Skoða þarf heimildir heilbrigðisráðherra

Þær breytingar sem heilbrigðisráðherra áformar að gera á heilsugæslunni á höfuðborgarsvæðinu með því að bjóða út þrjár einkareknar heilsugæslustöðvar sýna hversu víðtækar heimildir ráðherra hefur til að gera breytingar á heilbrigðiskerfinu án aðkomu Alþingis að mati sérfræðings í heilbrigðiskerfinu.

Rétt er að skoða alvarlega hvort heimildir heilbrigðisráðherra eru of rúmar og hvort Alþingi ætti að hafa meiri aðkomu að stefnubreytingum í heilbrigðisþjónustunni, sagði Rúnar Vilhjálmsson, prófessor í félagsfræði við hjúkrunarfræðideild HÍ, á málþingi um einkavæðingu í heilbrigðiskerfinu sem BSRB og ASÍ stóðu fyrir á þriðjudag.

Heilbrigðisráðherra hefur nú ákveðið að bjóða út rekstur þriggja nýrra heilsugæslustöðva á höfuðborgarsvæðinu, og með því auka enn á einkarekstur í heilbrigðiskerfinu. Málið hefur ekki verið rætt á Alþingi og ekki kallað eftir umsögnum hagsmunaaðila eða almennings vegna þessarar umdeildu ákvörðunar.

„Það er óvíst hvort einkavæðingin fjölgi heimilislæknum. Ég bendi á að það hefur þegar verið umtalsverð einkavæðing í heilsugæslunni á undanförnum árum. Samt hefur heilsugæslulæknum ekki fjölgað. Ég held að við þurfum að skoða fleiri atrið sem snúa að mönnun í heimilislækningum en rekstrarformið,“ sagði Rúnar í erindi sínu.

Nánar verður sagt frá erindum frummælenda á næstunni. Áhugasamir geta kynnt sér slæður frá frummælendum hér að neðan.


Rúnar Vilhjálmsson, prófessor í félagsfræði við hjúkrunarfræðideild HÍ.
Félagslegt heilbrigðiskerfi, einkavæðingin og hagsmunir sjúklinga.

Sigurbjörg Sigurgeirsdóttir, lektor í opinberri stjórnsýslu við HÍ.
Aukinn einkarekstur á heilbrigðisþjónustu í opinberum kerfum: Helstu einkenni hans og áhrif til lengri tíma.

Þórarinn Ingólfsson, formaður Félags íslenskra heimilislækna.
Heilsugæsla: Aðgengi, jöfnuður, ábyrgð.


Fannst þér efnið á síðunni hjálplegt?