Meirihluti launafólks innan ASÍ og BSRB á bíl eða hefur afnot af bíl eða níu af hverjum tíu en algengast er að fólk á tekjulágum heimilum eigi ekki bíl. Fimmtungur þeirra sem eiga bíl eru á rafmagnsbíl (19%) en lang algengast er að fólk á tekjuhærri heimilum eigi rafbíla. Þegar þau sem eiga ekki rafmagnsbíla voru spurð hvort þau væru líkleg eða ólíkleg til að vera á rafmagnsbíl eftir fimm til tíu ár kom fram að tekjuhærri hópar töldu það líklegra en tekjulægri.
Algengustu ástæður þess að launafólk telur ólíklegt að það muni aka um á rafmagnsbíl eftir fimm til tíu ár eru annarsvegar að slíkt ökutæki sé of dýrt og hins vegar að þau hafi ekki áhuga á að eiga rafmagnsbíl. Mun færri nefndu aðrar ástæður á borð við þær að eiginleikar rafmagnsbíla hentuðu þeim ekki t.d. vegna drægni, að það væri of mikil fyrirhöfn að hlaða rafbíl, koma upp hleðslustöð eða að hleðslunet hraðhleðslustöðva væri ekki nægilega gott.
Fjórir af hverjum tíu eru jákvæðir gagnvart því að nota annarskonar samgöngumáta en einkabíl
Launafólk búsett á höfuðborgarsvæðinu sem átti eða hafði bíl til afnota var spurt hversu jákvætt eða neikvætt það væri gagnvart annarskonar samgöngumáta en einkabíl. Niðurstöðurnar draga fram talsvert tvískipt viðhorf þar sem fjórir af hverjum tíu eru mjög eða frekar jákvæðir en þriðjungur er mjög eða frekar neikvæður. Innflytjendur eru jákvæðari en innfæddir gagnvart því að nota annarskonar samgöngumáta en einkabíl en fólk í yngsta aldurshópnum, 30 ára eða yngri, er neikvæðast gagnvart því.
Langur ferðatími er algengasta ástæða þess að vera neikvæður gagnvart annarskonar samgöngumáta en einkabílnum
Sjö af hverjum tíu sem voru mjög eða frekar neikvæð gagnvart því að nota annarskonar samgöngumáta en einkabílinn sögðu það vera vegna langs ferðatíma. Auk þess sagði helmingur svarenda að það drægi úr lífsgæðum og frelsi, að leiðarkerfið væri ekki nógu gott og fjórir af hverjum tíu að almenningssamgöngur væru ekki áreiðanlegar.
Hærra hlutfall innflytjenda og tekjulágra er neikvæður vegna kostnaðar við almenningssamgöngur
Tæplega helmingur innflytjenda er neikvæður gagnvart því að nota annarskonar samgöngumáta en einkabílinn vegna kostnaðar við almenningssamgöngur. Sama á við um fólk með lægri heimilistekjur samanborið við þau sem eru með hærri tekjur. Innfæddir nefna í frekar aðrar ástæður en mikinn kostnað.
Kostnaður við rekstur og viðhald bíls algengasta ástæða þess að launafólk er jákvætt fyrir annarskonar samgöngumáta en einkabíl
Sex af hverjum tíu þeirra sem voru mjög eða frekar jákvæðir gagnvart annarskonar samgöngumáta en einkabíl nefndu að helsta ástæða þess væri hár kostnaður við rekstur og viðhald ökutækis. Einnig nefndi um þriðjungur megnun og streitu vegna umferðar. Konur og þau sem eru 30 ára og yngri voru líklegri en aðrir hópar til að vera jákvæðar gagnvart annarskonar samgöngum en einkabíl vegna mengunar.
Varða – Rannsóknastofnun vinnumarkaðarins leggur árlega fyrir könnun meðal launafólks í aðildarfélögum ASÍ og BSRB. Í könnun Vörðu var spurt um bílaeign, rafbílaeign og hvort rafbílaeign væri líkleg á næstu árum. Auk þess var spurt um viðhorf launafólks til þess að nota annarskonar samgöngumáta en einkabílinn og ástæður þess. Rannsóknin náði til félaga í aðildarfélögum Alþýðusambands Íslands (ASÍ) og BSRB – heildarsamtaka stéttarfélaga starfsmanna í almannaþjónustu. Þetta er fimmta árið í röð sem könnun á lífsskilyrðum launafólks er gerð og hefur fjöldi svara aldrei verið meiri en nú þar sem tæplega 25.000 svör bárust.
Í skýrslunni er að finna ítarlega greiningu á niðurstöðum rannsóknarinnar Skýrsluna má lesa í heild sinni á vef Vörðu