Á níunda hundrað komin á biðlista hjá Bjargi

Framkvæmdir eru hafnar í Spönginni í Grafarvogi og við Urðarbrunn í Úlfarsárdal.

Mikill áhugi er meðal félagsmanna aðildarfélaga BSRB og Alþýðusambands Íslands á íbúðum sem Bjarg íbúðafélag mun leigja tekjulágu fólki á vinnumarkaði. Í lok júlí höfðu alls 818 umsóknir borist félaginu.

Skráning á biðlista hófst þann 15. maí. Allar umsóknir sem bárust fyrir lok júlí voru settar í pott og dregið um röð þeirra á biðlista. Þetta var gert til að gæta jafnræðis þar sem reiknað var með að einhvern tíma myndi taka að koma upplýsingum um að opnað hefði verið fyrir umsóknir til félaga í aðildarfélögum BSRB og ASÍ.

Nú hefur verið dregið um röð umsækjendanna 818 á biðlistanum og geta þeir sem sóttu um séð hvar þeir standa með því að fara inn á vef Bjargs og skoða „mínar síður“. Ein númeraröð er fyrir alla óháð íbúðartegund eða staðsetningu. Áfram er hægt að skrá sig á biðlistann og er skráningum raðað upp í þeirri röð sem þær berast og virkjast þegar greiðsla staðfestingargjalds hefur verið innt af hendi.

Fólk á biðlista sækir um íbúðir sem losna

Í hvert sinn sem íbúðir eru lausar til umsókna sendir Bjarg póst á alla aðila á biðlista með nánari upplýsingum. Ef einstaklingur sem er á biðlista hefur áhuga á tiltekinni staðsetningu þarf að senda umsókn. Úthlutun hlýtur sá umsækjandi sem uppfyllir öll skilyrði um úthlutun hefur lægsta númer á biðlista, að teknu tilliti til forgangs. Sótt er um ákveðna íbúðartegund eða íbúðarstærð sem hentar út frá fjölskyldustærð og í tilteknu húsi. Ekki er hægt að sækja um ákveðnar íbúðir sérstaklega.

Bjarg hefur þegar hafið framkvæmdir við uppbyggingu íbúðakjarna á tveimur stöðum innan Reykjavíkur, í Spöng í Grafarvogi og í Úlfarsárdal. Öll vinna er á áætlun og er reiknað er með þeir sem eru á biðlista geti sótt um fyrstu íbúðirnar á höfuðborgarsvæðinu í september næstkomandi. Afhending íbúða til leigutaka gæti hafist 1. júlí 2019.

Fleiri framkvæmdir eru í undirbúningi hjá félaginu víða um land, og eru alls 815 íbúðir annað hvort á undirbúnings- eða framkvæmdastigi. Hér að neðan er hægt er að sjá stöðuna á uppbyggingu félagsins eins og hún stendur í dag:

 

Framkvæmdir hafnar
  • Móavegur 2-12, Grafarvogi 155 íbúðir. Framkvæmdir í gangi. Fyrsta skóflustunga var tekin í febrúar 2018.
  • Urðarbrunnur 130-132 og 33, Úlfarársdal, 83 íbúðir. Framkvæmdir í gangi. Fyrsta skóflustunga var tekin í apríl 2018.

 

Framkvæmdir í undirbúningi
  • Akranes, 33 íbúðir (að Asparskógum 12, 14 og 16). Samningur við verktaka undirritaður. Upphaf framkvæmda áætlað haust 2018.
  • Hallgerðargata, við Kirkjusand, í Reykjavík. 80 íbúðir. Í undirbúningi.
  • Leirtjörn, Úlfarársdal í Reykjavík. 82 íbúðir. Í undirbúningi.
  • Bryggjuhverfi, Reykjavík. 29 íbúðir. Í undirbúningi.
  • Vogabyggð, Gelgjutanga, Reykjavík. 75 íbúðir. Í undirbúningi.
  • Hraunbær, Árbæ, Reykjavík. 92 íbúðir. Í undirbúningi.
  • Skerjafjörður, Reykjavík. 100 íbúðir. Í undirbúningi.
  • Akureyri, 26 íbúðir (í Guðmannshaga 2). Í undirbúningi.
  • Sandgerði, 5 íbúðir (sunnan Sandgerðisvegar). Í undirbúningi.
  • Þorlákshöfn, 11 íbúðir (við Sambyggð). Í undirbúningi.
  • Selfoss, 44 íbúðir (í Björk). Í undirbúningi.

Allar nánari upplýsingar má nálgast á vef Bjargs íbúðafélags.


Fannst þér efnið á síðunni hjálplegt?