Formaður BSRB í viðtali um kjaradeilu

Elín Björg Jónsdóttir, formaður BSRB, var einn gesta Sigurjóns M. Egilssonar í þættinum Þjóðbraut á sjónvarpsstöðinni Hringbraut á sunnudag. Í þættinum var fjallað um ýmis mál sem fjallað hefur verið um í fjölmiðlum, til dæmis lagasetningu Alþingis á aðgerðir Félags íslenskra flugumferðarstjóra í kjaradeilu þeirra við Isavia.

Í þættinum sagði Elín skýrt að flugumferðarstjórar hafi í kjaradeilu sinni unnið eftir sínum kjarasamningum og uppfyllt sína vinnuskyldu. Þeir hafi hins vegar ekki tekið að sér yfirvinnu. „Starfið þeirra hefur þroskast svolítið þannig að þeir hafa þurft að vinna mjög mikla yfirvinnu, bæði vegna fámennis en líka vegna aukins álags,“ sagði Elín.

Hún sagði lagasetningu stjórnvalda taka fyrir að flugumferðarstjórar geti beitt þeirri aðferð að setja yfirvinnubann. „En auðvitað eru það einstaklingarnir, hver fyrir sig, sem taka ákvörðun um hvort þeir fara inn ef á þá verður kallað.“

Í þættinum var fjallað um fleiri mál sem hafa verið í kastljósinu undanfarið, til dæmis hvers vegna BSRB og ASÍ tóku ekki þátt í stofnun Þjóðhagsráðs, forsetakosningarnar og fleira.

Hægt er að horfa á þáttinn í heild sinni á vef Hringbrautar.