Elín Björg Jónsdóttir, formaður BSRB, undirritaði í gær yfirlýsingu um hæfniramma um íslenska menntun, ásamt menntamálaráðherra og fulltrúum Alþýðusambands Íslands, Samtaka atvinnulífsins, Kvasa, Leikni - samtökum fullorðinsfræðsluaðila á Íslandi, Bandalagi háskólamanna, Sambandi íslenskra framhaldsskólanema og Landssamtaka íslenskra stúdenta.
Hæfniramma um íslenska menntun er ætlað er að endurspegla stigvaxandi hæfnikröfur í formlegu og óformlegu námi á Íslandi. Undirritunin markar tímamót hvað varðar áherslu á sýnileika ævilangrar menntunar sem fer fram bæði við nám og störf en hæfniramminn nýtist fyrst og fremst almenningi sem tenging milli formlegs og óformlegs náms.
Hæfniramminn hefur tvíþættan tilgang; annars vegar að auka gagnsæi innan menntakerfisins og hinsvegar að auka gagnsæi milli evrópskra menntakerfa.
Varpar ljósi á hæfni
Íslenski hæfniramminn telur sjö hæfniþrep og endurspegla hækkandi þrep auknar hæfnikröfur. Þrepin endurspegla þær kröfur sem gerðar eru til einstaklingsins er varða þekkingu, leikni og hæfni í verkefnum, vinnu og samskiptum. Hæfniramminn eykur þannig gagnsæi og varpar ljósi á þá hæfni sem einstaklingur býr yfir að loknu námi á tilteknu þrepi. Upplýsingar um hæfni má til að mynda nýta í ferilskrá, við starfsþróun og í umsókn um nám.
Aðilar þessarar yfirlýsingar eru samábyrgir fyrir innleiðingu og kynningu á hæfnirammanum og leggja sérstaka áherslu á að þróaðar verði aðferðir við að skilgreina námslok og tengja óformlegt nám við hæfniþrep rammans.
Hægt er að kynna sér hæfniramma um íslenska menntun frekar með því að smella hér.