Fögnum uppbyggingu heilsugæslunnar

Eigi heilsugæslan að vera fyrsti viðkomustaður þeirra sem þurfa að leita til heilbrigðisþjónustunnar verður að vera tryggt að hún sé í stakk búin til að taka á móti þeim sem til hennar leita. Það er því ástæða til að fagna opnun nýrrar heilsugæslustöðvar í Mývatnssveit.

Ákveðið var að byggja nýtt húsnæði fyrir heilsugæsluna í Mývatnssveit, sem er hluti af Heilbrigðisstofnun Norðurlands, en heilsugæslan hafði verið í óviðunandi húsnæði um nokkurt skeið. Húsið var um ár í byggingu og var tekið formlega í notkun nú í vikunni.

Víða er þörf á uppbyggingu heilsugæslustöðva og virðist vilji stjórnvalda standa til þess að bæta úr þar sem ástandið er óviðunandi. Það á meðal annars við á höfuðborgarsvæðinu.

BSRB styður áform um að byggja upp heilsugæsluna á höfuðborgarsvæðinu, en hefur mótmælt harðlega þeim áformum stjórnvalda að byggja upp nýjar einkareknar heilsugæslustöðvar í stað þess að byggja upp stöðvar undir merkjum Heilsugæslu höfuðborgarsvæðisins. Samhliða þarf að bæta úr bágri fjárhagsstöðu þeirrar stofnunar, sem hefur verið í fjársvelti árum saman.

Aukið álag vegna ferðamanna
Þó aðeins búi um 400 manns á því svæði sem nýja heilsugæslustöðin í Mývatnssveit þjónar er bent á það í frétt á vef Velferðarráðuneytisins að það segi lítið um umfang þjónustunnar, enda fari ferðamannastraumur á svæðinu sívaxandi. Þau rök eiga raunar líka við víðar, þar sem gríðarleg aukning hefur orðið í fjölgun ferðamanna, án þess að innviðir á borð við heilsugæslu og heilbrigðiskerfið almennt hafi verið lagað að því álagi sem því fylgir.

Eigi heilsugæslan á höfuðborgarsvæðinu að anna því aukna álagi sem fylgir auknum mannfjölda og gríðarlegri aukningu ferðamanna verður að hafa hraðar hendur við uppbyggingu hennar á næstu árum. Meirihluti almennings er andvígur aukinni einkavæðingu í heilbrigðiskerfinu og breytir þar engu hvort notað er fallegra orð eins og einkarekstur yfir þá einkavæðingu. BSRB tekur undir þau sjónarmið mikils meirihluta almennings.