Leigjendur hjá Bjargi komnir yfir eitt þúsund

Fyrsta skóflustungan að 28 nýjum íbúðum á Selfossi var tekin í byrjun desember.

Leigjendur hjá Bjargi íbúðafélagi, sem stofnað var af BSRB og ASÍ árið 2016, eru nú komnir vel yfir eitt þúsund í alls um 440 íbúðum, samkvæmt upplýsingum frá Bjargi.

Félagið er rekið án hagnaðarsjónarmiða og hefur það að markmiði að tryggja tekjulágum fjölskyldum á vinnumarkaði, félagsmönnum í BSRB og ASÍ, aðgengi að hagkvæmu, öruggu og vönduðu íbúðarhúsnæði í langtímaleigu.

Félagið hefur þegar afhent íbúðir á nokkrum stöðum í Reykjavík, sem og á Akranesi, í Þorlákshöfn og á Akureyri og mun á þessu ári einnig afhenda íbúðir á Selfossi. Í dag eru um 240 íbúðir í byggingu og 374 til viðbótar á undirbúningsstigi.

Nánari upplýsingar um Bjarg íbúðarfélag, þar með talið þau skilyrði sem þarf að uppfylla til að sækja um íbúð, má finna á vef félagsins. Þar er einnig hægt að fylla út umsókn um íbúð.


Fannst þér efnið á síðunni hjálplegt?