Félag ráðgjafa og stuðningsfulltrúa (FRS) mótmælir harðlega hugmyndum félagsmálaráðherra um launafrystingu opinberra starfsmanna. Ráðgjafar og stuðningsfulltrúar eru fjölmenn stétt þar sem konur eru í miklum meirihluta og launin óásættanlega lág fyrir, þótt þau séu ekki fryst. Umönnun er ekki afgangsstærð í þjóðfélaginu og þegar hefur verið farið yfir sársaukamörk í niðurskurði. Fyrirhugaðar fjárfrekar framkvæmdir á vegum hins opinbera, meðal annars heilbrigðiskerfisins, skjóta skökku við þegar ekki virðist vera hægt að reka það sem fyrir er í óbreyttri mynd. Félag ráðgjafa og stuðningsfulltrúa mun ekki taka því þegjandi ef til stendur að ganga frekar á kjör heilbrigðisstarfsfólks en orðið er, og minnir á að ekki er langt í að næstu kjarasamningar verði gerðir og heitir á forystu verkalýðshreyfingarinnar að standa með sínu fólki.

FRS er félag ráðgjafa, stuðningsfulltrúa og annars starfsfólks í umönnun. Félagið er deild innan SFR. Sjá nánar á heimasíðu félagsins, http://sfr.is/fagfelog/frs/