BSRB leggst gegn áformum um að leggja niður SL lífeyrissjóð, (áður Söfnunarsjóð lífeyrisréttinda) og sameina hann Almenna Lífsverk. Með sameiningunni yrði stærri hluti skyldubundinna lífeyrisiðgjalda færður úr samtryggingu yfir í einstaklingsbundna séreign, en hjá Almenna Lífsverk rennur tæplega helmingur iðgjaldsins í séreign.
BSRB telur að slík breyting gangi gegn þeirri stefnu sem aðilar vinnumarkaðarins hafa mótað um að samtrygging sé ein af meginstoðum íslenska lífeyriskerfisins. Íslenska lífeyriskerfið byggi á skylduaðild, sjóðssöfnun og samtryggingu. Með því fyrirkomulagi sé markmiðið að tryggja launafólki ævilanga afkomu og sameiginlega tryggingavernd, án þess að leggja óhóflegar byrðar á ríkissjóð eða komandi kynslóðir.
Þetta kemur fram í umsögn BSRB um drög að frumvarpi sem felur í sér að lög um Söfnunarsjóð lífeyrisréttinda verði felld úr gildi til að hægt verði að sameina sjóðinn Almenna Lífsverk. Bandalagið varar við því að slík stefnubreyting í lífeyrismálum geti haft afdrifaríkar þjóðhagslegar afleiðingar til lengri tíma.
Lesa umsögn BSRB í heild sinni