Skýrsla starfshóps um siða- og starfsreglur kjörinna fulltrúa og starfsmanna Reykjavíkurborgar var lögð fram í borgarráði 30. desember sl. Borgarráð samþykkti tillögur starfshópsins sem vann skýrsluna og jafnframt var heimilað að setja á stofn stýrihóp um skráningu siðareglna og að samið verði við Siðfræðistofnun Háskóla Íslands um ráðgjöf og verkstjórn við skráningu reglnanna. Erna Guðmundsdóttir lögfræðingur BSRB var í starfshópnum sem vann skýrsluna.

Helstu niðurstöðurnar starfshópsins eru eftirfarandi:
(Þá eru tillögur nefndarinnar eftir 4. tl.)

1. Greinarmun ber að gera á siðareglum sem gilda almennt og starfsreglum sem ná til einstakra verkefna Reykjavíkurborgar eða málsmeðferðar í stjórnsýslunni.

2. Ríkar ástæður eru til að hafa skýrar og aðgengilegar reglur um verklag og málsmeðferð á viðkvæmum sviðum við meðferð almannavalds og almannafjár, s.s. innkaupa- og útboðsreglur, reglur um styrki og fjárhagsaðstoð, reglur um lóðaúthlutanir og skipulagsmál, leyfisveitingar og samstarf við einkaaðila (“public private partnership”).

3. Skynsamlegt er að jafnt kjörnir fulltrúar og starfsmenn komi að undirbúningi og skráningu reglnanna þótt borgarstjórn taki endanlega ákvörðun um efni þeirra og gerð. Sérstaklega verði hugað að samráði við stéttarfélög starfsmanna.

4. Að lúta siðareglum verður hluti af starfsskyldum starfsmanna (ráðningarsambandi) en eðlilegt er að gera ráð fyrir að kjörnir fulltrúar þurfi að undirgangast þær með undirskrift sinni.

Þá voru lagðar fram ýmsar tillögur af nefndinni:

1. Lagt er til að farið verði yfir núverandi starfsreglur Reykjavíkurborgar og gerðar tillögur um betrumbætur og viðauka þar sem við á í ljósi ábendinga Handbókar Evrópuráðsins um siðareglur á sveitarstjórnarstigi.

2. Lagt er til að kannað verði hvort ástæða er til að styrkja réttarstöðu starfsmanna sem snúa sér til innri endurskoðunar eða annarra með ábendingar um misfellur í stjórnsýslu og starfsemi Reykjavíkurborgar (“whistle blowers”) og hvort ástæða er til að skilgreina sérstaklega boðleiðir og reglur fyrir slík tilvik.

3. Lagt er til að samið verði sameiginlegt leiðarljós þar sem fram komi meginhugsjónir að baki þeirri almannaþjónustu sem borgin veitir og grundvallarviðmiðum um meðferð þess almannavalds sem með er farið, auk ástæðna þess að Reykjavíkurborg skrái siðareglur.

4. Lagt er til að á grundvelli þessa leiðarljóss verði skráðar sérstakar siðareglur fyrir kjörna fulltrúa og sérstakar fyrir starfsmenn.

5. Lagt er til að sérstakur regluvörður taki við frumtilkynningum um mál sem varðað gætu siðareglur. Hann yfirfari tilkynningarnar og meti hvort mál séu alvarlegs eðlis og leiti sátta milli aðila telji hann þess nokkurn kost. Hlutverk regluvarðar getur fallið að starfssviði lögfræðilegs ráðgjafa á skrifstofu borgarstjórnar.

6 Lagt er til að skipa megi siðanefnd komi upp mál sem eru þannig vaxin að regluvörður geti ekki sætt aðila eða sættir koma ekki til álita. Siðanefnd geti verið þriggja eða fimm manna eftir eðli máls. Formaður siðanefndar verði skipaður til fimm ára í senn en aðrir nefndarmenn verði skipaðir af borgarráði í hvert sinn að tillögu borgarstjóra. Hlutverk formanns siðanefndar getur fallið að starfssviði forstöðumanns innri endurskoðunardeildar.

Sjá skýrsluna í heild sinni