BSRB stóð fyrir opnum fundi um Evrópusambandið í dag. Þetta var fyrsti fundurinn í röð funda sem BSRB hyggst standa fyrir um Ísland og ESB. Á fundinum var fjallað um stöðu smáríkja innan ESB og hvaða áhrif aðild að sambandinu gæti haft á íslenskan landbúnað. Framsögumenn voru Baldur Þórhallsson, Jean Monnet prófessor í stjórnmálafræði við Háskóla Íslands og Sigurður Jóhannesson sérfræðingur við Hagfræðistofnun Háskóla Íslands.

Baldur Þórhallsson                                                      Sigurður Jóhannesson

Baldur færði rök fyrir því að það væri misskilningur að horfa eingöngu til atkvæðafjölda ríkja á Evrópusambandsþinginu til að meta áhrif þeirra innan ESB. Taldi hann áhrif smáríkja á mótun stefnu og regluverks ESB mun meiri en atkvæðavægi þeirra segði til um.

Sigurður bar saman styrkjakerfi íslensks landbúnaðar og þess sem greinin gæti vænst ef landið gengi í ESB. Þar tók hann samninga Finna sem dæmi og taldi Íslendinga geta náð svipuðum samningum.

Fundarstjóri var Helga Jónsdóttir framkvæmdastjóri BSRB. Að loknum framsöguerindum var opnað fyrir spurningar úr sal.

Sjá glærur Sigurðar frá fundinum.