Samþykktir Lífeyrissjóðs starfsmanna sveitarfélaga

SAMÞYKKTIR LÍFEYRISSJÓÐS STARFSMANNA SVEITARFÉLAGA

I. Kafli: Sameiginleg ákvæði
Nafn og tilgangur

1. Sjóðurinn heitir Lífeyrissjóður starfsmanna sveitarfélaga. Heimili hans og varnarþing er í Reykjavík. Hlutverk sjóðsins er að tryggja sjóðfélögum, eftirlifandi mökum þeirra og börnum lífeyri samkvæmt ákvæðum þessara samþykkta.

2. Sjóðurinn starfar í þremur fjárhagslega aðskildum deildum, almennri deild eða A – deild, valdeild eða V – deild og séreignadeild eða S-deild.

Sjóðfélagar
3. Sjóðfélagar í A-deild geta þeir starfsmenn sveitarfélaga, stofnana þeirra eða fyrirtækja svo og samlaga sveitarfélaga 16-70 ára orðið sem tilgreindir eru í 1. mgr. og ráðnir eru samkvæmt kjarasamningi milli aðildarfélags BSRB eða Bandalags háskólamanna annars vegar og sveitarfélaga, stofnana þeirra, fyrirtækja eða samlaga sveitarfélaga hins vegar. Framkvæmdastjórar sveitarfélaga og stjórnendur stofnana og fyrirtækja á vegum sveitarfélaga eiga rétt til aðildar að A-deild. Sjóðsstjórn er heimilt að veita aðild að A-deild starfsmanni sem ekki á rétt til aðildar samkvæmt framangreindu.

Þær starfsstéttir sem áttu skylduaðild að lífeyrissjóðum sveitarfélaga þann 30. júní 1998 og ekki falla undir skilgreiningu 1. mgr. 3. gr. geta með sama hætti átt skylduaðild að LSS.

Sjóðfélagar að V – deild geta þeir starfsmenn sveitarfélaga orðið sem tilgreindir eru í 1. mgr. og aðrir þeir sem þess óska, enda eigi viðkomandi ekki skylduaðild að öðrum lífeyrissjóði.

Sjóðfélagar að S – deild geta þeir starfsmenn sveitarfélaga orðið sem tilgreindir eru í 1. mgr. og aðrir þeir sem þess óska.

Starfsmenn sem aðild eiga að A - deild sjóðsins skv. 2. mgr., geta átt val um aðild að V- deild skv. 30. grein og S-deild skv. 45. grein.

Þeir sem eiga inneign eða réttindi í sjóðnum teljast sjóðfélagar.

Stjórn sjóðsins
4. Stjórn sjóðsins skal skipuð sex mönnum. Samband íslenskra sveitarfélaga skipar þrjá stjórnarmenn í samráði við þau sveitarfélög sem eiga aðild að sjóðnum, BSRB skipar tvo og Bandalag háskólamanna skipar einn. Jafnframt skulu sömu aðilar skipa jafnmarga menn til vara. Skipunartími stjórnarmanna er fjögur ár. Stjórnin kýs formann úr sínum hópi til eins árs í senn.

5. Stjórnarmenn skulu vera 20 ára, lögráða, fjár síns ráðandi, hafa óflekkað mannorð og mega ekki á síðustu fimm árum hafa í tengslum við atvinnurekstur fengið dóm fyrir refsiverðan verknað samkvæmt almennum hegningarlögum, lögum um hlutafélög, einkahlutafélög, bókhald, ársreikninga, gjaldþrot eða opinber gjöld. Stjórnarmenn skulu vera búsettir hér á landi eða í öðrum aðildarríkjum Evrópska Efnahagssvæðisins.

6. Stjórnin skiptir sjálf með sér verkum. Þó skulu fulltrúar atvinnurekenda og stéttarfélaga hafa á hendi formennsku til skiptis, eitt ár í senn. Stjórnin skal setja sér starfsreglur; hún skal halda gerðabók og rita í hana allar ákvarðanir sínar. Til þess að ákvörðun sé löglega samþykkt, þarf meirihluti stjórnarmanna að greiða henni atkvæði. Stjórnarfundur er ályktunarhæfur ef meirihluti stjórnarmanna er mættur eða varamenn í þeirra stað. Viðhafa skal leynilega atkvæðagreiðslu ef einn eða fleiri stjórnarmenn krefjast þess.

7. Stjórn sjóðsins fer með yfirstjórn hans. Stjórnin skal fjalla um allar meiriháttar ákvarðanir varðandi stefnumótun sjóðsins og starfsemi. Hún skal annast um að nægjanlegt eftirlit sé haft með bókhaldi og meðferð fjármuna sjóðsins. Stjórn sjóðsins ræður framkvæmdastjóra, ákveður laun hans og önnur starfskjör og setur honum starfsreglur. Framkvæmdastjórinn er ekki kjörgengur sem stjórnarmaður í sjóðnum. Stjórn sjóðsins ræður forstöðumann endurskoðunardeildar eða semur við sjálfstætt starfandi eftirlitsaðila um innra eftirlit. Stofnfundur velur endurskoðanda sjóðsins en til framtíðar er það hlutverk stjórnar sjóðsins á hverjum tíma

8. Framkvæmdastjóri annast daglegan rekstur sjóðsins og fer í því efni eftir þeirri stefnu og fyrirmælum sem stjórn sjóðsins hefur gefið. Framkvæmdastjóri ræður aðra starfsmenn til sjóðsins. Ákvarðanir sem eru óvenjulegar eða mikils háttar, til dæmis ákvarðanir um fjárfestingu í atvinnurekstri eða fasteignum, skal framkvæmdastjóri aðeins taka með sérstakri ákvörðun stjórnar, eða samkvæmt áætlun sem samþykkt hefur verið af stjórninni. Sé ekki unnt að bera meiriháttar ákvarðanir undir stjórnarfund, skal haft samráð við formann stjórnar og aðra stjórnarmenn eftir föngum. Slíkar ákvarðanir skal síðan taka fyrir á næsta stjórnarfundi.

9. Stjórnin veitir og afturkallar prókúruumboð til handa framkvæmdastjóra og öðrum starfsmönnum.

10. Allar meiri háttar breytingar á skipulagi sjóðsins, innra eftirliti, bókhaldi og reikningsskilum skal framkvæmdastjóri aðeins gera að höfðu samráði við stjórn og að fengnu samþykki hennar.

11. Framkvæmdastjóri ber ábyrgð á að bókhald sjóðsins sé fært í samræmi við lög og viðurkenndar venjur og ber að fylgja þeirri fjárfestingastefnu og útlánareglum sem stjórn sjóðsins hefur sett. Á reglubundnum stjórnarfundum skal framkvæmdastjóri leggja fram yfirlit um fjárfestingar, rekstur og efnahag sjóðsins.

12. Framkvæmdastjóri skal veita stjórn, endurskoðanda og skoðunarmönnum allar þær upplýsingar um hag og starfsemi sjóðsins sem þeir óska.

13. Stjórnarmaður lífeyrissjóðs eða framkvæmdastjóri má ekki taka þátt í meðferð máls, ef hann hefur hagsmuna að gæta sem kynnu að fara í bága við hagsmuni sjóðsins. Sama gildir ef um er að ræða ákvarðanir sem tengjast fyrirtæki, þar sem stjórnarmaður kann að eiga umtalsverðra hagsmuna að gæta sem eigandi, stjórnarmaður eða starfsmaður. Sama gildir um maka stjórnarmanns eða framkvæmdastjóra Um hæfi til meðferðar einstakra mála fer eftir II. kafla stjórnsýslulaga. Skylt er þeim, sem í hlut á, að upplýsa um aðstæður sem valda kunna vanhæfni skv. framansögðu.

14. Stjórn sjóðsins, framkvæmdastjóri og aðrir þeir, er hafa heimild til að koma fram fyrir hönd sjóðsins, mega ekki gera neinar þær ráðstafanir, sem bersýnilega eru til þess fallnar, að afla ákveðnum sjóðfélögum, fyrirtækjum eða öðrum, ótilhlýðilegra hagsmuna umfram aðra, eða á kostnað sjóðsins. Þeir skulu einnig gæta þagmælsku um það, sem þeir verða áskynja í starfi sínu fyrir lífeyrissjóðinn og varða kann hagsmuni einstaklinga eða fyrirtækja og annað það er leynt á að fara eðli máls samkvæmt.

15. Stjórnarformaður og framkvæmdastjóri sjóðsins skulu ekki sitja í stjórnum atvinnufyrirtækja í umboði hans. Þetta gildir þó ekki um fyrirtæki sem stofnuð eru til að sinna sérstökum þáttum í starfsemi sjóðsins. Ef stjórnarmaður lífeyrissjóðsins er jafnframt stjórnarmaður í fyrirtæki sem sjóðurinn á verulegan hlut í, getur sá hinn sami ekki gegnt stjórnarformennsku í lífeyrissjóðnum.

Ársfundur
16. Fyrir lok júní ár hvert skal stjórn boða til ársfundar sjóðsins. Ársfund skal boða með tryggilegum hætti með a.m.k. 14 daga fyrirvara.

17. Dagskrá ársfundar skal vera sem hér segir:

a. Skýrsla stjórnar lögð fram.
b. Ársreikningar kynntir.
c. Skýrsla um tryggingafræðilega úttekt kynnt.
d. Fjárfestingarstefna kynnt.
e. Tillaga stjórnar til breytinga á samþykktum sjóðsins kynnt.
f. Önnur mál.

18. Allir sjóðfélagar svo og fulltrúar sveitarfélaga og stéttarfélaga eiga rétt til fundarsetu á ársfundi með málfrelsi og tillögurétti. Hver fundarmaður fer með eitt atkvæði. Stjórn sjóðsins er skylt að taka til umfjöllunar þær tillögur sem hljóta meirihluta atkvæða. Um breytingar á samþykktum sjóðsins fer skv. 54. grein.

Iðgjald
19. Iðgjald til sjóðsins skal reiknað af heildarfjárhæð greiddra launa og endurgjalds vegna þess starfs sem kjara- eða ráðningarsamningur sem veitir aðild að sjóðnum tekur til og skal stofn til iðgjalds vera allar tegundir launa eða þóknana fyrir störf sem skattskyld eru skv. 1. mgr. 1. tölul. A-liðar 7. gr. laga nr. 75/1981, um tekjuskatt og eignarskatt. Til gjaldstofns skal þó ekki telja hlunnindi sem greidd eru í fríðu, svo sem fatnað, fæði og húsnæði, eða greiðslur sem ætlaðar eru til endurgreiðslu á útlögðum kostnaði, t.d. ökutækjastyrki, dagpeninga og fæðispeninga. Enn fremur skal ekki telja til gjaldstofns eftirlaun og lífeyri sem Tryggingastofnun ríkisins eða lífeyrissjóður greiðir, bætur greiddar af Tryggingastofnun ríkisins, slysa- og sjúkradagpeninga úr sjúkrasjóðum stéttarfélaga og bætur tryggingafélaga vegna atvinnutjóns af völdum slysa. Þá skal telja til iðgjaldsstofns atvinnuleysisbætur samkvæmt lögum um atvinnuleysistryggingar. Iðgjaldsstofn manns vegna vinnu hans við eigin atvinnurekstur eða sjálfstæða starfsemi skal vera jafnhár fjárhæð skv. 2. mgr. 1. tölul. A-liðar 7. gr. laga nr. 75/1981, um tekjuskatt og eignarskatt, sbr. 59. gr. þeirra laga.

Fjárfestingarstefna
20. Stjórn sjóðsins sér um ávöxtun á fé sjóðsins og skal ávaxta það samkvæmt þeirri fjárfestingarstefnu er hún hefur markað í samræmi við lög nr. 129/1997 um skyldutryggingu lífeyrisréttinda og starfsemi lífeyrissjóða. Stjórn lífeyrissjóðs skal móta fjárfestingarstefnu og ávaxta fé sjóðsins með hliðsjón af þeim kjörum sem best eru boðin á hverjum tíma með tilliti til ávöxtunar og áhættu. Stjórn lífeyrissjóðs er heimilt að móta sérstaka fjárfestingarstefnu fyrir hverja deild sjóðsins. Stjórninni er heimilt að ávaxta fé sjóðsins með eftirfarandi hætti:

Í ríkisvíxlum, ríkisskuldabréfum og skuldabréfum sem tryggð eru með ábyrgð ríkissjóðs.
Í skuldabréfum bæjar- og sveitarfélaga.
Í skuldabréfum tryggðum með veði í fasteign að hámarki 65% af metnu markaðsvirði nema þegar um er að ræða sérhæft atvinnuhúsnæði þá skal hámark þetta vera 35%.
Með innlánum í bönkum og sparisjóðum.
Í skuldabréfum og víxlum banka, sparisjóða og annarra lánastofnana sem lúta eftirliti bankaeftirlits.
Í hlutabréfum fyrirtækja.
Í hlutdeildarskírteinum verðbréfasjóða, en verðbréfasafni að baki skírteinunum skal skipt á aðra töluliði þessarar málsgreinar með tilliti til takmarkana í 2.–6. mgr. 36 gr. l nr. 129/1997
Í öðrum verðbréfum.
Í innlendum hlutabréfum sem ekki eru skráð á skipulegum markaði, enda séu engar hömlur lagðar á viðskipti með hlutabréfin og ársreikningar hlutaðeigandi hlutafélaga öllum aðgengilegir.
Með gerð afleiðusamninga sem draga úr áhættu sjóðsins.

Verðbréf skv. 1., 2. og 5.–8. tölul. 2. mgr. skulu hafa skráð kaup- og sölugengi á skipulegum markaði. Með skipulegum markaði er átt við skipulegan verðbréfamarkað innan aðildarríkja Efnahags- og framfarastofnunarinnar (OECD) sem starfar reglulega, er opinn almenningi og viðurkenndur með þeim hætti sem bankaeftirlit Seðlabanka Íslands metur gildan. Sé markaðurinn utan ríkja OECD skal bankaeftirlitið hafa viðurkennt hann.

Þrátt fyrir ákvæði 3. mgr. er heimilt að fjárfesta fyrir samtals allt að 10% af hreinni eign sjóðsins í verðbréfum sem falla undir 1., 2., 5. og 8. tölul. 2. mgr. og ekki eru skráð á skipulegum markaði, enda séu verðbréfin gefin út af innlendum aðilum.

Eign lífeyrissjóðsins skv. 2., 5. og 8. tölul. 2. mgr. hverjum um sig og 6. og 9. tölul. 2. mgr. samanlagt skal ekki vera meiri en 35% af hreinni eign sjóðsins. Þó skal eign skv. 9. tölul. ekki vera meiri en 10% af hreinni eign sjóðsins.

Samanlögð eign sjóðsins í verðbréfum skv. 2.–9. tölul. 2. mgr. útgefnum af sama aðila eða aðilum sem tilheyra sömu samstæðunni skal ekki vera meiri en 10% af hreinni eign sjóðsins. Þessi takmörkun skal vera 5% fyrir verðbréf skv. 8. tölul. Eigi er lífeyrissjóðnum heimilt að eiga meira en 15% af hlutafé í hverju fyrirtæki né meira en 25% af hlutdeildarskírteinum útgefnum af sama verðbréfasjóði. Þó er lífeyrissjóðnum heimilt að eiga stærri hluta en 15% í fyrirtæki sem eingöngu sinnir þjónustuverkefnum fyrir lífeyrissjóðinn.

Lífeyrissjóðurinn skal takmarka áhættu í erlendum gjaldmiðlum í heild við 40% af hreinni eign sjóðsins.

Með hreinni eign í 4.–7. mgr. er átt við hreina eign lífeyrissjóðs til greiðslu lífeyris samkvæmt síðasta endurskoðaða ársuppgjöri. Takmarkanir í 4.-7. mgr. skulu halda á hverjum tíma.

Lífeyrissjóðnum er ekki skylt að selja eignir í því skyni að fullnægja þeim takmörkunum sem kveðið er á um í þessari grein en skal þegar hann kaupir verðbréf gæta þess að þessi takmörk séu virt.

Lífeyrissjóðurinn má ekki fjárfesta í fasteignum eða lausafé nema að því marki sem nauðsynlegt er vegna starfsemi sjóðsins.

Þrátt fyrir ákvæði 10. mgr. er lífeyrissjóðnum heimilt án takmarkana að yfirtaka eignir til að tryggja fullnustu kröfu. Eignirnar skulu seldar eigi síðar en innan 18 mánaða frá yfirtöku eignanna. Heimilt er þó að draga sölu lengur sé það augljóslega í þágu hagsmuna sjóðsins. Slíkan drátt á sölu eigna skal tilkynna bankaeftirliti sem getur þá krafist sölu þeirra innan viðeigandi frests

II. Kafli: Almenn deild
Ellilífeyrir í A – deild
21. Lífeyrissjóðurinn greiðir sjóðfélögum ellilífeyri og örorkulífeyri og eftirlifandi maka þeirra og börnum og eftir atvikum sambúðaraðila lífeyri samkvæmt ákvæðum þeim sem hér fara á eftir.

Lágmarkstryggingavernd í A-deild er skilgreind í greinum 22. og 27.

22. A– deild veitir lífeyrisréttindi sem eru 1,9% af þeim launum sem iðgjald er greitt af og eru það skilgreind lágmarksréttindi sem deildin veitir. Lífeyrisrétturinn er verðtryggður miðað við vísitölu neysluverðs til verðtryggingar í þeim mánuði sem iðgjaldið berst til sjóðsins.

23. Hver sjóðfélagi A– deildar, sem er orðinn 65 ára, á rétt á ellilífeyri. Árlegur ellilífeyrir frá 65 ára aldri er uppsafnaður lífeyrisréttur reiknaður samkvæmt grein 22. og 24. Ellilífeyririnn greiðist í fyrsta sinn fyrir þann mánuð sem sjóðfélaginn verður 65 ára.

24. Sjóðfélaga er heimilt að fresta allt til 70 ára aldurs að taka ellilífeyri úr A – deild og hækkar lífeyririnn, sem miðaðist við 65 ára aldur, um 0,8% fyrir hvern mánuð eða brot úr mánuði sem töku lífeyris er frestað fram yfir 65 ára aldurinn en þó ekki lengur en til 70 ára aldurs.

Á sama hátt er sjóðfélaga heimilt að hefja töku ellilífeyris áður en hann nær 65 ára aldri, þó ekki fyrr en frá 60 ára aldri og skal þá áunninn lífeyrir hans lækkaður um 0,5% fyrir hvern mánuð eða brot úr mánuði sem töku lífeyris er flýtt.

Haldi sjóðfélagi áfram að ávinna sér réttindi eftir að hann hefur hafið töku ellilífeyris skulu viðbótarréttindi hans reiknuð á ný þegar hann hefur náð 70 ára aldri. Réttindi, sem sjóðfélagi ávinnur sér eftir að taka lífeyris hefst, reiknast án hækkunar skv. 1. mgr. Þrátt fyrir ákvæði 22. gr. skulu réttindi sem aflað er eftir 65 ára aldur vera 0,95% af þeim launum sem greitt er af til deildarinnar.

Örorkulífeyrir í A – deild

25. Sjóðfélagi, sem verður fyrir orkutapi sem telja verður að nemi 40% eða meira og hefur áunnið sér alls a.m.k. 1.865 krónur miðað 174,2 stig vísitölu neysluverðs í mánaðarlegan lífeyrisrétt samkvæmt grein 22, eða hefur greitt til sjóðsins iðgjald í a.m.k. tvö ár á rétt á örorkulífeyri úr sjóðnum í samræmi við áunnin réttindi fram að orkutapi.

Réttur til örorkulífeyris stofnast aðeins ef sjóðfélagi hefur orðið fyrir tekjuskerðingu af völdum orkutapsins. Aldrei skal samanlagður örorkulífeyrir og barnalífeyrir skv. 22. gr. vera hærri en sem nemur þeim tekjumissi sem sjóðfélaginn hefur sannanlega orðið fyrir sökum örorkunnar.

Hundraðshluta orkutaps og tímasetningu þess skal ákvarða að fengnum upplýsingum um heilsufarssögu og starfsorku umsækjanda aftur í tímann. Trúnaðarlæknir skal meta hundraðshluta orkutaps og tímasetningu þess. Fyrstu fimm árin eftir orkutapið skal mat þess aðallega miðað við vanhæfni sjóðfélaga til að gegna því starfi er hann hefur gegnt og aðild hans að sjóðnum er tengd. Að því tímabili loknu skal hundraðshluti orkutaps ákvarðaður að nýju með tilliti til vanhæfni sjóðfélagans til að gegna almennum störfum.

Heimilt er, að fengnu áliti trúnaðarlæknis, að setja það skilyrði fyrir greiðslu örorkulífeyris að sjóðfélagi fari í endurhæfingu sem bætt gæti heilsufar hans.

Þegar skilyrði 1. mgr. og þessarar málsgreinar eru uppfyllt miðast hámark örorkulífeyris við áunninn lífeyrisrétt skv. 22. gr. að viðbættum lífeyri er svarar til þess sem sjóðfélaginn hefði áunnið sér fram til 65 ára aldurs, reiknuðum samkvæmt ákvæðum 9. mgr. enda hafi sjóðfélagi:

a. greitt iðgjöld til sjóðsins a.m.k. þrjú af undanfarandi fjórum almanaksárum og áunnið sér eigi minna en 466 krónur miðað 174,2 stig vísitölu neysluverðs í mánaðarlegan lífeyrisrétt samkvæmt grein 22 hvert þessara þriggja ára,

b greitt iðgjöld til sjóðsins a.m.k. sex mánuði á undanfarandi tólf mánuðum,

c ekki orðið fyrir orkutapi sem rekja megi til ofnotkunar áfengis, lyfja eða fíkniefna.

Eigi sjóðfélaginn jafnframt rétt á örorkulífeyri úr öðrum sjóði skal hann því aðeins njóta framreikningsréttinda úr þessum sjóði að hann hafi síðast greitt iðgjöld til hans.

Þó svo að lífeyrissjóðurinn hafi gert samning við aðra lífeyrissjóði um réttindaflutninga samkvæmt heimild í 51. gr. stofnast ekki réttur til framreiknings í þessum sjóði ef sjóðfélagi hefur skipt um starf og af þeim sökum hafið iðgjaldagreiðslur til þessa sjóðs á síðustu 24 mánuðum fyrir orkutap og rekja má starfsskiptin til versnandi heilsufars sem leitt hefur til orkutapsins. Eigi sjóðfélagi, sem þessi málsgrein tekur til, ekki rétt á framreiknuðum örorkulífeyri úr öðrum lífeyrissjóði skal þó framreikna réttindi hjá þessum sjóði, enda hafi örorka sjóðfélaga skv. 1. mgr. komið til að mati trúnaðarlæknis eftir að sjóðfélagi hóf iðgjaldagreiðslur til þessa sjóðs.

Hafi sérstakar ástæður, svo sem aldur sjóðfélaga, búseta hans erlendis eða nám, orðið þess valdandi að hann hefur ekki getað uppfyllt tímaskilyrði þau sem nefnd eru í a-lið 5. mgr. er sjóðstjórn heimilt að stytta þann tíma sem þar er krafist í tvö undanfarandi almanaksár, enda verði talið fullvíst að orsök örorku verði ekki rakin til tíma fyrir orkutap.

Eigi sjóðfélagi, sem ekki hefur náð 65 ára aldri er hann verður fyrir orkutapi, rétt skv. 5. mgr. á framreikningi skal sá framreikningur vera reiknaður út frá meðaltali áunninna réttinda sjóðfélaga næstu þrjú almanaksárin fyrir orkutapið. Telji sjóðstjórnin þetta þriggja ára meðaltal vera sjóðfélaganum óhagstætt vegna sjúkdómsforfalla eða atvinnuleysis er henni heimilt að leggja til grundvallar meðaltal réttinda fleiri ár aftur í tímann og sleppa úr meðaltalinu því almanaksári sem lakast er.

Hafi sjóðfélagi haft skerta almenna starfsorku fyrir þann tíma er hann hóf iðgjaldagreiðslur til sjóðsins og meta má þá starfsorkuskerðingu 50% eða meira skal reikna meðaltal réttinda hans öll þau almanaksár sem hann hefur greitt iðgjald til sjóðsins. Skal þá í slíkum tilvikum miða framreikning við þetta meðaltal.

Nú hafa iðgjaldagreiðslur sjóðfélaga til lífeyrissjóða verið svo stopular að þær hafa fallið niður eða myndað minni mánaðarlegan lífeyrisrétt en 466 krónur samkvæmt grein 22 miðað 174,2 stig vísitölu neysluverðs á ári fleiri en eitt almanaksár eftir lok þess árs er sjóðfélagi náði 25 ára aldri og sennilegt má telja að vanheilsa, áfengisneysla eða notkun lyfja og fíkniefna hafi átt þátt í stopulum greiðslum, og skal þá framreikningstími styttur í hlutfallinu milli fjölda almanaksára sem öflun réttinda hefur verið undir 466 krónum í mánaðarlegan lífeyrisrétt samkvæmt grein 22 miðað 174,2 stig vísitölu neysluverðs og fjölda almanaksára frá 25 ára aldri fram til orkutaps. Sama gildir ef stopular iðgjaldagreiðslur stafa af undanskoti frá greiðsluskyldu til lífeyrissjóða.

Nemi árlegt meðaltal sem miða skal framreikning við skv. 9. eða 10. mgr. meira en 5.595 krónum í mánaðarlegan lífeyrisrétt samkvæmt grein 22 miðað 174,2 stig vísitölu neysluverðs skal reikna með meðaltalinu allt að tíu árum, en síðan til 65 ára aldurs, reiknað með framangreindu meðaltali á ári að viðbættum helmingi þeirra réttinda sem umfram eru.

Ef rekja má sjúkdóma þá sem valda orkutapi sjóðfélaga svo langt aftur í tímann að nemi a.m.k. helmingi almanaksára frá lokum þess árs er sjóðfélagi náði 16 ára aldri til þess tíma er orkutap telst hafa orðið skulu framreiknuð réttindi aldrei reiknast hærri en þau réttindi sem sjóðfélaginn hefur áunnið sér í lífeyrissjóðum fram að orkutapi.

Örorkulífeyrir er sami hundraðshluti af hámarksörorkulífeyri og orkutapið er metið, sbr. þó 1. mgr.

Örorkulífeyrir greiðist einungis ef orkutap og tekjumissir vegna orkutaps vara í þrjá mánuði eða lengri tíma.

Skylt er sjóðfélaga, sem sækir um örorkulífeyri úr sjóðnum eða nýtur slíks lífeyris, að láta stjórn sjóðsins í té allar þær upplýsingar um heilsufar sitt og atvinnutekjur sem nauðsynlegar eru til að dæma um rétt hans til lífeyris.

Stjórn sjóðsins skal lækka eða fella niður örorkulífeyri þeirra sjóðfélaga sem fá starfsorku sína aftur að nokkru eða öllu leyti. Sömuleiðis ber henni að hækka örorkulífeyrinn ef örorkan vex til muna frá því sem hún var metin við fyrri ákvarðanir, enda hafi sjóðfélaginn á þeim tíma er örorkan óx ekki verið í starfi er veitti honum lífeyrisréttindi í öðrum lífeyrissjóði.

Örorkulífeyrir fellur niður við 65 ára aldur. Ellilífeyrir skal þá ákveðinn þannig að auk áunninna réttinda skal reikna að þeim hluta, er hundraðshluti örorku segir til um, stig sem við úrskurð örorkulífeyris voru reiknuð sjóðfélaganum fram til 65 ára aldurs. Aldrei skal þó slík viðbót við áunnin réttindi vera meiri en svo að heildarréttindi hvert almanaksár verði hærri en almennt tíðkast í starfsgrein hlutaðeigandi sjóðfélaga.

Makalífeyrir í A – deild
26. Nú andast sjóðfélagi sem naut elli- eða örorkulífeyris úr sjóðnum eða greitt hafði iðgjald til hans a.m.k. 24 mánuði á undanfarandi 36 mánuðum og lætur eftir sig maka og á þá hinn eftirlifandi maki rétt á lífeyri úr sjóðnum. Fullur makalífeyrir skal að lágmarki greiddur í 36 mánuði og 50% makalífeyrir í 24 mánuði til viðbótar.

Hafi makinn barn yngra en 22 ára á framfæri sínu, sem sjóðfélaginn hafði áður á framfæri sínu, skal fullur makalífeyrir greiddur fram að 22 ára aldri yngsta barnsins, enda sé það á framfæri makans. Sé maki a.m.k. 50% öryrki skal greiddur makalífeyrir meðan sú örorka varir, enda sé eftirlifandi maki yngri en 67 ára við fráfall sjóðfélagans.

Jafnframt skal greiða makalífeyri ótímabundið til eftirlifandi maka sjóðfélaga sem fæddir eru fyrir 1. janúar 1945 með þeim takmörkunum sem hér segir: Makalífeyrir skv. 6. mgr. skal lækka um 2% fyrir hvert ár sem makinn er fæddur eftir 1. janúar 1925, 2% að auki fyrir hvert ár sem makinn er fæddur eftir 1. janúar 1930, 2% að auki fyrir hvert ár sem makinn er fæddur eftir 1. janúar 1935 og 2% að auki fyrir hvert ár sem makinn er fæddur eftir 1. janúar 1940.

Nú lætur sjóðfélagi ekki eftir sig maka og er þá stjórn sjóðsins heimilt að greiða lífeyri skv. 1.–3. mgr. til aðila sem sannanlega hefur annast heimili hins látna um langt árabil fyrir andlát hans.

Upphæð óskerts makalífeyris er helmingur af áunnum lífeyrisréttindum sjóðfélaga. Hafi sjóðfélagi greitt til sjóðsins a.m.k. 6 mánuði af 12 skal auk áunninna réttinda telja helming þeirra réttinda sem ætla má að sjóðfélaginn hefði áunnið sér fram til 65 ára aldurs, reiknuð í samræmi við ákvæði 9. mgr. 25. gr. Hafi sjóðfélaginn notið örorkulífeyris úr sjóðnum skal reikna réttindi frá þeim tíma er honum var veittur örorkulífeyrir og til þess tíma er makalífeyrir er veittur, allt að 65 ára aldri, í samræmi við ákvæði lokamálsgreinar 25. gr., en síðan til 65 ára aldurs í samræmi við réttindi þau sem lögð voru til grundvallar örorkulífeyri. Veiti dauðsfallið eftirlifandi maka jafnframt rétt til lífeyris úr öðrum sjóði skal hann því aðeins njóta framreikningsréttinda úr þessum sjóði að hinn látni hafi síðast greitt iðgjöld til þessa sjóðs. Séu skilyrði 1. mgr. um iðgjaldagreiðslutíma ekki uppfyllt ákvarðast upphæð makalífeyris í samræmi við 2. mgr. 50. gr.

Rétthafi samkvæmt þessari grein telst sá eða sú sem við andlátið var í hjúskap með sjóðfélaga, staðfestri samvist, sbr. lög nr. 87/1996, eða óvígðri sambúð, enda hafi fjárfélagi ekki verið slitið fyrir andlát sjóðfélagans. Með óvígðri sambúð er hér átt við sambúð karls og konu sem eiga sameiginlegt lögheimili, eru samvistum, eiga barn saman eða konan er þunguð eða sambúðin hefur varað samfleytt í a.m.k. eitt ár. Réttur til makalífeyris fellur niður ef makinn gengur í hjónaband á ný eða stofnar til sambúðar sem jafna má til hjúskapar, en gengur aftur í gildi ef síðara hjónabandinu er slitið án réttar til lífeyris.

Barnalífeyrir í A – deild
27. Nú andast sjóðfélagi sem greitt hefur iðgjöld til sjóðsins í a.m.k. 24 mánuði af undanfarandi 36 mánuðum eða notið úr honum elli- eða örorkulífeyris við andlátið í a.m.k. sex mánuði á undanfarandi tólf mánuðum, og eiga þá börn hans og kjörbörn sem hann lætur eftir sig og yngri eru en 22 ára rétt á lífeyri úr sjóðnum til 22 ára aldurs. Veiti fráfall sjóðfélagans börnunum jafnframt rétt til lífeyris úr öðrum lífeyrissjóði skal lífeyrir úr þessum sjóði þó bundinn því skilyrði að sjóðfélaginn hafi síðast greitt iðgjöld til þessa sjóðs.

Fullur barnalífeyrir vegna fráfalls sjóðfélaga er 10.000 kr. með hverju barni fyrir hvern almanaksmánuð. Fjárhæð þessi breytist í hlutfalli við breytingu á vístölu neysluverðs frá 174,2 stigum. Fullur barnalífeyrir greiðist ef árleg áunnin réttindi, áætluð í samræmi við 6. mgr. 26. gr., samsvara a.m.k. 932 krónur miðað 174,2 stig vísitölu neysluverðs í mánaðarlegan lífeyrisrétt samkvæmt grein 22. Séu áætluð árleg réttindi lægri lækkar barnalífeyrir frá sjóðnum hlutfallslega og fellur niður ef árleg áunnin réttindi reiknast minni en 466 krónur í mánaðarlegan lífeyrisrétt samkvæmt grein 22 miðað 174,2 stig vísitölu neysluverðs.

Sé sjóðfélaga, sem uppfyllir skilyrði a- og b-liðar 5. mgr. 25. gr., úrskurðaður örorkulífeyrir úr sjóðnum vegna 100% örorku öðlast börn hans, fædd fyrir orkutap eða á næstu tólf mánuðum þar á eftir, svo og kjörbörn sem ættleidd hafa verið fyrir orkutap, sama rétt og börn látins sjóðfélaga njóta skv. 2. mgr. með þeirri undantekningu að fjárhæð fulls barnalífeyris fyrir hvern almanaksmánuð er 7.500 kr. með hverju barni. Sé örorka skv. 25. gr. metin lægri en 100% skal barnalífeyrir sjóðsins vera hlutfallslega lægri. Barnalífeyrir, sem greiddur er vegna örorku sjóðfélaga, fellur ekki niður þó að sjóðfélaginn nái ellilífeyrisaldri.

Fósturbörn og stjúpbörn, sem sjóðfélagi hefur framfært að mestu eða öllu leyti, skulu eiga rétt á barnalífeyri. Skulu lífeyrisgreiðslur sjóðsins vegna slíkra barna vera hinar sömu og vera mundu ef um börn eða kjörbörn væri að ræða.

Barnalífeyrir greiðist framfæranda barnsins til 18 ára aldurs þess, en eftir það til barnsins.

Iðgjöld til A – deildar
28. Sjóðfélagar greiða 4% af launum skv. 19. gr. í iðgjald til sjóðsins. Sjóðfélagar bera eigi ábyrgð á skuldbindingum deildarinnar nema með öðru en iðgjöldum sínum. Iðgjald launagreiðenda skal við stofnun sjóðsins vera 11,5% af iðgjaldsstofni. Iðgjaldið skal endurskoða árlega eftir 3 ár frá stofnun sjóðsins og ákveðið árlega í samræmi við niðurstöðu tryggingafræðilegrar athugunar sbr.. 48 og 29 .gr., en skal þó aldrei vera lægra en 6%.

Heimilt er stjórn sjóðsins að taka við viðbótariðgjaldi sem greitt verði umfram iðgjald skv. 1. mgr. til ávinnslu réttinda eftir nánari reglum sem stjórn setur að fengnum tillögum tryggingafræðings.

Endurskoðun iðgjalds í A – deild
29. Leiði tryggingafræðileg athugun í ljós að iðgjald sjóðfélaga til sjóðsins ásamt mótframlagi launagreiðenda dugi ekki til greiðslu á skuldbindingum sjóðsins skal stjórn sjóðsins hækka framlag launagreiðenda í samræmi við niðurstöðu athugunarinnar. Við ákvörðun á greiðslum launagreiðenda umfram 6% af launum sjóðfélaga ráði það sjónarmið að hrein eign lífeyrissjóðsins til greiðslu lífeyris ásamt núvirði framtíðariðgjalda til hans séu á hverjum tíma jafnhá núvirði væntanlegs lífeyris vegna þegar greiddra iðgjalda og framtíðariðgjalda. Áætlun um framtíðariðgjöld og væntanlegan lífeyri skal miða við sjóðfélaga á þeim tíma sem tryggingafræðileg athugun tekur til. Við slíka endurskoðun á iðgjaldi skal þess sérstaklega gætt að nýta heimildir laganna fyrir öryggismörk. Skal ákvörðun um hækkun framlags launagreiðanda eða lækkun liggja fyrir eigi síðar en 1. október fyrir komandi almanaksár.

Ef eignir deildarinar eru metnar lægri en áfallnar skuldbindingar samkvæmt tryggingafræðilegri úttekt og hafi launagreiðandi hætt greiðslum til sjóðsins skal þeim launagreiðanda skylt að greiða framlag til sjóðsins sem nemur hluta áfallinna skuldbindinga sem stofnast hafa vegna starfsmanna hans af heildar áfallinni skuldbindingu sjóðsins af fyrrgreindum mismuni eigna og skuldbindinga.

Val sjóðfélaga A – deildar
30. Eigi sjóðfélagi aðild að A – deild skal honum heimilt að flytja í V – deild með skriflegri tilkynningu til sjóðsins. Slíkt val er óafturkallanlegt. Sjóðfélagi sem fær aðild að A – deild samkvæmt ráðningar- eða kjarasamningi skal fá þá aðild staðfesta af lífeyrissjóðnum og jafnframt skal sjóðurinn kynna fyrir sjóðfélaga möguleika hans á aðild að V – deild og hvaða kostir eru þar í boði. Sjóðfélagi sem ákveður að flytja sig úr A – deild í V – deild á rétt á því að flytja með sér iðgjöld síðustu 12 mánaða.

III. Kafli: Valdeild

Iðgjald í V – deild
31. Iðgjald til sjóðsins skal hverju sinni ekki vera lægra en lög, kjarasamningar eða ráðningarsamningar gera ráð fyrir. Iðgjald til öflunar lágmarkstryggingarverndar skal vera 10%. Ef sjóðfélagi lætur ekki vita um ráðstöfun iðgjalds umfram iðgjald til lágmarkstryggingarverndar skal það allt renna til öflunar réttinda samkvæmt greinum 33 – 38. Sjóðfélaga er heimilt að ráðstafa iðgjaldi umfram lágmarksiðgjald til öflunar réttinda samkvæmt greinum 40 – 43 og samkvæmt greinum 45 - 46.

32. Iðgjald veitir lífeyrisréttindi samkvæmt töflu 1. Taflan sýnir árlegan lífeyri fyrir hvert 10.000 króna iðgjald sem greitt er. Lífeyrisrétturinn er verðtryggður miðað við vísitölu neysluverðs til verðtryggingar í þeim mánuði sem iðgjaldið berst.
Tafla 1: Árlegur lífeyrir fyrir 10.000 kr iðgjald
Lífeyris Lífeyris Lífeyris Lífeyris Lífeyris
Aldur réttindi Aldur réttindi Aldur réttindi Aldur réttindi Aldur réttindi
16 3.225 26 2.367 36 1.713 46 1.236 56 897
17 3.131 27 2.292 37 1.658 47 1.196 57 871
18 3.039 28 2.220 38 1.605 48 1.158 58 846
19 2.948 29 2.149 39 1.554 49 1.121 59 822
20 2.859 30 2.080 40 1.504 50 1.085 60 800
21 2.772 31 2.013 41 1.456 51 1.050 61 779
22 2.687 32 1.949 42 1.409 52 1.017 62 760
23 2.605 33 1.886 43 1.364 53 985 63 742
24 2.524 34 1.827 44 1.320 54 954 64 725
25 2.445 35 1.769 45 1.277 55 925

Ellilífeyrir í V – deild
33. Hver sjóðfélagi, sem er orðinn 65 ára, á rétt á ellilífeyri. Árlegur ellilífeyrir frá 65 ára aldri er uppsafnaður lífeyrisréttur reiknaður samkvæmt töflu 1. Ellilífeyririnn greiðist í fyrsta sinn fyrir þann mánuð sem sjóðfélaginn verður 65 ára.

34. Sjóðfélaga er heimilt að fresta allt til 70 ára aldurs að taka ellilífeyri og hækkar lífeyririnn, sem miðaðist við 65 ára aldur þannig:

Tafla 2a: Hækkun ellilífeyris ef töku lífeyris er seinkað
Taka lífeyris hefst 65-66 ára 0,70% hækkun fyrir hvern mánuð

    66-67 0,75%
   67-68 0,80%
   68-69 0,85%
   69-70 0,90%
Á sama hátt er sjóðfélaga heimilt að hefja töku ellilífeyris áður en hann nær 65 ára aldri, þó ekki fyrr en frá 60 ára aldri og skal þá áunninn lífeyrir hans lækkaður þannig:
Tafla 2b: Hækkun ellilífeyris ef töku lífeyris er flýtt

  Taka lífeyris hefst 64-65 ára 0,65% lækkun fyrir hvern mánuð
   63-64 0,60%
   62-63 0,55%
   61-62 0,50%
   60-61 0,45%

Stjórn sjóðsins skal í samráði við tryggingafræðing hans setja reglur um tilhögun öflunar lífeyrisréttinda fyrir iðgjaldagreiðslur eftir að 65 ára aldri er náð og birta töflur sem sýna hversu mikil réttindi fást fyrir slíkar iðgjaldagreiðslur.

Örorkulífeyrir í V – deild
35. Sjóðfélagi, sem vegna örorku verður vanhæfur að gegna starfi sínu áður en hann nær 65 ára aldri á rétt á örorkulífeyri úr sjóðnum sem er jafn uppsöfnuðum lífeyrisrétti reiknuðum samkvæmt töflu 1. Ef starfsorkumissirinn er ekki alger en meiri en 40% skal örorkulífeyririnn vera hlutfall starfsorkumissisins af áunnum lífeyrisréttindum. Ef starfsorkumissir er minni en 40% á sjóðfélagi ekki rétt til örorkulífeyris.

Réttur til örorkulífeyris stofnast aðeins ef sjóðfélagi hefur orðið fyrir tekjuskerðingu af völdum orkutapsins. Aldrei skal samanlagður örorkulífeyrir og barnalífeyrir úr sjóðnum vera hærri en sem nemur þeim tekjumissi sem sjóðfélaginn hefur sannanlega orðið fyrir sökum örorkunnar.

Hundraðshluta orkutaps og tímasetningu þess skal ákvarða að fengnum upplýsingum um heilsufarssögu og starfsorku umsækjanda aftur í tímann. Trúnaðarlæknir sjóðsins skal meta hundraðshluta orkutaps og tímasetningu þess. Fyrstu fimm árin eftir orkutapið skal mat þess aðallega miðað við vanhæfni sjóðfélaga til að gegna því starfi er hann hefur gegnt og aðild hans að sjóðnum er tengd. Að því tímabili loknu skal hundraðshluti orkutaps ákvarðaður að nýju með tilliti til vanhæfni sjóðfélagans til að gegna almennum störfum.

Heimilt er, að fengnu áliti trúnaðarlæknislæknis, að setja það skilyrði fyrir greiðslu örorkulífeyris að sjóðfélagi fari í endurhæfingu sem bætt gæti heilsufar hans.

36. Sjóðfélagi sem hefur greitt til V – deildar sjóðsins á síðustu þremur árunum fyrir starfsorkumissinn fær viðbót við örorkulífeyri sem nemur þeim réttindum sem árlegt meðaltal iðgjalda þessara þriggja ára gæfi samkvæmt töflu 1 væri það greitt þau ár er vantar á 65 ára aldur hans eða hlutfallslega ef starfsorkumissirinn er ekki alger en meiri en 40%. Ef starfsorkumissirinn breytist við endurmat þá breytast örorkugreiðslurnar samsvarandi og falla niður ef starfsorkumissirinn fer niður fyrir 40%. Ef örorkugreiðslur falla niður vegna endurmats skal endurreikna áunninn lífeyrisrétt sjóðfélaga þannig að áunninn lífeyrisréttur við starfsorkumissi skal hækkaður með framreikningi árlegs meðaltals iðgjalda síðustu þriggja ára fyrir starfsorkumissi hlutfallslega miðað við 40% eða meiri starfsorkumissi fram til þess tíma sem örorkugreiðslur falla niður. Þegar sjóðfélagi nær 65 ára aldri skal endurreikna áunninn lífeyrisrétt á sama hátt hlutfallslega miðað við starfsorkumissinn. Ef sjóðfélagi deyr fyrir 65 ára aldur er áunninn lífeyrisréttur einnig endurreiknaður hlutfallslega miðað við starfsorkumissi og skal miða við öll árin sem vantar á 65 ára aldurinn og starfsorkumissinn við andlát.

Fjölskyldulífeyrir í V – deild
37. Þegar sjóðfélagi deyr, sem hefur áunnið sér alls a.m.k. 1.865 krónur í mánaðarlegan lífeyrisrétt miðað 174,2 stig vísitölu neysluverðs eða greitt hafði iðgjald til hans a.m.k. 24 mánuði á undanfarandi 36 mánuðum á eftirlifandi maki rétt á árlegum makalífeyri sem nemur helmingi uppsafnaðra lífeyrisréttinda samkvæmt töflu 1 í tvö ár. Makalífeyrir greiðist þó alltaf meðan eftirlifandi maki hefur á framfæri sínu barn yngra en 18 ára, sem sjóðfélaginn hafði á framfæri sínu. Sé maki a.m.k. 50% öryrki skal greiddur makalífeyrir meðan sú örorka varir, enda sé eftirlifandi maki yngri en 67 ára við fráfall sjóðfélagans.

Ef sjóðfélagi sem ekki hefur hafið töku lífeyris hefur greitt til sjóðsins á síðustu þremur árunum fyrir andlát skal reikna viðbót við áunninn lífeyrisrétt sem nemur þeim réttindum sem árlegt meðaltal iðgjalda þessara þriggja ára gæfi samkvæmt töflu 1 væri það greitt þau ár er vantar á 65 ára aldur. Réttur til makalífeyris fellur niður ef makinn gengur í hjónaband á ný eða stofnar til sambúðar sem jafna má til hjúskapar, en gengur aftur í gildi ef síðara hjónabandið er slitið án réttar til lífeyris.

38. Þegar sjóðfélagi deyr, sem hefur áunnið sér alls a.m.k. 1.865 krónur í mánaðarlegan lífeyrisrétt miðað 174,2 stig vísitölu neysluverðs og að auki greitt til sjóðsins a.m.k. 6 mánuði á undanfarandi 12 mánuðum, eiga börn hans, kjörbörn og ættleidd börn yngri en 18 ára rétt á lífeyri til 18 ára aldurs, svo fremi að sjóðfélaginn hafi síðast greitt til þessarar deildar lífeyrissjóðsins. Barnalífeyririnn með hverju barni er 7.500 krónur á mánuði og breytist lífeyririnn í hlutfalli við breytingu á vísitölu neysluverðs til verðtryggingar frá 174,2 stigum. Sama rétt til lífeyris öðlast börn fædd eða ættleidd fyrir orkutap sjóðfélaga sem nýtur fulls örorkulífeyris. Ef örorka er metin lægri en 100% skal barnalífeyrir vera hlutfallslega lægri.

Aukaiðgjald til V – deildar
39. Þegar sjóðfélagi greiðir til V – deildar sjóðsins ákveðna fjárhæð umfram venjulegt iðgjald, til dæmis fé sem hann fær yfirfært úr öðrum lífeyrissjóði, skulu lífeyrisréttindi sem tiltekin eru í greinum 33 – 38 ákveðin samkvæmt töflu 3. Taflan sýnir árlegan lífeyri fyrir hvert 10.000 króna eingreiðsluiðgjald sem greitt er. Lífeyrisrétturinn er verðtryggður miðað við vísitölu neysluverðs til verðtryggingar í þeim mánuði sem iðgjaldið berst. Réttur til framreiknings stofnast ekki vegna lífeyrisréttinda samkvæmt töflu 3.

Tafla 3: Árlegur lífeyrir fyrir 10.000 kr eingreiðsluiðgjald
Lífeyris Lífeyris Lífeyris Lífeyris Lífeyris
Aldur réttindi Aldur réttindi Aldur réttindi Aldur réttindi Aldur réttindi
16 3.562 26 2.588 36 1.883 46 1.375 56 1.000
17 3.451 27 2.507 37 1.824 47 1.332 57 968
18 3.343 28 2.428 38 1.768 48 1.291 58 936
19 3.238 29 2.352 39 1.713 49 1.251 59 904
20 3.136 30 2.278 40 1.660 50 1.212 60 873
21 3.037 31 2.206 41 1.608 51 1.175 61 842
22 2.942 32 2.137 42 1.559 52 1.138 62 811
23 2.849 33 2.071 43 1.510 53 1.102 63 780
24 2.759 34 2.006 44 1.464 54 1.068 64 749
25 2.672 35 1.944 45 1.418 55 1.034

Viðbótarörorkulífeyrir í V-deild
40. Sjóðfélagar yngri en 50 ára geta með greiðslu iðgjalds umfram lágmarksiðgjald samkvæmt grein 31 tryggt sér viðbótarörorkulífeyri ef starfsorka skerðist um 40% eða meira fyrir 55 ára aldur vegna sjúkdóms eða slyss. Sjóðfélagar eiga rétt á örorkulífeyri úr sjóðnum sem er jafn uppsöfnuðum lífeyrisrétti reiknuðum samkvæmt töflu 4 hlutfallslega miðað við viðbótariðgjald þeirra. Taflan sýnir árlegan lífeyri fyrir hvert 10.000 króna iðgjald sem greitt er. Að öðru leyti gilda ákvæði 35. og 36. greinar um skilyrði þess að fá greiddan örorkulífeyri nema hvað framreikningurinn, ef til hans stofnast, ræðst af viðbótariðgjaldinu og töflu 4. Örorkulífeyrir samkvæmt töflu 4 greiðist til æviloka.

Tafla 4: Árlegur viðbótarörorkulífeyrir fyrir hvert 10.000 kr iðgjald
Lífeyris Lífeyris Lífeyris Lífeyris Lífeyris
Aldur réttindi Aldur réttindi Aldur réttindi Aldur réttindi Aldur réttindi
16 12.549 26 12.371 36 11.336 46 14.136 56 0
17 12.589 27 12.287 37 11.261 47 15.852 57 0
18 12.617 28 12.195 38 11.209 48 18.571 58 0
19 12.630 29 12.094 39 11.192 49 23.092 59 0
20 12.632 30 11.987 40 11.223 50 0 60 0
21 12.619 31 11.875 41 11.317 51 0 61 0
22 12.594 32 11.760 42 11.500 52 0 62 0
23 12.556 33 11.646 43 11.806 53 0 63 0
24 12.506 34 11.534 44 12.286 54 0 64 0
25 12.444 35 11.430 45 13.020 55 0

Aldrei skal samanlagður örorkulífeyrir og barnalífeyrir úr sjóðnum vera hærri en sem nemur þeim tekjum sem sjóðfélaginn greiddi iðgjald af til sjóðsins.

Viðbótarmakalífeyrir í V-deild
41. Sjóðfélagar geta , með greiðslu iðgjalds umfram lágmarksiðgjald samkvæmt grein 31, tryggt eftirlifandi maka sínum rétt til viðbótarmakalífeyris. Makinn á rétt á lífeyri úr sjóðnum sem er jafn uppsöfnuðum lífeyrisrétti reiknuðum samkvæmt töflu 5 hlutfallslega miðað við viðbótariðgjaldið. Taflan sýnir árlegan lífeyri fyrir hvert 10.000 króna iðgjald sem greitt er. Að öðru leyti gilda ákvæði 37. greinar um skilyrði þess að fá greiddan makalífeyri nema hvað framreikningurinn, ef til hans stofnast ræðst, af viðbótariðgjaldinu og töflu 5, og að uppsöfnuð lífeyrisréttindi samkvæmt töflu 5 gilda einungis um makalífeyrinn. Réttur til framreiknings myndast einnig samkvæmt ákvæðum 35. og 36. greinar um örorkulífeyri í V – deild.

Tafla 5: Árlegur viðbótarmakalífeyrir fyrir hvert 10.000 kr iðgjald
Lífeyris Lífeyris Lífeyris Lífeyris Lífeyris
Aldur réttindi Aldur réttindi Aldur réttindi Aldur réttindi Aldur réttindi
16 40.243 26 26.579 36 16.547 46 13.522 56 11.974
17 38.847 27 25.207 37 16.038 47 13.375 57 11.821
18 37.506 28 23.958 38 15.555 48 13.220 58 11.693
19 36.161 29 22.696 39 15.167 49 13.086 59 11.596
20 34.819 30 21.485 40 14.843 50 12.952 60 11.547
21 33.516 31 20.379 41 14.555 51 12.808 61 11.561
22 32.258 32 19.369 42 14.282 52 12.652 62 11.658
23 31.110 33 18.423 43 14.029 53 12.484 63 11.865
24 29.635 34 17.701 44 13.834 54 12.312 64 12.211
25 28.056 35 17.101 45 13.676 55 12.141

Aldrei skal samanlagður makalífeyrir og barnalífeyrir úr sjóðnum vera hærri en sem nemur þeim tekjum sem sjóðfélaginn greiddi iðgjald af til sjóðsins.

Viðbótarellilífeyrir í V-deild

42. Sjóðfélagar geta, með greiðslu iðgjalds umfram lágmarksiðgjald samkvæmt grein 31, aukið ellilífeyrisréttindi sem tryggir mánaðarlegar lífeyrisgreiðslur frá 65 ára aldri. Árlegur viðbótarellilífeyrir frá 65 ára aldri er uppsafnaður lífeyrisréttur reiknaður samkvæmt töflu 6. Taflan sýnir árlegan lífeyri fyrir hvert 10.000 króna iðgjald sem greitt er. Heimilt er að fresta eða flýta töku ellilífeyris samkvæmt ákvæðum greinar 34.

Tafla 6: Árlegur viðbótarellilífeyrir fyrir hvert 10.000 kr iðgjald
Aldur Lífeyris Aldur    Lífeyris Aldur      Lífeyris Aldur     Lífeyris Aldur    Lífeyris
        réttindi          réttindi              réttindi                réttindi                    réttindi
16 4.400 26 3.104 36 2.186 46 1.531 56 1.054
17 4.249 27 2.997 37 2.110 47 1.476 57 1.013
18 4.104 28 2.894 38 2.037 48 1.424 58 974
19 3.963 29 2.795 39 1.966 49 1.372 59 935
20 3.827 30 2.699 40 1.898 50 1.323 60 897
21 3.696 31 2.606 41 1.831 51 1.275 61 861
22 3.569 32 2.516 42 1.767 52 1.228 62 825
23 3.447 33 2.429 43 1.705 53 1.183 63 789
24 3.328 34 2.345 44 1.645 54 1.138 64 755
25 3.214 35 2.264 45 1.587 55 1.096

43. Sjóðfélaga 60 til 70 ára er heimilt að nota hluta inneignar sinnar úr séreignarsjóði skv. grein 45 til að kaupa sér réttindi til ellilífeyris í sameign. Stjórn sjóðsins skal í samráði við tryggingafræðing sjóðsins setja reglur um tilhögun þessara greiðslna og birta töflur sem sýna hversu mikil réttindi fást fyrir séreignina.

Endurskoðun réttinda í V – deild
44. Deildin skal eiga fyrir skuldbindingum sínum skv. tryggingafræðilegri athugun, sbr. 48. grein. Ef eignir sjóðsins eru umfram skuldbindingar skal mynda uppbótasjóð. Sjóðfélagar fá greitt úr uppbótasjóði í hlutfalli við skuldbindingu vegna hvers og eins sjóðfélaga og skal sá uppbótasjóður ekki verða stærri en 5% af samtals skuldbindingu vegna annarra réttinda. Greiðsla til sjóðfélaga fer fram sem aukaiðgjald til sjóðsins, þannig að lífeyrisréttindi sjóðfélaga aukast eða lífeyrisgreiðslur hækka, séu þeir komnir á lífeyri. Ef eignir duga ekki fyrir áföllnum skuldbindingum skal sjóðurinn gera viðeigandi ráðstafanir svo sem að skerða þau réttindi sem iðgjald til sjóðsins veitir og ef það dugar ekki þá skal skerða áunnin réttindi.

IV. Kafli: Séreignadeild
Séreignarréttindi
45. Fé það, sem lagt er inn í séreignadeild í nafni sjóðfélaga, skal vera séreign hans. Auk þess skal færa til eignar hjá hverjum sjóðfélaga þær tekjur af vöxtum og verðbótum sem sjóðnum áskotnast vegna eignar hans í sjóðnum að frádregnum kostnaði.

Þegar sjóðfélagi er orðinn 60 ára er heimilt að hefja útborgun lífeyrissparnaðar og vaxta með jöfnum árlegum greiðslum á ekki skemmri tíma en sjö árum eða á þeim tíma sem rétthafa vantar upp á 67 ára aldur.

Verði sjóðfélagi öryrki og orkutapið sem hann verður fyrir er 100% á hann rétt á að fá lífeyrissparnað og vexti greidda út með jöfnum árlegum greiðslum á sjö árum. Nú er örorkuprósentan lægri en 100% og lækkar þá árleg útborgun í hlutfalli við lækkun örorkuprósentunnar og úttektartíminn lengist samsvarandi.

Deyi sjóðfélagi áður en innstæða er að fullu greidd fellur hún til erfingja hans og skiptist milli þeirra eftir reglum erfðalaga.

a. Hlut barns undir 13 ára aldri ber að skipta með jöfnum greiðslum á þau ár sem vantar að barnið nái 18 ára aldri. Hafi barn náð 13 ára aldri við andlát rétthafa skal hlutur þess greiddur út á fimm árum.

b. Hlut eftirlifandi maka ber að skipta með jöfnum greiðslum á sjö ár eða á þann tíma sem makann vantar á 67 ára aldur við andlát rétthafa.

c. Láti rétthafi ekki eftir sig maka eða barn rennur innstæðan til dánarbús samanber 11. grein laga nr, 127/1997 um skyldutryggingu lífeyrisrtéttinda og starfsemi lífeyrissjóða.

Heimilt er stjórn sjóðsins að víkja frá fyrrgreindum ákvæðum þessarar greinar ef inneign er undir kr. 500.000,00. Skal viðmiðunarfjárhæð þessi breytast árlega í hlutfalli við breytingu á vísitölu neysluverðs miðað við grunn vísitölu 173,5 stig.

Umsókn um endurgreiðslu inneignar úr séreignadeild skal vera skrifleg.

46. [Persónutrygging.
Lífeyrissjóðnum er heimilt, samkvæmt skriflegri beiðni viðkomandi sjóðfélaga, að draga frá iðgjöldum hans upphæð, sem svarar til iðgjalds vegna persónutryggingar. Það er þó skilyrði fyrir slíkum kaupum, að réttur til útborgunar tryggingar hlíti sömu reglum og gilda um lífeyri samkvæmt samþykktum þessum.]

47. Samningi um greiðslur iðgjalds til séreignadeildar er hægt að segja upp með sex mánaða fyrirvara.

Samningurinn fellur þó úr gildi ef sjóðfélaginn hættir störfum, sem veita aðild að lífeyrissjóðnum sbr. 3. gr., nema hann óski þess að halda áfram að greiða til séreignadeildar.

Uppsögn veitir ekki rétt til útborgunar innistæðu eða réttinda. Aðilar um samnings um lífeyrissparnað geta samið um að heimilt sé að flytja innistæðu eða réttindi eftir uppsögn milli þeirra, sem boðið geta upp á samninga um viðbótartryggingarvernd sbr. 3. mgr. 8. gr. l. nr. 129/1998 um skyldutryggingu lífeyrisréttinda og starfsemi lífeyrissjóða, gegn greiðslu kostnaðar.

V. Kafli: Ýmis ákvæði
48. Lífeyrir greiðist mánaðarlega eftir á, í fyrsta sinn fyrir næsta mánuð eftir þann mánuð þegar lífeyrisrréttur myndaðist og í síðasta sinn fyrir þann mánuð þegar réttur til lífeyris fellur úr gildi. Sjóðfélagi, sem hefur töku lífeyris í beinu framhaldi af starfslokum og hefur fengið fyrir fram greidd laun, skal þó fá lífeyri greiddan fyrir fram.

Nú nær lífeyrisgreiðsla ekki fjárhæð sem svarar til a.m.k. réttinda vegna greiðslu iðgjalds sem nemur kr. 50.000 og fyrirsjánlegt er að um sameiningu við önnur réttindi verður ekki að ræða, og er þá stjórn sjóðsins heimilt að inna greiðsluna af hendi í einu lagi samkvæmt reglum í samræmi við tillögur tryggingafræðinga.

49. Árlega skal stjórn sjóðsins láta fara fram tryggingafræðilega athugun á fjárhag deilda sjóðsins í samræmi við 24. grein laga um skyldutryggingu lífeyrisréttinda og starfsemi lífeyrissjóða nr. 129/1997.

50. Tímabil er iðgjaldagreiðslur hafa sannanlega fallið niður vegna veikinda eða atvinnuleysis reiknast ekki með þegar úrskurða skal hvort skilyrði um iðgjaldagreiðslutíma eru uppfyllt.

Réttur til elli-, örorku- og makalífeyris fellur ekki niður þótt sjóðfélagi hætti iðgjaldagreiðslu. Rétturinn miðast þá einungis við áunnin geymd réttindi, sbr. þó 1. mgr.

51. Stjórn sjóðsins er heimilt að taka að sér rekstur annarra lífeyrissjóða enda komi eðlileg þóknun fyrir. Stjórninni er ennfremur heimilt að semja um að taka við réttindum, sem sjóðfélagar í öðrum lífeyrissjóðum eiga, eða flytja réttindi sjóðfélaga þessa sjóðs annað enda sé slíkt heimilt samkvæmt lögum. Við slíkan réttindaflutning skal þess gætt að sjóðurinn beri ekki skaða af honum. Stjórn sjóðsins skal semja við aðra lífeyrissjóði um hvernig skuli fara með réttindi þeirra sem flytjast á milli sjóða og setja nánari reglur um flutning á milli deilda.

52. Stjórn sjóðsins er skylt að upplýsa sjóðfélaga um réttindi þeirra með því að senda þeim að minnsta kosti tvisvar á ári yfirlit um iðgjöld þeirra og réttindi, svo og um rekstur og fjárhagsstöðu sjóðsins og breytingar á samþykktum.

53. Um málsmeðferð ágreiningsmála sjóðfélaga gagnvart lífeyrissjóðnum gilda ákvæði stjórnsýslulaga nr. 37/1993 eftir því sem við á, svo sem um birtingu ákvörðunar, rökstuðning og endurupptöku. Vilji sjóðfélagi ekki una úrskurði sjóðstjórnar í máli, er hann hefur skotið til hennar, getur hann vísað málinu til gerðardóms innan þriggja mánaða frá því tilkynnt var um úrskurðinn. Gerðardómur skal skipaður þremur mönnum, einum tilnefndum af sjóðfélaga, einum af lífeyrissjóðnum og oddamanni tilnefndum af bankaeftirliti Seðlabanka Íslands. Gerðardómurinn skal úrskurða í málinu á grundvelli þeirra krafna, sönnunargagna, málsástæðna og annarra upplýsinga sem lágu fyrir sjóðstjórn er hún tók ákvörðun um málið. Komi fram nýjar kröfur, sönnunargögn og málsástæður við meðferð málsins fyrir gerðardómi skal málinu vísað aftur til sjóðstjórnar til endurupptöku. Sjóðstjórn er þá skylt að taka málið upp að nýju til úrskurðar. Úrskurður gerðardóms er bindandi fyrir báða aðila. Málskostnaði skal skipt milli málsaðila eftir mati dómsins, en þó skal sjóðfélagi ekki greiða meira en 1/3 málskostnaðar. Um málsmeðferð fyrir gerðardómnum fer að öðru leyti samkvæmt lögum um samningsbundna gerðardóma.

54. Samþykktum þessum verður ekki breytt nema með samkomulagi stofnaðila sjóðsins, þ.e. BSRB, Bandalags háskólamanna og Sambands íslenskra sveitarfélaga.

55. Samþykktir þessar taka gildi við útgáfu starfsleyfis.

Ákvæði til bráðabirgða.

Þrátt fyrir ákvæði 54. greinar skulu samþykktirnar gilda um réttindi þeirra sem ráðnir hafa verið eftir 1. júlí 1998 og hefðu fyrir gildistöku l. nr.129/1997 átt skylduaðild að einhverjum eftirtaldra sjóða: Eftirlaunasjóður Reykjanesbæjar, Eftirlaunasjóður starfsm. Hafnarfjarðarkaupstaðar, Lífeyrisjóður Akraneskaupstaðar, Lífeyrisjóður Neskaupstaðar, Lífeyrisjóður starfsm. Akureyrarbæjar, Lífeyrisjóður starfsm. Húsavíkurbæjar, Lífeyrisjóður starfsm Kópavogskaupstaðar, Lífeyrisjóður starfsm Reykjavíkurborgar, Lífeyrisjóður starfsm Vestmannaeyjabæjar, Lífeyrissjóður starfsmanna ríkisins og Söfnunarsjóður lífeyrisréttinda.

Samþykktir þessar voru þannig samþykktar á stjórnarfundi Lífeyrissjóðs starfsmanna sveitarfélaga þann 1. 12. 1998 og staðfestar af fjármálaráðuneyti þann 8. 12. 1998. 46. gr. var samþykkt á stjórnarfundi LSS þann 15. 12. 1998 og staðfest af fjármálaráðuneyti þann 22. 12. 1998.

Reykjavík 12. janúar 1999