisstjórn sem ráðherra.

Starfsmannafélag Kópavogs hélt upp á 50 ára afmæli félagsins sl. föstudag í Veisluturninum við Smáratorg en félagið var stofnað 28. desember 1958.  Stofnendur voru 18 talsins en nú eru félagsmenn hátt í átta hundrað. Öllum félagsmönnum SfK var boðið til fagnaðarins, auk bæjarstjórnar Kópavogs, stjórn og starfsmönnum BSRB og öðrum velunnurum.

Landssamband lögreglumanna sendi frá sér yfirlýsingu í gær þar sem framganga tiltekinna einstaklinga í mótmælunum að undanförnu er fordæmd og bent er á að hópur lögreglumanna sé slasaður eftir atburði undanfarinna daga. Í tilkynningunni er hvatt til þess að fólk gæti hófs við mótmælin. Þá er minnt á að það ástand sem uppi er í þjóðfélaginu bitni ekkert síður á lögreglumönnum og fjölskyldum þeirra en öðrum landsmönnum.

Stjórn Starfsmannafélags Reykjavíkuborgar gagnrýnir harðlega áform Reykjavíkurborgar um að segja upp yfirvinnu sem bundin er í fastlauna- og ráðningarsamningum, á sama tíma og ljóst er að álag eykst á starfsmenn vegna aðstæðna í samfélaginu, kaupmáttur rýrnar dag frá degi og ekki er séð fyrir endann á þeirri þróun.

Trúnaðarmannaráð SFR sendi frá sér harðorða ályktun í gær þar sem niðurskurði hjá opinberum stofnunum og fyrirtækjum er harðlega mótmælt. Í ályktuninni segir að fyrirhugaðar uppsagnir 20-30 starfsmanna hjá Landhelgisgæslu Íslands sýni glöggt skammsýni og skilningsleysi á þeirri samfélagslegu ábyrgð sem stjórnvöld eiga að axla í erfiðu árferði.

Þjóðarsamstaða gegn fjöldamorðunum á Gaza er yfirskrift mótmælafundar sem haldinn verður í Háskólabíói á sunnudag kl. 15. Að fundinum standa fjölmörg félagasamtök og eru BSRB og ASÍ og fleiri samtök launafólks á meðal þeirra.

Starfslokanámskeið BSRB sem haldið verður 26. - 28. janúar verður sent um fjarfundarbúnað til eftirtalinna staða: Ísafjarðar, Sauðárkróks, Akureyrar, Egilsstaða, Hafnar á Hornafirði og Vestmannaeyja. Námskeiðið hefst alla dagana kl. 16.30 og stendur til kl. 19.00. Þeir sem hafa áhuga á að sækja námskeiðið á ofangreindum stöðum þurfa að skrá sig á skrifstofu BSRB í síma 525 8300 eða á netfangið bsrb@bsrb.is.

Trúnaðarmannafræðsla BSRB og Félagsmálaskóla alþýðu hefst í fegrúar.  Fyrsta þrep verður kenndur dagana 4. - 6. febrúar. Annað þrep verður síðan haldinn 16. - 18. febrúar og þriðja þrep 16. - 18. mars. Námskeiðin eru í BSRB húsinu, Grettisgötu 89, og eru frá kl. 9 til 16 alla dagana.

Félags- og tryggingamálaráðuneytið og Jafnréttisráð boða til jafnréttisþings 16. janúar næstkomandi að Hótel Nordica klukkan 9 til 17. Þetta er gert í samræmi við nýsamþykkt lög um jafna stöðu og jafnan rétt kvenna og karla. Þingið er öllum opið en þáttakendur verða að skrá sig fyrirfram og lýkur skráningu 13. janúar.

Berglind Ásgeirsdóttir ráðuneytisstjóri heilbrigðis-ráðuneytisins og Guðríður Þorsteinsdóttir lögfræðingur ráðuneytisins áttu fund með BSRB í morgun þar sem farið var yfir skipulagsbreytingar sem boðaðar hafa verið í heilbrigðiskerfinu og áform ráðuneytisins um niðurskurð til að mæta fjárlögunum en þar er gert ráð fyrir 6,7 milljarða króna niðurskurði frá upphaflega fjárlagafrumvarpinu.

BSRB hefur óskað eftir upplýsingum um fyrirhugaðar breytingar innan heilbrigðisþjónustunnar bæði hvað varðar almennar kerfisbreytingar og fyrirhugaðan niðurskurð.

Undanfarna vetur hefur BSRB staðið fyrir starfslokanámskeiðum á höfuðborgarsvæðinu og reynst mikill áhugi fyrir þessum námskeiðum. Mikill fjöldi fólks hefur sótt námskeiðin og er látið mjög vel af þeim. Fræðslunefnd BSRB telur fulla ástæðu til að endurtaka þessi námskeið í vetur og nú hefur verið ákveðið að vera með starfslokanámskeið í BSRB húsinu dagana 26. - 28. janúar.