Skrifað var undir nýjan kjarasamning SFR og Isavia í gær með fyrirvara um samþykki félagsmanna. Samningurinn verður kynntur fljótlega eftir helgi og munu félagsmenn greiða atkvæði um samninginn rafrænt í kjölfar kynningar.
Þetta er annar samningurinn sem SFR gerir við Isavia, en félagsmenn felldu fyrri samninginn í atkvæðagreiðslu í lok apríl síðastliðinn. Deilunni var vísað aftur til ríkissáttasemjara þann 12. maí. Á öðrum fundi samninganefndanna með ríkissáttasemjara í gær náðist óvænt samkomulag sem skrifað var undir, eins og fram kemur á vef SFR.
Samningurinn felur í sér meiri hækkun á launum en fyrri samningur og segist Árni Stefán Jónsson, formaður SFR, vongóður um að hann verði samþykktur.